Numeros

10 Ug si Jehova misulti kang Moises, nga nag-ingon: 2 “Pagbuhat ug duha ka trompeta+ nga plata. Buhata kini nga sinalsal, ug kinahanglang gamiton kini sa pagtigom+ sa katawhan ug sa pagpagikan sa nagkampong katawhan. 3 Ug sila maghuyop sa duha ka trompeta, ug ang tibuok katigoman magtuman sa ilang kasabotan sa pakigtagbo kanimo diha sa ganghaan sa tolda nga tagboanan.+ 4 Ug kon sila maghuyop sa usa lamang, ang mga pangulo nga nangulo sa linibo sa Israel magtuman usab sa ilang kasabotan sa pakigtagbo kanimo.+

5 “Ug maghuyop kamo ug naglubadlubad nga tunog, ug ang mga kampo niadtong nagkampo sa dapit sa sidlakan+ kinahanglang mobiya. 6 Ug maghuyop kamo ug naglubadlubad nga tunog sa ikaduhang higayon, ug ang mga kampo niadtong nagkampo sa dapit sa habagatan+ kinahanglang mobiya. Sila kinahanglang maghuyop ug naglubadlubad nga tunog sa matag higayon nga ang usa kanila mobiya.

7 “Karon sa dihang pagatigomon ang kongregasyon, kamo kinahanglang maghuyop sa mga trompeta,+ apan kamo dili maghuyop ug naglubadlubad nga tunog. 8 Ug ang mga anak nga lalaki ni Aaron, ang mga saserdote, maghuyop sa mga trompeta,+ ug ang paggamit niini magsilbing lagda alang kaninyo hangtod sa panahong walay tino sulod sa inyong mga kaliwatan.

9 “Ug kon kamo makiggubat didto sa inyong yuta batok sa malupigon nga naghasi kaninyo,+ magpatingog usab kamo sa mga trompeta+ ug usa ka tawag sa pagpakiggubat, ug tino nga kamo hinumdoman sa atubangan ni Jehova nga inyong Diyos ug luwason gikan sa inyong mga kaaway.+

10 “Ug sa adlaw sa inyong pagmaya+ ug sa mga panahon sa inyong kapistahan+ ug sa mga sinugdan sa inyong mga bulan,+ kamo maghuyop sa mga trompeta ibabaw sa inyong mga halad-nga-sinunog+ ug sa inyong mga halad-sa-panag-ambit;+ ug ang paggamit kanila magsilbing handomanan alang kaninyo sa atubangan sa inyong Diyos. Ako mao si Jehova nga inyong Diyos.”+

11 Karon nahitabo nga sa ikaduhang tuig, sa ikaduhang bulan, sa ikakawhaan nga adlaw sa bulan,+ ang panganod mipataas gikan sa ibabaw sa tabernakulo+ sa Pagpamatuod. 12 Ug ang mga anak sa Israel mibiya sama sa paagi sa ilang mga pagbiya+ sa kamingawan sa Sinai, ug ang panganod mipondo sa kamingawan sa Paran.+ 13 Ug sila mibiya sa unang higayon, sumala sa sugo ni Jehova pinaagi kang Moises.+

14 Busa ang tulo-ka-tribo nga dibisyon sa kampo sa mga anak ni Juda mibiya una sa tanan sumala sa ilang mga panon,+ ug si Nason+ nga anak nga lalaki ni Aminadab mao ang nangulo sa panon niini. 15 Ug ang nangulo sa panon sa tribo sa mga anak ni Isacar mao si Netanel+ nga anak nga lalaki ni Zuar. 16 Ug ang nangulo sa panon sa tribo sa mga anak ni Zabulon mao si Eliab nga anak nga lalaki ni Helon.+

17 Ug ang tabernakulo gitangtang,+ ug ang mga anak nga lalaki ni Gerson+ ug ang mga anak nga lalaki ni Merari+ nanglakaw ingon nga mga tigdala sa tabernakulo.

18 Ug ang tulo-ka-tribo nga dibisyon sa kampo ni Ruben+ mibiya sumala sa ilang mga panon, ug si Elizur+ nga anak nga lalaki ni Sedeur mao ang nangulo sa panon niini. 19 Ug ang nangulo sa panon sa tribo sa mga anak ni Simeon+ mao si Selumiel+ nga anak nga lalaki ni Zurisadai. 20 Ug ang nangulo sa panon sa tribo sa mga anak ni Gad mao si Eliasap+ nga anak nga lalaki ni Deuel.

21 Ug ang mga Kohatnon ingon nga mga tigdala sa sangtuwaryo+ nanglakaw, kay sila makapatindog na sa tabernakulo sa ilang pag-abot.

22 Ug ang tulo-ka-tribo nga dibisyon sa kampo sa mga anak ni Epraim+ mibiya sumala sa ilang mga panon, ug si Elisama+ nga anak nga lalaki ni Amihud mao ang nangulo sa panon niini. 23 Ug ang nangulo sa panon sa tribo sa mga anak ni Manases+ mao si Gamaliel+ nga anak nga lalaki ni Pedazur. 24 Ug ang nangulo sa panon sa tribo sa mga anak ni Benjamin+ mao si Abidan+ nga anak nga lalaki ni Gideoni.

25 Ug ang tulo-ka-tribo nga dibisyon sa kampo sa mga anak ni Dan+ mibiya ingon nga mga magbalantay sa luyo+ alang sa tanang kampo sumala sa ilang mga panon, ug si Ahiezer+ nga anak nga lalaki ni Amisadai mao ang nangulo sa panon niini. 26 Ug ang nangulo sa panon sa tribo sa mga anak ni Aser+ mao si Pagiel+ nga anak nga lalaki ni Okran. 27 Ug ang nangulo sa panon sa tribo sa mga anak ni Neptali+ mao si Ahira+ nga anak nga lalaki ni Enan. 28 Ingon niini ang paagi sa pagbiya sa mga anak sa Israel sumala sa ilang mga panon sa dihang mobiya sila.+

29 Unya si Moises miingon kang Hobab nga anak nga lalaki ni Reuel+ nga Midianhon, ang ugangang lalaki ni Moises: “Mobiya kami paingon sa dapit nga labot niini si Jehova miingon, ‘Ihatag ko kini kaninyo.’+ Uban namo, ug magbuhat gayod kami ug maayo kanimo,+ tungod kay si Jehova nagsulti ug maayo mahitungod sa Israel.”+ 30 Apan siya miingon kaniya: “Dili ako mouban, apan moadto ako sa akong kaugalingong yuta+ ug sa akong mga paryente.” 31 Niini siya miingon: “Palihog, ayaw kami biyai, tungod kay, ikaw suhito kaayo kon asa kami magkampo sa kamingawan, ikaw magsilbing mata alang kanamo. 32 Ug mahitabo gayod nga kon mouban ka kanamo,+ oo, mahitabo gayod nga kon unsang kaayohan ang buhaton ni Jehova kanamo, kami, sa baylo, magabuhat ug maayo kanimo.”

33 Busa nanglakaw sila gikan sa bukid ni Jehova+ sa usa ka panaw nga tulo ka adlaw, ug ang arka sa pakigsaad+ ni Jehova nag-una kanila sa panaw nga tulo ka adlaw aron sa pagpangita ug dapit-pahulayan alang kanila.+ 34 Ug ang panganod ni Jehova+ diha ibabaw nila sa adlaw nga sila mobiya sa pagkampo.

35 Ug mahitabo nga sa dihang mobiya ang Arka, si Moises moingon: “Tindog, Oh Jehova, ug patibulaaga ang imong mga kaaway;+ ug pakalagiwa gikan sa imong atubangan kadtong nagdumot pag-ayo kanimo.”+ 36 Ug sa dihang kini mohunong, siya moingon: “Balik, Oh Jehova, sa tinagpulo ka libo ka linibo sa Israel.”+