Jeremias

19 Kini ang giingon ni Jehova: “Lakaw ug pagpalit sa magkukulon ug tibod.+ Ubana ang pipila sa mga ansiyano sa katawhan ug ang pipila sa mga ansiyano sa mga saserdote, 2 ug adto sa Walog sa Anak ni Hinnom,+ nga anaa sa entrada sa Ganghaan sa mga Tipak sa Kulon. Ug imantala didto ang mga pulong nga akong isulti kanimo. 3 Isulti kini, ‘Paminawa ang pulong ni Jehova, kamong mga hari sa Juda ug mga molupyo sa Jerusalem. Kini ang giingon ni Jehova sa mga panon, ang Diyos sa Israel:

“‘“Hapit na kong magpahinabo ug katalagman niining dapita, ug si bisan kinsang makadungog bahin niini mahadlok gayod.* 4 Tungod kini kay mibiya sila kanako+ ug gihimo nila kining dapita nga dili na mailhan.+ Sila nagahalad dinhi alang sa ubang mga diyos, nga wala nila mailhi ug sa ilang mga katigulangan ug sa mga hari sa Juda, ug gipuno nila kining dapita sa dugo sa mga inosente.+ 5 Naghimo silag tag-as nga dapit ni Baal aron sunogon ang ilang mga anak sa kalayo ingong mga tibuok halad nga sinunog alang kang Baal,+ butang nga wala nako isugo o hisgoti ug nga wala gyod gani mosantop sa akong hunahuna.”’*+

6 “‘“Busa tan-awa! ang mga adlaw moabot,” miingon si Jehova, “dihang kining dapita dili na tawgong Topet o Walog sa Anak ni Hinnom kondili Walog sa Pagpatay.+ 7 Pakyason nako ang mga plano sa Juda ug sa Jerusalem niining dapita, ug akong ipahinabo nga sila mangapukan pinaagi sa espada atubangan sa ilang mga kaaway ug pinaagi sa kamot niadtong nagtinguha sa ilang kinabuhi. Ug ihatag nako ang ilang mga patayng lawas ingong pagkaon sa mga langgam sa kalangitan ug sa mga mananap sa yuta.+ 8 Ug himoon nako kining siyudara nga kahadlokan ug talamayon.* Ang matag usa nga moagi niini motutok sa kahadlok ug motamay tungod sa tanang hampak niini.+ 9 Ug ipahinabo nako nga kaonon nila ang unod sa ilang mga anak nga lalaki ug babaye, ug ang matag usa kanila mokaon sa unod sa ilang isigkatawo, tungod sa pag-atake ug sa ilang pagkadesperado kay nalikosan sila sa ilang mga kaaway ug niadtong nagtinguha sa ilang kinabuhi.”’+

10 “Unya buk-a ang tibod atubangan sa mga tawo nga mouban nimo, 11 ug ingna sila, ‘Kini ang giingon ni Jehova sa mga panon: “Ingon niini ang akong pagdugmok niini nga katawhan ug niini nga siyudad, sama sa usa nga nagdugmok sa sudlanan sa magkukulon mao nga kini dili na gyod maayo; ug ilubong nila ang mga patay didto sa Topet hangtod nga wala nay kalubngan kanila.”’+

12 “‘Ingon niana ang akong buhaton niining dapita,’ miingon si Jehova, ‘ug sa mga molupyo niini, aron himoon kining siyudara nga sama sa Topet. 13 Ug ang mga balay sa Jerusalem ug ang mga balay sa mga hari sa Juda mahimong hugaw sama niining dapita, ang Topet.+ Kay sila nagahalad diha sa mga atop alang sa tanang panon sa kalangitan+ ug nagabubo ug mga halad nga ilimnon alang sa ubang mga diyos.’”+

14 Dihang si Jeremias mibalik gikan sa Topet, diin siya gipadala ni Jehova aron managna, siya mitindog sa hawanan sa balay ni Jehova ug miingon sa tanang katawhan: 15 “Kini ang giingon ni Jehova sa mga panon, ang Diyos sa Israel, ‘Ania, ipahinabo nako niining siyudara ug sa tanang lungsod niini ang tanang katalagman nga akong gisulti batok niini, kay midumili gyod sila sa pagtuman* sa akong mga pulong.’”+