Job
23 Si Job mitubag:
2 “Niining adlawa iinsistir gihapon nako ang akong reklamo;*+
Ako naluya pag-ayo tungod sa akong pagpanghupaw.
3 Kon nahibalo pa lang unta ko kon asa makaplagan ang Diyos!+
Moadto gyod ko sa iyang gipuy-an.+
4 Akong ipresentar ang akong kaso sa iyang atubangan
Ug pun-on nako ang akong baba ug mga argumento;
5 Akong sayron kon unsaon ko niya pagtubag
Ug akong matikdan kon unsay iyang isulti kanako.
6 Gamiton ba niya ang iyang dakong gahom sa pagpakigtigi kanako?
Dili! Seguradong maminaw siya kanako.+
7 Didto ang matul-id makighusay kaniya,
Ug hukman ko sa akong Maghuhukom ingong dili sad-an.
8 Apan kon moadto ko sa sidlakan, siya wala didto;
Ug kon moadto ko sa kasadpan, siya dili nako makaplagan.
9 Dihang siya magtrabaho diha sa wala, ako dili makakita kaniya;
Unya siya moliso sa tuo, apan ako dili gihapon makakita kaniya.
10 Apan siya nahibalo pag-ayo sa dalan nga akong giagian.+
Human niya ako masulayan, ako mahimong purong bulawan.+
12 Gituman gayod nako ang sugo sa iyang mga ngabil.
Gitipigan nako ang iyang mga pulong+ labaw pa kay sa iyang gipangayo kanako.
13 Kon determinado gyod siya, kinsay makapugong kaniya?+
Kon duna siyay gustong buhaton, iya kanang buhaton.+
14 Kay bug-os niyang buhaton kon unsay iyang katuyoan* alang kanako,
Ug daghan pa siyag katuyoan nga sama niini.
15 Mao nga ako natugaw tungod kaniya;
Dihang maghunahuna ko niya, mosamot ang akong kahadlok.
16 Gihimo ko sa Diyos nga talawan,
Ug gihadlok ko sa Labing Gamhanan.
17 Apan ako wala pa mapahilom sa kangitngit
O sa kangiob nga mitabon sa akong nawong.