Ezequiel
6 Nakadawat ko pag-usab ug mensahe gikan kang Jehova, nga nag-ingon: 2 “Anak sa tawo, ipaatubang ang imong nawong sa kabukiran sa Israel ug panagna batok kanila. 3 Isulti kini, ‘Oh kabukiran sa Israel, pamati sa pulong sa Soberanong Ginoong Jehova: Kini ang giingon sa Soberanong Ginoong Jehova ngadto sa kabukiran, kabungtoran, kasapaan, ug kawalogan: “Tan-awa! Magdala kog espada batok kaninyo, ug laglagon nako ang inyong tag-as nga dapit. 4 Ang inyong mga halaran panggub-on, ang inyong mga tungtonganan sa insenso mangahugno,+ ug ang inyong mga patay ipanglabay nako atubangan sa inyong makaluod nga mga idolo.*+ 5 Ilabay nako ang mga patayng lawas sa katawhan sa Israel atubangan sa ilang makaluod nga mga idolo, ug ikatag nako ang inyong mga bukog libot sa inyong mga halaran.+ 6 Diha sa tanang dapit diin mo nagpuyo, ang mga siyudad magun-ob+ ug ang tag-as nga dapit malumpag ug mahimong biniyaan.+ Ang inyong mga halaran magun-ob ug matumpag, ang inyong makaluod nga mga idolo mangahanaw, ang inyong mga tungtonganan sa insenso mangaputol, ug ang inyong mga buhat mangawagtang. 7 Ug kadtong mga pinatay mangapukan sa inyong taliwala,+ ug kamo makaila gayod nga ako si Jehova.+
8 “‘“Apan ipahinabo nako nga dunay mabilin, kay ang uban kaninyo makaikyas sa espada taliwala sa kanasoran dihang mangatibulaag mo sa kayutaan.+ 9 Ug kadtong makaikyas mahinumdom kanako taliwala sa kanasoran diin sila gidala ingong binihag.+ Makaamgo sila nga nasakitan ko tungod sa ilang maluibon* nga kasingkasing nga mibulag kanako+ ug sa ilang mga mata nga nagtinguha pag-ayo* sa ilang makaluod nga mga idolo.+ Maulaw sila ug lud-on sa tanang daotan ug dulumtanan nga butang nga ilang nahimo.+ 10 Makaila gayod sila nga ako si Jehova ug nga ang katalagman nga gisulti nako nga ipadala kanila mahitabo gayod.”’+
11 “Kini ang giingon sa Soberanong Ginoong Jehova: ‘Ipakpak ang imong mga kamot ug ibundak ang imong tiil ug pagbangotan tungod sa tanang daotan ug dulumtanan nga butang nga nahimo sa panimalay ni Israel, kay sila mapukan pinaagi sa espada, gutom, ug kamatay.+ 12 Kadtong atua sa layo mamatay tungod sa kamatay, ug kadtong anaa sa duol mapukan pinaagi sa espada, ug kadtong nakaikyas niini ug nahibilin mamatay sa gutom; ug bug-os nakong ipahungaw ang akong kasuko kanila.+ 13 Ug sila makaila gayod nga ako si Jehova,+ dihang ang ilang mga patay magbuy-od taliwala sa ilang makaluod nga mga idolo, libot sa ilang mga halaran,+ diha sa matag taas nga bungtod, sa tanang tumoy sa kabukiran, sa ilalom sa matag labong nga kahoy, ug sa ilalom sa mga sanga sa dagkong kahoy diin sila nagtanyag ug humot nga mga halad aron pahimut-an ang tanan nilang makaluod nga idolo.+ 14 Ituy-od nako ang akong kamot batok kanila ug himoon nakong awaaw ang yuta, ug ang tanan nilang puloy-anang dapit mahimong mas awaaw kay sa kamingawan duol sa Dibla. Ug sila makaila gayod nga ako si Jehova.’”