Nehemias
6 Pagkahibalo ni Sanbalat, Tobias,+ Gesem nga Arabiano,+ ug sa uban namong kaaway nga akong natukod pag-usab ang paril+ ug wala nay kal-ang niana (bisag wala pa mataod ang pultahan sa mga ganghaan),+ 2 si Sanbalat ug Gesem nagpadala dayon niini nga mensahe: “Anhi dinhi, magkita ta sa usa sa mga baryo sa Kapatagan sa Ono.”+ Apan may daotan silang plano kanako. 3 Busa nagpadala kog mga mensahero kanila, nga nag-ingon: “Daghan kog trabaho, dili ko makalugsong. Kon moanha ko, mahunong ang trabaho.” 4 Kaupat nila gipadala ang samang mensahe, apan mao ra gihapon ang akong tubag.
5 Sa ikalimang higayon, gipadala ni Sanbalat sa iyang tig-alagad ang mao gihapong mensahe, ug nagdala kinig bukas nga sulat. 6 Kini mabasa: “Nabaniog na sa mga nasod nga ikaw ug ang mga Hudiyo nagplanong morebelde,+ ug mao sab ni ang giingon ni Gesem.+ Mao diay nga imong gitukod ang paril. Ug sumala sa balita, ikaw ang mahimo nilang hari. 7 Nagtudlo pa kuno kag mga propeta* nga maoy moproklamar nimo sa tibuok Jerusalem, nga nag-ingon, ‘Duna nay hari ang Juda!’ Ug seguradong mabalitaan kini sa atong hari. Busa anhi dinhi, ug ato kining estoryahan.”
8 Apan kini ang akong gipadalang tubag kaniya: “Dili tinuod ang imong gipanulti, inimbento ra na nimo.” 9 Kay ginahadlok mi nila, ug sila nagaingon: “Ang ilang mga kamot manghawoy sa pagtrabaho, ug dili nila kana mahuman.”+ Dayon miampo ko: “Oh Diyos, lig-ona ang akong mga kamot.”+
10 Samtang si Semaias nga anak ni Delaias nga anak ni Mehetabel nagtago sa iyang balay, giadto nako siya. Siya miingon: “Magkita ta sa balay sa matuod nga Diyos, sa sulod sa templo, ug atong sirhan ang mga pultahan niini. Kay inigkagabii, sila mangabot sa pagpatay kanimo.” 11 Apan ako mitubag: “Ako nga gobernador moikyas? Makasulod ba ko sa templo nga dili silotag kamatayon?+ Di ko mosulod!” 12 Akong nasabtan nga wala siya sugoa sa Diyos, apan gisuholan siya ni Tobias ug Sanbalat+ aron managna batok kanako. 13 Gisuholan siya aron hadlokon ko ug makahimog sala. Sa ingon, madaot nila ang akong dungog ug ila kong mapakaulawan.
14 Oh Diyos ko, ayaw palabya ang gibuhat ni Tobias+ ug Sanbalat, ug sa babayeng propeta nga si Noadias ug sa ubang propeta nga nagsigeg panghadlok nako.
15 Ang paril nahuman sa ika-25 nga adlaw sa Elul,* sulod sa 52 ka adlaw.
16 Dihang nahibaloan kini sa tanan namong kaaway ug nakita kini sa palibot nga mga nasod, sila naulaw pag-ayo,*+ ug naamgohan nila nga nahuman namo ang paril tungod sa tabang sa among Diyos. 17 Niadtong panahona ang mga halangdon+ sa Juda nagpadalag daghang sulat kang Tobias, ug iya kanang gitubag. 18 Daghan sa Juda ang nanumpa nga modapig kaniya, kay siya umagad ni Secanias nga anak ni Arah,+ ug ang iyang anak nga si Jehohanan naminyo sa anak nga babaye ni Mesulam+ nga anak ni Berekias. 19 Kanunay sab ko nilang sultihan ug maayong mga butang bahin kaniya, unya ilang itug-an kaniya ang akong isulti. Dayon si Tobias magpadalag mga sulat aron hadlokon ko.+