Jeremias
22 Kini ang giingon ni Jehova: “Adto sa balay* sa hari sa Juda, ug ipahayag kini nga mensahe. 2 Isulti kini, ‘Paminaw sa pulong ni Jehova, Oh hari sa Juda nga naglingkod sa trono ni David, ikaw uban ang imong mga alagad ug katawhan, kadtong nagaagi niini nga mga ganghaan. 3 Kini ang giingon ni Jehova: “Ipahamtang ninyo ang hustisya ug pagkamatarong. Luwasa ang usa nga gibuhatag kadaot diha sa kamot sa tikasan. Ayawg daogdaoga ang bisan kinsa nga langyawng residente, ug ayaw buhatig kadaot ang bisan kinsang bata nga wala nay amahan* o babayeng balo.+ Ug ayaw pag-ulag inosenteng dugo niining dapita.+ 4 Kay kon tumanon gayod ninyo kining pulonga, ang mga hari nga maglingkod sa trono ni David+ manulod agi sa mga ganghaan niining balaya, nga magsakay sa mga karo ug sa mga kabayo, sila uban sa ilang mga alagad ug katawhan.”’+
5 “‘Apan kon dili ninyo sundon kining mga pulonga, manumpa ko sa akong kaugalingon,’ miingon si Jehova, ‘nga kining balaya mahimong gun-ob nga dapit.’+
6 “Kay kini ang giingon ni Jehova bahin sa balay sa hari sa Juda,
‘Sama ka sa Gilead alang kanako,
Sama sa taluktok sa Lebanon.
Apan himoon ka nakong kamingawan;
Walay bisan usa sa imong mga siyudad ang pagapuy-an.+
Putlon nila ang imong kinamaayohang mga sedro
Ug isalibay kini sa kalayo.+
8 “‘Ug daghang nasod moagi niining siyudara ug moingon sa usag usa: “Nganong gibuhat kini ni Jehova niining bantogang siyudad?”+ 9 Ug sila motubag: “Kay ilang gisalikway ang pakigsaad ni Jehova nga ilang Diyos ug sila nangyukbo sa ubang mga diyos ug nag-alagad kanila.”’+
10 Ayaw ninyog hilaki ang namatay,
Ug ayaw pagbangotan alang kaniya.
Hinuon, hilak ug maayo alang sa usa nga madestiyero,
Kay dili na siya mobalik ug makakita sa iyang yutang natawhan.
11 “Kay kini ang giingon ni Jehova bahin kang Salum*+ nga anak ni Josias, ang hari sa Juda nga nagmando puli kang Josias+ nga iyang amahan ug kinsa mibiya niining dapita: ‘Dili na siya mobalik didto. 12 Kay siya mamatay sa dapit diin nila siya gidestiyero, ug dili na niya makita kining yutaa.’+
13 Alaot siya nga nagtukod sa iyang balay nga dili pinaagi sa pagkamatarong
Ug sa iyang mga lawak sa itaas nga dili pinaagi sa hustisya,
Kinsa nagpaalagad sa iyang isigkatawo nga walay bayad,
Nga nagdumili sa paghatag kaniyag suhol;+
14 Siya nga nagaingon, ‘Magtukod kog dakong balay
Nga may luag nga mga lawak sa itaas.
Butangan nako kinig mga bentana,
Ug bungbongan kinig sedro ug pintalan ug pula.’
15 Padayon ba kang magmando kay nalabwan nimo ang uban sa imong paggamit ug sedro?
Ang imong amahan mikaon usab ug miinom,
Apan nagpahamtang siyag hustisya ug pagkamatarong,+
Ug maayo ang iyang gidangatan.
16 Iyang gidepensahan ang katungod sa sinakit ug kabos,
Mao nga maayo ang gidangatan niini.
‘Dili ba iya kanang gihimo kay nakaila siya kanako?’ miingon si Jehova.
17 ‘Apan ang imong mga mata ug kasingkasing napokus lang sa pagpamentaha,
Ug sa pag-ulag inosenteng dugo,
Ug sa pagpanikas ug pagpangilkil.’
18 “Busa kini ang giingon ni Jehova bahin kang Jehoiakim+ nga anak ni Josias, ang hari sa Juda,
‘Sila dili magbangotan alang kaniya:
“Pagkaalaot, akong igsoong lalaki! Pagkaalaot, akong igsoong babaye!”
Sila dili magbangotan alang kaniya:
“Pagkaalaot, Oh agalon! Pagkaalaot sa iyang kahalangdon!”
19 Siya ilubong sama sa paglubong sa usa ka asno,+
Nga guyoron ug isalibay,
Ngadto sa gawas sa mga ganghaan sa Jerusalem.’+
20 Tungas ngadto sa Lebanon ug singgit,
Ipatugbaw ang imong tingog sa Basan,
Ug singgit gikan sa Abarim,+
Kay ang tanang nahigugma pag-ayo kanimo nalaglag.+
21 Nakigsulti ko nimo sa panahon nga mibati kag kasegurohan.
Apan miingon ka, ‘Dili ko mosunod.’+
Kini na ang imong ginabuhat sukad pa sa imong pagkabatan-on,
Kay wala nimo tumana ang akong tingog.+
Ug ikaw maulawan tungod sa tanan nimong katalagman.
23 Oh ikaw nga nagpuyo sa Lebanon,+
Nga nagsalag diha sa mga sedro,+
Mag-agulo gyod ka dihang modangat kanimo ang kasakit,
24 “‘Ingon nga ako buhi,’ miingon si Jehova, ‘bisan pag ikaw Conias*+ nga anak ni Jehoiakim,+ ang hari sa Juda, mao ang pangselyo nga singsing sa akong tuong kamot, tangtangon ka nako gikan niini! 25 Itugyan ka nako ngadto sa kamot niadtong nagtinguha sa imong kinabuhi, sa kamot niadtong imong gikahadlokan, sa kamot ni Haring Nabucodonosor* sa Babilonya, ug sa kamot sa mga Caldeanhon.+ 26 Ug ikaw ug ang imong inahan nga nanganak kanimo akong isalibay ngadto sa laing yuta nga dili ninyo natawhan, ug didto mo mamatay. 27 Ug dili na gyod sila mobalik sa yuta nga ilang gipangandoy.+
28 Kini bang tawhana nga si Conias usa lang ka tinamay ug buak nga kulon,
Usa ka sudlanan nga walay ganahan?
Ngano man nga siya ug ang iyang mga kaliwat gilabog
Ug gisalibay ngadto sa yuta nga wala nila mailhi?’+
29 Oh yuta, yuta, yuta, paminaw sa pulong ni Jehova.
30 Kini ang giingon ni Jehova:
‘Isulat nga kining tawhana walay anak,
Ingong usa ka tawo nga dili magmalamposon sa tibuok niyang kinabuhi,*
Kay walay usa sa iyang mga kaliwat ang magmalamposon
Sa paglingkod sa trono ni David ug sa pagmando pag-usab sa Juda.’”+