Jeremias
Mohilak gyod ko adlaw ug gabii
Alang sa mga gipatay taliwala sa akong katawhan.
2 Oh kon duna lang unta koy abtanan alang sa magpapanaw diha sa kamingawan!
Biyaan gyod nako ang akong katawhan ug mopahilayo kanila,
Kay silang tanan mga mananapaw,+
Usa ka katawhan nga maluibon.
3 Gibawog nila ang ilang dila samag busogan;
Kaylap ang kabakakan sa yuta, dili ang pagkamatinumanon.+
“Nagkagrabe ang ilang pagkadaotan,
Ug wala ko nila panumbalinga,”+ miingon si Jehova.
4 “Pagbantay mong tanan sa inyong isigkatawo,
Ug ayaw mog salig bisan sa inyong igsoon.
5 Ang matag usa naglimbong sa iyang isigkatawo,
Ug walay nagsultig tinuod.
Gitudloan nila ang ilang dila nga mosultig kabakakan.+
Gihago nila ang ilang kaugalingon sa pagbuhat ug daotan.
6 Nagpuyo ka taliwala sa panglimbong.
Pinaagi sa panglimbong, sila dili moila kanako,” miingon si Jehova.
7 Busa kini ang giingon ni Jehova sa mga panon:
“Tunawon nako sila aron lunsayon sila ug sulayan sila,+
Kay unsa pa may akong mahimo sa anak nga babaye sa akong katawhan?
8 Ang ilang dila maoy makamatay nga udyong nga nagsultig panglimbong.
Pinaagi sa iyang baba, ang tawo nagsultig pakigdait sa iyang isigkatawo,
Apan sa iyang kasingkasing siya nagplanong moatake.”
9 “Dili ba angay nako silang papanubagon tungod niining mga butanga?” miingon si Jehova.
“Dili ba angay kong manimalos sa maong nasod?+
10 Ako mohilak ug magminatay tungod sa kabukiran
Ug moawit ug awit sa pagbangotan tungod sa mga sibsibanan sa kamingawan,
Kay kini gisunog aron walay tawong moagi,
Ug ang tingog sa kahayopan wala madungog.
Ang mga langgam sa langit ug ang mga mananap nangalagiw; sila nangahanaw.+
11 Ang Jerusalem himoon nakong tinapok nga mga bato+ ug puy-anan sa mga irong ihalas,+
Ug ang mga siyudad sa Juda himoon nakong awaaw, nga wala nay mamuyo.+
12 Kinsa ang maalamon nga makasabot niini?
Kang kinsa nakigsulti si Jehova, aron iya kining ikapahayag?
Nganong ang yuta nalaglag?
Nganong kini napagba sama sa kamingawan,
Mao nga walay nagaagi niini?”
13 Si Jehova mitubag: “Kay ilang gisalikway ang akong balaod* nga akong gihatag kanila, ug kay sila wala motuman niini ug wala mamati sa akong tingog. 14 Sila wala mopatuo ug misunod hinuon sa kaugalingon nilang kasingkasing,+ ug sila misimba sa mga larawan ni Baal, sumala sa gitudlo kanila sa ilang mga amahan.+ 15 Busa kini ang giingon ni Jehova sa mga panon, ang Diyos sa Israel, ‘Ania, pakaonon nakog ajenjo* kini nga katawhan ug paimnon ug tubig nga dunay hilo.+ 16 Patibulaagon nako sila taliwala sa kanasoran nga wala nila mailhi ug sa ilang mga amahan,+ ug padad-an nako silag espada nga maggukod kanila hangtod nga mapuo nako sila.’+
17 Kini ang giingon ni Jehova sa mga panon,
‘Pamalandonga kon unsay nagakahitabo.
Ipatawag ang mga babayeng nagaawit ug awit sa pagbangotan,+
Ug pasugoi ang hanas nga mga babaye aron sila manganhi,
18 Aron sila magdali ug magminatay alang kanato,
Aron ang atong mga mata magpadagayday ug mga luha
Ug ang tabontabon sa atong mga mata magpadaligdig ug tubig.+
19 Kay ang tingog sa pagminatay nadungog gikan sa Zion:+
“Nalaglag gyod ta!
Naulawan gyod ta pag-ayo!
Kay atong gibiyaan ang yuta, ug ilang gipangguba ang atong mga balay.”+
20 Kamong mga babaye, pamati sa pulong ni Jehova.
Hinaot nga dawaton ninyo ang iyang gisulti.
Itudlo sa inyong mga anak nga babaye kini nga pagminatay,
Ug tudloi ninyo ang usag usa niini nga awit sa pagbangotan.+
21 Kay ang kamatayon miabot agi sa atong mga bentana;
Kini misulod sa atong lig-ong mga torre
Aron kuhaon ang mga bata sa kadalanan
Ug ang batan-ong mga lalaki sa mga plasa.’+
22 Isulti kini, ‘Kini ang giingon ni Jehova:
“Ang mga patayng lawas sa katawhan mangakatag samag kinalibang diha sa nawong sa yuta,
Samag lumbay sa bag-ong ginalab nga uhay sa luyo sa mangangani,
Ug walay usa nga magtigom niini.”’”+
23 Kini ang giingon ni Jehova:
“Dili angayng manghambog ang maalamong tawo sa iyang kaalam;+
Dili angayng manghambog ang gamhanang tawo sa iyang pagkagamhanan;
Ug dili angayng manghambog ang datong tawo sa iyang bahandi.”+
24 “Apan kon ang usa manghambog papanghamboga siya niini:
Nga siya dunay lawom nga pagsabot ug kahibalo bahin kanako,+
Nga ako si Jehova, ang Usa nga nagapakitag maunongong gugma, hustisya, ug pagkamatarong diha sa yuta,+
Kay malipay ko niining mga butanga,”+ miingon si Jehova.
25 “Tan-awa! Ang mga adlaw moabot,” miingon si Jehova, “ug akong papanubagon ang matag usa nga tinuli apan dili diay tinuli,+ 26 ang Ehipto+ ug ang Juda+ ug ang Edom+ ug ang mga Ammonhanon+ ug ang Moab+ ug ang tanan nga nagpuyo sa kamingawan kansang buhok sa tampihak gibalbasan;+ kay ang tanang kanasoran dili tinuli, ug ang tibuok panimalay ni Israel dili tinuli sa kasingkasing.”+