Nehemias
5 Apan dihay mga lalaki uban sa ilang mga asawa nga mireklamo bahin sa ilang mga igsoong Hudiyo.+ 2 Ang pipila miingon: “Daghan mig anak nga lalaki ug babaye. Nagkinahanglan mig lugas aron makakaon ug mabuhi.” 3 Ang uban miingon: “Gigarantiya namo ang among mga uma, ubasan, ug mga balay aron makabaton mig lugas sa panahon nga nihit ang pagkaon.” 4 Ug dihay miingon: “Giprenda namo ang among mga uma ug ubasan aron makabayad mig buhis* sa hari.+ 5 Kami ug ang among kaigsoonan pareho ra man untang mga Hudiyo, ang among mga anak pareho ra sa ilang mga anak. Apan kinahanglan namong ipaulipon kanila ang among mga anak, gani ang uban namong anak nga babaye nahimo nang ulipon.+ Wala miy mahimo kay ang among mga uma ug ubasan gipanag-iya na sa uban.”
6 Pagkadungog nako niini, nasuko ko pag-ayo. 7 Gipamalandong nako kini, ug akong nakita nga daotan ang gihimo sa mga halangdon ug sa mga opisyal. Busa giingnan nako sila: “Inyong gipatuboan* ang utang sa inyong mga igsoon.”+
Unya nagpatawag kog dakong tigom aron sulbaron ang problema. 8 Ug giingnan nako sila: “Gipaningkamotan namog maayo nga malukat ang atong mga igsoong Hudiyo nga gibaligya ngadto sa kanasoran. Karon ibaligya na ba hinuon ninyo ang inyong mga igsoon,+ ug unya lukaton na sab namo sila?” Niini sila wala makatingog ug walay ikasulti. 9 Dayon ako miingon: “Dili maayo ang inyong gibuhat. Dili ba angay mong magpakitag kahadlok sa atong Diyos+ aron dili ta tamayon sa kanasoran, sa atong mga kaaway? 10 Kami sa akong mga igsoon ug mga tig-alagad nagpahulam sab ug salapi ug mga lugas, apan walay tubo. Palihog, undanga ninyo ang pagpahulam nga may tubo.+ 11 Palihog, iuli karon mismong adlawa ang ilang mga uma,+ ubasan, kaolibohan, ug ang ilang mga balay, ingon man ang ikausa ka gatos* nga bahin sa salapi, lugas, bag-ong bino, ug lana nga inyong gipangayo kanila ingong tubo.”
12 Niini sila miingon: “Iuli namo kini, ug dili na mi maningil nila. Buhaton namo ang tanan nimong gisulti.” Busa akong gipatawag ang mga saserdote ug gipapanumpa kadtong mga tawhana nga tumanon kini nga saad. 13 Unya giyabyab nako ang akong besti* ug miingon: “Hinaot iyabyab sab sa matuod nga Diyos ang balay ug mga katigayonan niadtong dili motuman niini nga saad, ug wala gyoy mabilin kaniya.” Dayon ang tanan diha sa kongregasyon miingon: “Amen!”* Ug gidayeg nila si Jehova ug gituman ang ilang saad.
14 Sulod sa 12 ka tuig nga natudlo ko ingong gobernador+ sa Juda, gikan sa ika-20 nga tuig+ hangtod sa ika-32 nga tuig+ sa pagmando ni Haring Artajerjes,+ ako o ang akong mga igsoon wala mokaon sa pagkaon nga gitagana para sa gobernador.+ 15 Apan ang mga gobernador nga nauna kanako nagpabug-at sa katawhan ug nangolektag 40 ka siklo* nga plata* para sa pagkaon ug bino kada adlaw. Ang ilang mga tig-alagad nagdaogdaog sab sa katawhan. Apan wala nako kana buhata+ kay naa koy kahadlok sa Diyos.+
16 Gawas pa, ako ug ang akong mga tig-alagad mitabang sa pagtukod sa paril, ug wala miy gikuha nga uma.+ 17 Dunay 150 ka Hudiyo ug mga opisyal nga mokaon uban kanako, gawas pa niadtong nanganhi gikan sa ubang nasod. 18 Kada adlaw magpaihaw kog usa ka torong baka, unom ka tambok nga karnero, ug mga langgam. Kausa sa matag 10 ka adlaw, mag-andam kog lainlaing matang sa bino. Bisan pa niana, wala ko mangayog pagkaon nga para sa gobernador kay nahibalo ko nga bug-at na ang ilang ginahimo nga pag-alagad. 19 Ug miampo ko: “Oh Diyos ko, hinaot imong hinumdoman ug panalanginan ang tanan nakong gibuhat para niini nga katawhan.”+