Jeremias

24 Unya gipakitaan ko ni Jehova ug duha ka bukag nga igos diha sa atubangan sa templo ni Jehova, human gidestiyero ni Haring Nabucodonosor* sa Babilonya si Jeconias*+ nga anak ni Jehoiakim,+ ang hari sa Juda, uban ang mga prinsipe sa Juda, ang mga artesano,* ug ang mga tigpanday ug metal;* iyang gidala sila gikan sa Jerusalem ngadto sa Babilonya.+ 2 Ang mga igos sa usa ka bukag maayo kaayo, sama sa unang hinog nga mga igos, apan ang mga igos sa usa pa ka bukag daot kaayo, daot kaayo nga dili na makaon.

3 Unya si Jehova nangutana kanako: “Unsay imong nakita, Jeremias?” Busa mitubag ko: “Mga igos; ang maayong mga igos maayo kaayo, apan ang daot nga mga igos daot kaayo, daot kaayo nga dili na makaon.”+

4 Unya nadawat nako ang mensahe ni Jehova, nga nag-ingon: 5 “Kini ang giingon ni Jehova nga Diyos sa Israel, ‘Sama niining maayong mga igos, pakitaan usab nakog kaayo ang mga destiyero sa Juda, nga akong gipapahawa gikan niining dapita ngadto sa yuta sa mga Caldeanhon. 6 Ang akong mata magtan-aw kanila alang sa ilang kaayohan, ug ipahinabo nako nga mobalik sila niining yutaa.+ Tukoron nako sila ug dili lumpagon; itanom nako sila ug dili lukahon.+ 7 Ug hatagan nako silag kasingkasing nga andam moila kanako, nga ako mao si Jehova.+ Sila mahimong akong katawhan, ug ako mahimong ilang Diyos,+ kay sila mobalik kanako sa bug-os nilang kasingkasing.+

8 “‘Apan bahin sa daot nga mga igos nga dili na makaon kay daot kaayo,+ kini ang giingon ni Jehova: “Ingon usab niana ang akong himoon kang Haring Zedekias+ sa Juda, sa iyang mga prinsipe, ug sa mga nahibilin sa Jerusalem nga ania niining yutaa ug nagpuyo sa yuta sa Ehipto.+ 9 Ipahinabo nako nga ang tanang gingharian sa yuta mangahadlok tungod sa katalagman nga akong ipahinabo kanila.+ Sila tamayon, biaybiayon,* yagayagaan, ug tunglohon+ sa tanang dapit diin nako sila patibulaagon.+ 10 Ug ipadala nako batok kanila ang espada,+ gutom, ug kamatay,*+ hangtod nga sila malaglag sa yuta nga akong gihatag kanila ug sa ilang mga katigulangan.”’”