Isaias
16 Pagpadala mog laking karnero ngadto sa magmamando sa yuta,
Gikan sa Sela latas sa kamingawan
Ngadto sa bukid sa anak nga babaye sa Zion.
2 Samag langgam nga giabog sa salag niini,+
Mao usab ang mahitabo sa mga anak nga babaye sa Moab sa mga tabokanan sa suba sa Arnon.+
3 “Paghatag ug tambag, ipatuman ang desisyon.
Himoa ang imong landong sa udtong tutok nga sama sa kagabhion.
Tagoi ang mga nangatibulaag ug ayawg budhii kadtong mga nangalagiw.
4 Hinaot nga ang akong mga nangatibulaag mopuyo kanimo, Oh Moab.
Mahimo kang tagoanang dapit alang kanila tungod sa tiglaglag.+
Ang tigdaogdaog modangat sa iyang kataposan,
Ang kalaglagan matapos,
Ug kadtong mga nagyatak sa uban mahanaw sa yuta.
5 Unya ang usa ka trono lig-ong matukod pinaagi sa maunongong gugma.
Ang usa nga molingkod niana sa tolda ni David magmatinumanon;+
Siya maghukom nga walay pagpihigpihig ug magpahamtang dayon sa pagkamatarong.”+
6 Nakadungog mi bahin sa garbo sa Moab—siya garboso kaayo+—
Ang iyang pagkamapahitas-on ug ang iyang garbo ug ang iyang mabangis nga kasuko;+
Apan walay pulos ang iyang pagpanghambog.
Kadtong mga gihampak modanguyngoy alang sa mga tinapay nga pasas sa Kir-hareset.+
Ang mga magmamando sa kanasoran nagyatak sa mga sanga niini nga dan-ag-pula;*
Sila nakaabot hangtod sa Jazer;+
Sila nakaabot hangtod sa kamingawan.
Ang mga salingsing niini mikatay ug nakaabot hangtod sa dagat.
9 Mao nga mohilak ko tungod sa punoan sa ubas sa Sibma sama sa akong paghilak alang sa Jazer.
Pinaagi sa akong mga luha humdon ka nako, Oh Hesbon ug Eleale,+
Kay ang pagsinggit alang sa imong bunga sa ting-init ug sa imong inani natapos na.*
10 Ang pagsadya ug paglipay gikuha gikan sa prutasan,
Ug walay awit sa kalipay o pagsinggit diha sa mga ubasan.+
Ang tigtamak wala na magtamaktamak ug mga ubas diha sa mga pug-anan,
Kay gipahunong na nako ang pagsinggit.+
11 Mao nga ang akong kahiladman nangurog tungod sa Moab,+
Sama sa pagkaskas sa mga kuwerdas sa alpa,
Ug ang akong kinasuloran tungod sa Kir-hareset.+
12 Bisag hagoon sa Moab ang iyang kaugalingon diha sa taas nga dapit ug moadto sa iyang sangtuwaryo aron moampo, kana walay kapuslanan.+
13 Kini ang pulong nga gisulti ni Jehova kaniadto bahin sa Moab. 14 Ug karon si Jehova miingon: “Sulod sa tulo ka tuig, sama sa mga tuig sa sinuholang trabahante,* ang himaya sa Moab mapakaulawan ug kini makaagom sa tanang matang sa kagubot, ug kadtong mga mahibilin diyutay na lang kaayo ug huyang.”+