Unang Cronicas

11 Unya ang tanang Israelinhon miadto kang David sa Hebron+ ug miingon: “Tan-awa! Mga kadugo mi nimo.*+ 2 Sa una, dihang si Saul pa ang hari, ikaw ang nanguna sa Israel sa pagpakiggubat.*+ Ug si Jehova nga imong Diyos miingon kanimo: ‘Ikaw magbantay sa Israel nga akong katawhan, ug ikaw mahimong pangulo sa Israel nga akong katawhan.’”+ 3 Busa ang tanang ansiyano sa Israel miadto sa hari didto sa Hebron, ug si David nakigsaad kanila sa Hebron sa atubangan ni Jehova. Unya ilang gidihogan si David ingong hari sa Israel,+ sumala sa pulong ni Jehova pinaagi kang Samuel.+

4 Sa ulahi si David ug ang tibuok Israel misulong sa Jerusalem, nga mao, ang Jebus,+ diin mga Jebusihanon+ ang nagpuyo. 5 Ang mga molupyo sa Jebus mibiaybiay kang David: “Dili gyod ka makasulod dinhi!”+ Apan nailog ni David ang kuta sa Zion,+ nga mao na karon ang Siyudad ni David.+ 6 Busa si David miingon: “Ang unang mosulong sa mga Jebusihanon mahimong pangulo ug prinsipe.” Ug si Joab+ nga anak ni Zeruia maoy unang miadto, ug siya ang nahimong pangulo. 7 Unya si David mipuyo didto sa kuta. Kanay hinungdan nga gitawag nila kini nga Siyudad ni David. 8 Siya nagtukod ug mga paril ug ubang tinukod diha sa siyudad, gikan sa Bungdo* ngadto sa mga dapit palibot niini, ug giayo ni Joab ang ubang bahin sa siyudad. 9 Ug si David nag-anam ka bantog,+ ug si Jehova sa mga panon* nag-uban kaniya.

10 Karon mao kini ang mga pangulo sa banggiitang mga manggugubat ni David, nga lig-ong misuportar sa iyang pagkahari uban sa tibuok Israel, aron himoon siyang hari sumala sa pulong ni Jehova maylabot sa Israel.+ 11 Mao kini ang listahan sa banggiitang mga manggugubat ni David: si Jasobeam+ nga anak sa usa ka Hakmonhon, ang pangulo sa tulo ka banggiitang manggugubat.+ Sa usa ka higayon, iyang gipatay ang 300 ka tawo gamit ang iyang bangkaw.+ 12 Sunod kaniya mao si Eleasar+ nga anak ni Dodo nga Ahohihanon.+ Usa siya sa tulo ka banggiitang manggugubat. 13 Kauban siya ni David sa Pas-damim,+ diin ang mga Filistehanon nagtigom alang sa gubat. Karon didtoy uma nga punog sebada, ug ang mga sundalo nangalagiw tungod sa mga Filistehanon. 14 Apan siya mibarog sa tunga sa uma ug gipanalipdan kini ug iyang gipamatay ang mga Filistehanon, mao nga si Jehova nagpahinabog dakong kadaogan.*+

15 Ang tulo sa 30 ka pangulo nanglugsong ngadto sa bato, ngadto kang David sa langob sa Adulam,+ samtang may Filistehanong kasundalohan nga nagkampo sa Walog* sa Repaim.+ 16 Niadtong tungora, si David didto sa iyang dangpanan, ug diha poy mga Filistehanon sa Betlehem nga nagbantay. 17 Unya si David gihidlaw ug miingon: “Kon makainom lang gyod unta kog tubig gikan sa gahong nga pondohanag tubig duol sa ganghaan sa Betlehem!”+ 18 Busa ang tulo misulod sa kampo sa mga Filistehanon ug nagkalos ug tubig gikan sa gahong nga pondohanag tubig duol sa ganghaan sa Betlehem ug gidala kini ngadto kang David, apan wala kini imna ni David. Iya hinuon kining gibubo sa atubangan ni Jehova. 19 Siya miingon: “Dili ko makaako sa pagbuhat niini tungod sa akong kahadlok sa Diyos! Imnon ba nako ang dugo niining mga tawhana nga nagpameligro sa ilang kinabuhi?+ Kay sa ilang pagkalos niini ilang gipameligro ang ilang kinabuhi.” Busa wala niya kini imna. Mao kini ang gibuhat sa iyang tulo ka banggiitang manggugubat.

20 Si Abisai+ nga igsoon ni Joab+ mao ang pangulo sa lain pang tulo; iyang gipamatay ang 300 ka tawo gamit ang iyang bangkaw, ug siya dunay dungog nga sama sa unang tulo.+ 21 Sa laing tulo, siya mas inila kay sa duha, ug siya ang ilang pangulo; apan siya wala makabaton sa ranggo sa unang tulo.

22 Si Benaias+ nga anak ni Jehoiada maoy isog nga tawo* nga nakahimog daghang talagsaong buhat didto sa Kabzeel.+ Iyang gipatay ang duha ka anak ni Ariel nga taga-Moab, ug siya nanaog sa usa ka gahong sa tubig sa adlaw nga nag-ulan ug niyebe ug gipatay ang usa ka leyon.+ 23 Gipatay usab niya ang usa ka Ehiptohanon nga talagsaon ang gidak-on​—kapig pito ka piye* ang gitas-on.+ Bisag ang Ehiptohanon nagkupot ug bangkaw nga samag likisan sa mga tighablon,+ siya nakigharong kaniya nga nagdalag sungkod ug iyang giilog ang bangkaw sa Ehiptohanon ug gipatay siya gamit ang kaugalingong bangkaw niini.+ 24 Kini ang gibuhat ni Benaias nga anak ni Jehoiada, ug siya dunay dungog nga sama sa tulo ka banggiitang manggugubat. 25 Bisan kon siya mas inila kay sa 30, siya wala makabaton sa ranggo sa unang tulo.+ Apan gihimo siya ni David nga pangulo sa iyang mga bantay.

26 Ang banggiitang mga manggugubat sa kasundalohan mao si Asahel+ nga igsoon ni Joab, si Elhanan nga anak ni Dodo nga taga-Betlehem,+ 27 si Samot nga Harornon, si Helez nga Pelonhon, 28 si Ira+ nga anak ni Ikes nga Tekoahanon, si Abi-ezer+ nga taga-Anatot, 29 si Sibecai+ nga Husahanon, si Ilai nga Ahohihanon, 30 si Maharai+ nga Netopahanon, si Heled+ nga anak ni Baana nga Netopahanon, 31 si Itai nga anak ni Ribai nga taga-Gibea sa mga Benjaminhon,+ si Benaias nga Piratonhon, 32 si Hurai gikan sa mga walog* sa Gaas,+ si Abiel nga Arbatnon, 33 si Azmavet nga Baharumnon, si Eliaba nga Saalbonhon, 34 ang mga anak ni Hasem nga Gizonhon, si Jonatan nga anak ni Sage nga Hararnon, 35 si Ahiam nga anak ni Sacar nga Hararnon, si Elipal nga anak ni Ur, 36 si Heper nga Mekerathanon, si Ahias nga Pelonhon, 37 si Hezro nga Carmelohanon, si Naarai nga anak ni Ezbai, 38 si Joel nga igsoon ni Natan, si Mibhar nga anak ni Hagri, 39 si Zelek nga Ammonhanon, si Naharai nga Berotnon, nga tigdala sa hinagiban ni Joab nga anak ni Zeruia; 40 si Ira nga Itrihanon, si Gareb nga Itrihanon, 41 si Urias+ nga Hitihanon, si Zabad nga anak ni Alai, 42 si Adina nga anak ni Siza nga Rubenhon, usa ka pangulo sa mga Rubenhon, ug dihay 30 nga kauban niya; 43 si Hanan nga anak ni Maaca, si Josapat nga Mitnihanon, 44 si Uzia nga Astarotnon, si Sama ug Jeiel nga mga anak ni Hotam nga Aroernon; 45 si Jediael nga anak ni Simri, ug si Joha nga iyang igsoon nga Tizihanon; 46 si Eliel nga Mahavihanon, si Jeribai ug si Josavia nga mga anak ni Elnaam, ug si Itma nga Moabihanon; 47 si Eliel, Obed, ug si Jaasiel nga Mezobahanon.