Jeremias
30 Ang pulong nga midangat kang Jeremias gikan kang Jehova, nga nag-ingon: 2 “Mao kini ang giingon ni Jehova nga Diyos sa Israel, ‘Isulat mo sa usa ka basahon ang tanang pulong nga akong isulti kanimo.+ 3 Kay, “tan-awa! ang mga adlaw moabot,” mao ang giingon ni Jehova, “ug akong tigomon ang mga binihag sa akong katawhan, ang Israel ug ang Juda,”+ si Jehova miingon, “ug ibalik ko sila sa yuta nga akong gihatag sa ilang mga katigulangan, ug panag-iyahon gayod nila kini pag-usab.”’”+
4 Ug mao kini ang mga pulong nga gisulti ni Jehova sa Israel ug sa Juda. 5 Kay mao kini ang giingon ni Jehova: “Among nadungog ang tingog sa pagkurog, sa kakuyaw,+ ug walay kalinaw. 6 Pangutana, palihog, Oh mga tawo, ug tan-awa kon nanganak ba ang usa ka lalaki. Nganong ako nakakita man sa matag lalaki nga lig-on ug lawas nga gihawid ang iyang mga kamot sa iyang balat-ang sama sa usa ka babaye nga nanganak,+ ug ang tanang nawong nangluspad?+ 7 Pagkamakaluluoy! Kay dako uyamot kanang adlawa,+ nga walay sama niana,+ ug kana ang panahon sa kasakit alang kang Jacob.+ Apan siya maluwas gikan niana.”
8 “Ug mahitabo nianang adlawa,” mao ang giingon ni Jehova sa mga panon, “nga balion ko ang yugo sa usa gikan sa imong liog, ug bugtoon ko ang imong mga gapos,+ ug dili na siya pahimuslan sa mga estranyo ingong ulipon. 9 Ug sila mag-alagad gayod kang Jehova nga ilang Diyos ug kang David nga ilang hari,+ nga akong patindogon alang kanila.”+
10 “Ug kon bahin kanimo, ayaw kahadlok, Oh akong alagad nga Jacob,” mao ang giingon ni Jehova, “ug ayaw kalisang, Oh Israel.+ Kay ania, ako magaluwas kanimo gikan sa halayo ug sa imong kaliwat gikan sa yuta sa ilang pagkabinihag.+ Ug si Jacob tino nga mobalik ug mahigawas sa kasamok ug maanaa sa kahayahay, ug walay bisan kinsa nga magapakurog.”+
11 “Kay ako magauban kanimo,” mao ang giingon ni Jehova, “aron sa pagluwas kanimo;+ apan ako magahimog pagpuo taliwala sa tanang kanasoran diin ako nagpatibulaag kanimo.+ Hinunoa, kon bahin kanimo ikaw dili ko puohon.+ Ug pagatul-iron ko ikaw sa hustong paagi, sanglit dili ko gayod pasagdan nga ikaw dili masilotan.”+
12 Kay mao kini ang giingon ni Jehova: “Walay pagkaayo ang imong pagkahugno.+ Ang imong hampak nagmakanunayon.+ 13 Walay usa nga milaban sa imong kawsa, alang sa imong samad.+ Walay tambal nga makaayo, walay pagkaalim, alang kanimo.+ 14 Kadtong tanan nga nahigugma pag-ayo kanimo mao ang nakalimot kanimo.+ Dili ikaw ang ilang gipangita. Kay sa hampak sa usa ka kaaway ako naghampak kanimo,+ sa kastigo sa usa nga mabangis,+ tungod sa kadagaya sa imong kasaypanan;+ ang imong mga sala midaghan.+ 15 Nganong nagtuaw ka gumikan sa imong pagkahugno?+ Ang imong kasakit walay pagkaayo tungod sa kadagaya sa imong kasaypanan; ang imong mga sala midaghan.+ Gihimo ko kanimo kining mga butanga. 16 Busa ang tanang magatukob kanimo pagatukbon;+ ug kon bahin sa tanan nimong mga kaaway, silang tanan pagabihagon.+ Ug kadtong magapangilog kanimo tino nga pagailogan, ug ang tanang magapangagaw kanimo itugyan ko sa pagpangagaw.”+
17 “Kay ipahiuli ko ikaw sa maayong panglawas, ug ayohon ko ikaw gikan sa imong mga hampak,”+ mao ang giingon ni Jehova. “Kay ikaw gitawag nila nga usa ka babayeng giabog:+ ‘Nga mao ang Zion, nga wala pangitaa ni bisan kinsa.’”+
18 Mao kini ang giingon ni Jehova: “Ania, tigomon ko ang mga binihag sa mga tolda ni Jacob,+ ug ako maluoy sa iyang mga tabernakulo. Ug ang siyudad tukoron gayod pag-usab ibabaw sa iyang bungdo;+ ug ibabaw sa nahiangay nga dapit niini mahimutang ang puloy-anang torre.+ 19 Ug gikan kanila mogula ang pagpasalamat, ug ang tingog niadtong nangatawa.+ Ug padaghanon ko sila, ug sila dili modiyutay;+ ug padaghanon ko kaayo sila, ug sila dili mahimong gamay kaayo.+ 20 Ug ang iyang mga anak mahimo gayong ingon sa kanhing kapanahonan, ug ang iyang kaugalingong katigoman lig-ong matukod sa akong atubangan.+ Ug akong iliso ang akong pagtagad nganha sa tanang tigpanglupig kaniya.+ 21 Ug ang iyang halangdong usa magagikan gayod kaniya,+ ug ang iyang kaugalingong magmamando mogula gikan sa iyang taliwala;+ ug paduolon ko siya, ug siya moduol gayod kanako.”+
“Kay kinsa, karon, kining usa nga naghatag sa iyang kasingkasing ingong pasalig aron makaduol kanako?”+ mao ang giingon ni Jehova. 22 “Ug kamo mahimong akong katawhan,+ ug ako mahimong inyong Diyos.”+
23 Tan-awa! Ang usa ka unos ni Jehova, ang kaaligutgot mismo, migula, usa ka maharosong kusog nga bagyo.+ Diha sa ulo sa mga daotan kini mohuros.+ 24 Ang nagasilaob nga kasuko ni Jehova dili motalikod hangtod nga iyang ikapahamtang ug hangtod nga iyang matuman ang mga laraw sa iyang kasingkasing.+ Sa kaulahiang bahin sa mga adlaw inyong pagatagdon kini.+