Nehemias

9 Sa ika-24 nga adlaw niining bulana, ang mga Israelinhon nagtigom ug nagpuasa. Nagsul-ob silag sakong panapton ug nagbutang ug abog sa ilang ulo.+ 2 Unya kadtong mga Israelinhon ug kagikan mibulag gikan sa mga langyaw,+ ug sila mibarog ug misulti sa ilang mga sala ug sa kasaypanan sa ilang katigulangan.+ 3 Sila nagtindog samtang gibasag kusog ang basahon sa Balaod+ ni Jehova nga ilang Diyos sulod sa tulo ka oras,* ug sa laing tulo ka oras sila nagsulti sa ilang mga sala ug nagyukbo kang Jehova nga ilang Diyos.

4 Si Jesua, Bani, Kadmiel, Sebanias, Buni, Serebias,+ Bani, ug Kenani mitindog sa plataporma+ sa mga Levihanon, ug nangamuyo kang Jehova nga ilang Diyos sa kusog nga tingog. 5 Ug ang mga Levihanon nga si Jesua, Kadmiel, Bani, Hasabneias, Serebias, Hodias, Sebanias, ug Petahia miingon: “Tindog ug dayega ninyo si Jehova nga inyong Diyos hangtod sa hangtod.+ Oh Diyos, tugoti silang dayegon ang imong mahimayaong ngalan nga takos sa tanang pagdayeg.

6 “Ikaw lamang mao si Jehova.+ Ikaw ang nagbuhat sa kalangitan, oo, ang langit sa mga langit ug ang tanang panon* niana, sa yuta ug ang tanang naa niana, sa dagat ug ang tanang naa niana. Ug silang tanan imong gitipigang buhi, ug ang panon sa kalangitan nagayukbo kanimo. 7 Ikaw si Jehova ang matuod nga Diyos, nga nagpili kang Abram+ ug nagkuha kaniya gikan sa Ur,+ sa yuta sa mga Caldeanhon, ug naghimo sa iyang ngalan nga Abraham.+ 8 Imong nakita nga siya matinumanon kanimo+ mao nga nakigsaad ka kaniya nga imong ihatag kaniya ug sa iyang mga kaliwat*+ ang yuta sa mga Canaanhon, Hitihanon, Amorihanon, Perizihanon, Jebusihanon, ug sa mga Girgasihanon. Ug gituman nimo ang imong mga saad kay matarong ka.

9 “Imong nakita ang pag-antos sa among mga katigulangan sa Ehipto,+ ug imong nadungog ang ilang pagtuaw didto sa Pulang Dagat. 10 Unya naghimo kag mga ilhanan ug milagro batok sa Paraon ug sa tanan niyang alagad ug sa tanang katawhan sa iyang yuta,+ kay nahibalo ka nga sila milihok nga mapangahason+ batok sa imong katawhan. Tungod sa imong gihimo, nailhan ang imong ngalan hangtod niining adlawa.+ 11 Imong gitunga ang dagat sa ilang atubangan aron makatabok sila niini agi sa mala nga yuta.+ Ug imong gitambog sa kahiladman ang mga naggukod kanila, samag bato nga gilabay sa balorong kadagatan.+ 12 Sa maadlaw gitultolan nimo sila pinaagi sa haligi nga panganod, ug sa magabii pinaagi sa haligi nga kalayo aron mahayagan ang ilang agianan.+ 13 Ug ikaw minaog sa Bukid sa Sinai+ ug nakigsulti kanila gikan sa langit+ ug naghatag kanilag matarong nga mga hukom, kasaligang mga balaod,* maayong mga regulasyon ug mga sugo.+ 14 Imo silang gisugo nga tumanon ang adlawng Igpapahulay ingong balaan,+ ug gihatagan silag mga sugo, regulasyon, ug balaod pinaagi kang Moises nga imong alagad. 15 Dihang gigutom sila gihatagan nimo silag tinapay gikan sa langit,+ dihang giuhaw sila nagpagula kag tubig gikan sa dakong bato,+ ug giingnan nimo sila nga sudlon ug panag-iyahon ang yuta nga imong gipanumpa* nga ihatag kanila.

16 “Apan ang among mga katigulangan milihok nga mapangahason+ ug nagmasinupakon,*+ ug wala nila tumana ang imong mga sugo. 17 Wala sila maminaw,+ ug gikalimtan nila ang katingalahang mga buhat nga imong gihimo kanila. Sila nagmasinupakon* ug nagtudlog pangulo nga modala nilag balik sa pagkaulipon sa Ehipto.+ Apan ikaw maoy Diyos nga andam mopasaylo, mabination* ug maluluy-on, dili daling masuko ug dagaya sa maunongong gugma,+ ug wala nimo sila biyai.+ 18 Bisan pa niadtong nagbuhat silag metal* nga estatuwa sa nating baka ug miingon, ‘Kini mao ang atong Diyos nga nagpagawas nato sa Ehipto,’+ ug nagpakita silag grabeng kawalay-pagtahod kanimo, 19 wala nimo sila biyai sa kamingawan tungod sa imong dakong kaluoy.+ Ang haligi nga panganod padayong nagtultol kanila sa maadlaw ug ang haligi nga kalayo padayong naghayag sa ilang agianan sa magabii.+ 20 Gihatag nimo ang imong espiritu* aron hatagan silag lawom nga pagsabot,+ ug gitagan-an nimo silag mana nga ilang makaon,+ ug tubig nga ilang mainom.+ 21 Sulod sa 40 ka tuig gitagan-an nimo silag pagkaon didto sa kamingawan,+ ug walay nakulang kanila. Ang ilang mga besti wala madunot+ ug ang ilang mga tiil wala manghubag.

22 “Gihatagan nimo silag mga gingharian ug katawhan, ug imong gibahinbahin kanila ang yuta.+ Mao nga ilang napanag-iya ang yuta ni Sihon+ nga hari sa Hesbon,+ apil ang yuta ni Og+ nga hari sa Basan. 23 Ug imong gipadaghan ang ilang mga anak sama sa mga bituon sa langit.+ Unya gidala nimo sila sa yuta nga imong gisaad sa ilang mga katigulangan nga ilang panag-iyahon.+ 24 Busa gipanag-iya sa ilang mga anak ang yuta+ ug imong gitugyan kanila ang mga molupyo sa Canaan,+ ang ilang mga hari ug katawhan, aron buhaton sa mga Israelinhon kanila ang ilang gusto. 25 Ug nailog nila ang pinarilang mga siyudad+ ug ang mabungahong* yuta,+ ug gipanag-iya nila ang mga balay nga puno sa tanang maayong butang, mga gahong nga pondohanag tubig, ubasan, kaolibohan,+ ug mga kahoy nga nagapamunga. Sila nangaon, natagbaw, ug nanambok. Nabuhong sila tungod sa imong dakong kaayo.

26 “Apan sila misupak ug mirebelde kanimo,+ ug gisalikway nila ang imong Balaod.* Ilang gipamatay ang imong mga propeta nga nagpasidaan kanila nga mobalik kanimo. Sila nagpakitag grabeng kawalay-pagtahod kanimo.+ 27 Busa gitugyan nimo sila sa ilang mga kaaway,+ nga kanunayng nagpaantos kanila.+ Apan dihang motuaw sila nimo panahon sa ilang kasakit, ikaw mamati gikan sa langit. Tungod sa imong dakong kaluoy, maghatag kag mga manluluwas sa pagluwas kanila gikan sa ilang mga kaaway.+

28 “Apan dihang maayo na ang ilang kahimtang, mobuhat na sab silag daotan sa imong atubangan,+ ug imong itugyan sila sa ilang mga kaaway, nga magdaogdaog* kanila.+ Unya mobalik na sab sila nimo ug magpatabang,+ ug ikaw mamati gikan sa langit ug balikbalik nga magluwas kanila tungod sa imong dakong kaluoy.+ 29 Bisan pag gipasidan-an nimo sila nga tumanon ang imong Balaod, nagmapahitas-on sila ug wala maminaw sa imong mga sugo.+ Sila nakasala kay gisupak nila ang imong mga regulasyon, nga kon sundon lang unta sa tawo, siya mabuhi.+ Apan sila balikbalik nga mitalikod kanimo, nagmasinupakon,* ug wala mamati. 30 Apan nagpailob ka kanila+ sulod sa daghang katuigan ug padayong nagpasidaan kanila pinaagi sa mga propeta nga imong gihatagan sa imong espiritu, apan sila wala maminaw. Sa kataposan gitugyan nimo sila sa katawhan sa ubang kayutaan.+ 31 Tungod sa imong dakong kaluoy, wala nimo sila puoha+ o biyai kay mabination* ug maluluy-on ka nga Diyos.+

32 “Ug karon, Oh among Diyos, ang Diyos nga gamhanan ug kahibulongan, nga nagatuman sa imong pakigsaad ug nagapakitag maunongong gugma,+ ayawg ibalewala ang tanang kalisdanan nga midangat kanamo, sa among mga hari, mga prinsipe,+ mga saserdote,+ mga propeta,+ katigulangan, ug sa tanan nimong katawhan sukad sa mga adlaw sa mga hari sa Asirya+ hangtod karon. 33 Dili ka namo mabasol sa tanang midangat kanamo kay matarong ka ug kasaligan. Kami ang naghimog daotan.+ 34 Kon bahin sa among mga hari, mga prinsipe, mga saserdote, ug katigulangan, wala nila tumana ang imong Balaod o tagda ang imong mga sugo o pasidaan kanila. 35 Bisan niadtong naa pa sila sa ilang gingharian ug nakapahimulos sa imong dakong kaayo ug nagpuyo pa sa lapad ug mabungahong* yuta nga imong gihatag kanila, sila wala mag-alagad nimo+ ug wala mohunong sa ilang daotang binuhatan. 36 Busa kami karon nahimong mga ulipon+ sa yuta nga imong gihatag sa among katigulangan, nga unta kami ang magpahimulos sa bunga ug sa maayong mga butang niini. 37 Ang abundang abot sa yuta naadto sa mga hari nga imong gitugot nga mosakop namo kay nakasala mi nimo.+ Silay nagbuot namo ug sa among mga hayop, mao nga nag-antos mi pag-ayo.

38 “Tungod niining tanan, mihimo mig sinulat nga kasabotan,+ ug gipalig-on kini pinaagi sa selyo sa among mga prinsipe, mga Levihanon, ug mga saserdote.”+