Ezequiel
35 Nakadawat na usab kog mensahe gikan kang Jehova, nga nag-ingon: 2 “Anak sa tawo, ipatumong ang imong nawong sa kabukiran sa Seir,+ ug panagna batok niana.+ 3 Ingna kini, ‘Kini ang giingon sa Soberanong Ginoong Jehova: “Ania, ako batok kanimo, Oh kabukiran sa Seir, ug ituy-od nako ang akong kamot batok kanimo ug himoon ka nakong awaaw.+ 4 Himoon nakong kagun-oban ang imong mga siyudad, ug maawaaw ka;+ ug ikaw makaila gayod nga ako si Jehova. 5 Kay dugay na nimong gidumtan+ ang mga Israelinhon ug gitugyan nimo sila sa espada panahon sa ilang katalagman, panahon sa ilang kataposang silot.”’+
6 “‘Busa ingon nga ako buhi,’ miingon ang Soberanong Ginoong Jehova, ‘andamon ka nako alang sa pag-ulag dugo, ug gukdon ka sa pag-ulag dugo.+ Kay dugo ang imong gidumtan, pag-ulag dugo ang mogukod kanimo.+ 7 Himoon nakong awaaw ang kabukiran sa Seir,+ ug patyon nako si bisan kinsa nga moagi ug mobalik didto. 8 Pun-on nako sa mga pinatay ang kabukiran niini; ug kadtong mga pinatay sa espada mangapukan sa imong kabungtoran, kawalogan, ug sa tanan nimong kasapaan. 9 Himoon ka nakong awaaw hangtod sa hangtod, ug ang imong mga siyudad dili pagapuy-an;+ ug kamo makaila gayod nga ako si Jehova.’
10 “Kay miingon ka, ‘Kining duha ka nasod ug kining duha ka yuta maakoa, ug mapanag-iya namo kining duha,’+ bisan pag si Jehova anaa niini, 11 ‘busa ingon nga ako buhi,’ miingon ang Soberanong Ginoong Jehova, ‘pakiglabotan ka nako sumala sa kasuko ug pagselos* nga imong gipakita tungod sa imong pagdumot kanila;+ ug ipaila nako ang akong kaugalingon kanila dihang hukman ka nako. 12 Unya ikaw mahibalo gayod nga ako, si Jehova, nakadungog sa tanang pagtamay nga imong gisulti batok sa kabukiran sa Israel dihang miingon ka, “Nahimo silang biniyaan ug gitugyan sila kanamo aron lamyon.”* 13 Ug misulti mo nga mapahitas-on batok kanako, ug daghan mog gisulti batok kanako.+ Nadungog nako kining tanan.’
14 “Kini ang giingon sa Soberanong Ginoong Jehova: ‘Ang tibuok yuta magsadya dihang himoon ka nakong awaaw. 15 Kay nagsadya ka dihang naawaaw ang panulondon sa panimalay ni Israel, ingon usab niana ang akong pagpakiglabot kanimo.+ Magun-ob ka, Oh kabukiran sa Seir, oo, ang tibuok Edom;+ ug sila makaila gayod nga ako si Jehova.’”