Ezequiel
37 Ang kamot ni Jehova anaa kanako, ug pinaagi sa iyang espiritu gidala ko ni Jehova ug gipahimutang sa taliwala sa patag,+ ug kini punog mga bukog. 2 Iya kong gipalibot niini nila, ug nakita nako nga dihay daghan kaayong bukog sa patag, ug sila uga kaayo.+ 3 Siya nangutana kanako: “Anak sa tawo, mabuhi pa ba kining mga bukoga?” Unya mitubag ko: “Soberanong Ginoong Jehova, ikaw ang nahibalo.”+ 4 Busa siya miingon kanako: “Panagna bahin niining mga bukoga, ug ingna sila, ‘Kamong uga nga mga bukog, patalinghogi ang pulong ni Jehova:
5 “‘Kini ang giingon sa Soberanong Ginoong Jehova niining mga bukoga: “Sudlan mo nakog gininhawa, ug kamo mabuhi.+ 6 Butangan mo nakog mga ugat ug unod, ug tabonan mo nakog panit ug sudlag gininhawa, ug kamo mabuhi; ug kamo makaila gayod nga ako si Jehova.”’”
7 Unya nanagna ko sumala sa gisugo kanako. Samtang nanagna ko dihay kabanha, dihay kinagilkil, ug ang mga bukog nagsumpaysumpay. 8 Unya nakita nako nga mitungha diha kanila ang mga ugat ug unod, ug ang panit mitabon kanila. Apan wala pa gihapon silay gininhawa.
9 Unya siya miingon kanako: “Panagna sa hangin. Panagna, anak sa tawo, ug ingna ang hangin, ‘Kini ang giingon sa Soberanong Ginoong Jehova: “Oh hangin,* ari diri gikan sa upat ka hangin,* ug huypi kining mga tawo nga gipatay, aron sila mabuhi.”’”
10 Busa nanagna ko sumala sa iyang gisugo kanako, ug ang gininhawa* misulod kanila, ug sila nabuhi ug nanindog,+ usa ka dako kaayong kasundalohan.
11 Unya siya miingon kanako: “Anak sa tawo, kining mga bukoga mao ang tibuok panimalay ni Israel.+ Ania sila nagaingon, ‘Ang among mga bukog uga, ug ang among paglaom nahanaw.+ Kami bug-os nga nabulag.’ 12 Busa panagna ug sultihi sila, ‘Kini ang giingon sa Soberanong Ginoong Jehova: “Ablihan nako ang inyong mga lubnganan+ ug bangonon mo nako gikan sa inyong mga lubnganan, akong katawhan, ug dad-on ngadto sa yuta sa Israel.+ 13 Ug kamo makaila gayod nga ako si Jehova dihang ablihan nako ang inyong mga lubnganan ug bangonon mo gikan sa inyong mga lubnganan, Oh akong katawhan.”’+ 14 ‘Ibutang nako kaninyo ang akong espiritu ug kamo mabuhi,+ ug ipahimutang mo nako sa inyong yuta; ug kamo makaila gayod nga ako, si Jehova, ang nagsulti ug gihimo nako kini,’ miingon si Jehova.”
15 Nakadawat na usab kog mensahe gikan kang Jehova, nga nag-ingon: 16 “Ug ikaw, anak sa tawo, pagkuhag estik ug isulat kini niini, ‘Alang sa Juda ug sa katawhan sa Israel nga uban kaniya.’*+ Unya pagkuhag laing estik ug isulat kini niini, ‘Alang kang Jose, ang estik ni Epraim, ug sa tibuok panimalay ni Israel nga uban kaniya.’*+ 17 Unya itapo kining duha aron mahimo kining usa na lang ka estik sa imong kamot.+ 18 Dihang moingon ang imong katawhan* kanimo, ‘Dili ba mi nimo sultihan kon unsay gipasabot niining mga butanga?’ 19 ingna sila, ‘Kini ang giingon sa Soberanong Ginoong Jehova: “Kuhaon nako ang estik ni Jose, nga anaa sa kamot ni Epraim, ug ang mga tribo sa Israel nga uban kaniya, ug itapo nako sila sa estik ni Juda; ug himoon nako silang usa ka estik,+ ug sila mahimong usa diha sa akong kamot.”’ 20 Ang mga estik nga imong sulatan kinahanglang diha sa imong kamot aron ilang makita.
21 “Unya sultihi sila, ‘Kini ang giingon sa Soberanong Ginoong Jehova: “Kuhaon nako ang mga Israelinhon gikan sa kanasoran diin sila miadto, ug tigomon nako sila gikan sa tanang direksiyon ug dad-on sa ilang yuta.+ 22 Himoon nako silang usa ka nasod diha sa yuta,+ sa kabukiran sa Israel, ug usa ka hari ang magmando kanilang tanan,+ ug dili na sila duha ka nasod; dili na usab sila mabahin sa duha ka gingharian.+ 23 Dili na nila hugawan ang ilang kaugalingon pinaagi sa ilang makaluod nga mga idolo* ug dulumtanang mga buhat ug sa tanan nilang kalapasan.+ Luwason nako sila gikan sa tanan nilang pagkadili-matinumanon nga maoy hinungdan nga sila nakasala, ug hinloan nako sila. Sila mahimong akong katawhan, ug ako mahimong ilang Diyos.+
24 “‘“Ang akong alagad nga si David ang mahimo nilang hari,+ ug usa lang ang magbalantay+ nilang tanan. Mosubay sila sa akong hudisyal nga mga hukom ug tumanon gayod nila ang akong mga lagda.+ 25 Sila mopuyo sa yuta nga gihatag nako sa akong alagad, kang Jacob, diin nagpuyo ang inyong mga katigulangan,+ ug sila mopuyo niana hangtod sa hangtod,+ sila ug ang ilang mga anak* ug ang mga anak sa ilang mga anak;+ ug si David nga akong alagad mahimong ilang pangulo* hangtod sa hangtod.+
26 “‘“Ug maghimo kog pakigsaad sa pakigdait uban kanila;+ kini mahimong walay kataposang pakigsaad uban kanila. Ipahiluna nako sila ug padaghanon+ ug ibutang nako ang akong sangtuwaryo sa ilang taliwala hangtod sa hangtod. 27 Ang akong tolda* maanaa uban* kanila, ug ako mahimong ilang Diyos, ug sila mahimong akong katawhan.+ 28 Ug ang kanasoran mahibalo gayod nga ako, si Jehova, nagabalaan sa Israel dihang ang akong sangtuwaryo anaa sa ilang taliwala hangtod sa hangtod.”’”+