Jeremias

28 Sa mao gihapong tuig, sa sinugdanan sa pagmando ni Haring Zedekias+ sa Juda, sa ikalimang bulan sa ikaupat nga tuig, si propetang Hananias nga anak ni Azur nga gikan sa Gabaon+ miingon kanako diha sa balay ni Jehova atubangan sa mga saserdote ug sa tanang katawhan: 2 “Kini ang giingon ni Jehova sa mga panon, ang Diyos sa Israel, ‘Balion nako ang yugo sa hari sa Babilonya.+ 3 Sulod sa duha ka tuig,* ibalik nako niining dapita ang tanang galamiton sa balay ni Jehova nga gikuha ni Haring Nabucodonosor sa Babilonya gikan niining dapita ug gidala sa Babilonya.’”+ 4 “‘Ug dad-on nakog balik niining dapita si Jeconias+ nga anak ni Jehoiakim,+ ang hari sa Juda, ug ang tanang destiyero sa Juda nga gidala sa Babilonya,’+ miingon si Jehova, ‘kay balion nako ang yugo sa hari sa Babilonya.’”

5 Unya si propetang Jeremias nakigsulti kang propetang Hananias atubangan sa mga saserdote ug sa tanang katawhan nga nagtindog diha sa balay ni Jehova. 6 Si propetang Jeremias miingon: “Amen!* Hinaot buhaton kini ni Jehova! Hinaot tumanon ni Jehova ang imong gitagna ug dad-on niyag balik niining dapita ang mga galamiton sa balay ni Jehova ug ang tanang nadestiyero gikan sa Babilonya! 7 Apan palihog pamatia kining mensahe nga akong isulti kanimo ug sa tanang katawhan. 8 Dugay na kanhi, ang mga propeta nga nauna kanako ug nauna kanimo nagapanagna bahin sa gubat, katalagman, ug kamatay* diha sa daghang kayutaan ug gamhanang mga gingharian. 9 Kon ang usa ka propeta managna bahin sa pakigdait ug ang pulong sa maong propeta matuman, mailhan nga ang maong propeta gipadala gyod ni Jehova.”

10 Dayon gikuha ni propetang Hananias ang yugo sa liog ni propetang Jeremias ug gibali kini.+ 11 Unya si Hananias miingon atubangan sa tanang katawhan: “Kini ang giingon ni Jehova, ‘Sama niini, balion nako ang yugo ni Haring Nabucodonosor sa Babilonya gikan sa liog sa tanang kanasoran sulod sa duha ka tuig.’”+ Ug si propetang Jeremias milakaw.

12 Human balia ni propetang Hananias ang yugo gikan sa liog ni propetang Jeremias, nadawat ni Jeremias kini nga mensahe gikan kang Jehova: 13 “Lakaw ug ingna si Hananias, ‘Kini ang giingon ni Jehova: “Mga yugo nga kahoy ang imong gibali,+ apan pulihi kinig mga yugo nga puthaw.” 14 Kay kini ang giingon ni Jehova sa mga panon, ang Diyos sa Israel: “Sangonan nakog yugo nga puthaw ang liog niining tanang kanasoran, aron moalagad kang Haring Nabucodonosor sa Babilonya, ug sila angayng mag-alagad kaniya.+ Bisan ang ihalas nga mga mananap sa kapatagan akong ihatag kaniya.”’”+

15 Unya si propetang Jeremias miingon kang propetang Hananias:+ “Palihog pamati, Oh Hananias! Si Jehova wala magpadala kanimo, apan bakak ang imong gipasalig niini nga katawhan.+ 16 Busa kini ang giingon ni Jehova, ‘Tan-awa! Wagtangon ka nako sa nawong sa yuta. Niining tuiga ikaw mamatay, kay nag-aghat kag rebelyon batok kang Jehova.’”+

17 Busa si propetang Hananias namatay niadtong tuiga, sa ikapitong bulan.