Unang Cronicas
5 Mao kini ang mga anak ni Ruben+ nga panganay ni Israel. Siya ang panganay apan kay iya mang gihugawan* ang higdaanan sa iyang amahan,+ ang iyang katungod sa pagkapanganay gihatag ngadto sa mga anak ni Jose+ nga anak ni Israel, mao nga sa talaan sa kagikan wala siya itala nga may katungod sa pagkapanganay. 2 Bisag si Juda+ labaw sa iyang mga igsoon ug naggikan kaniya ang usa nga mahimong pangulo,+ ang katungod sa pagkapanganay iya ni Jose. 3 Ang mga anak nga lalaki ni Ruben nga panganay ni Israel mao si Hanok, Palu, Hesron, ug Carmi.+ 4 Ang mga anak ni Joel mao si Semaias nga iyang anak, si Gog nga iyang anak, si Simei nga iyang anak, 5 si Miqueas nga iyang anak, si Reaias nga iyang anak, si Baal nga iyang anak, 6 ug si Beerah nga iyang anak, nga gidestiyero ni Tilgat-pilneser+ nga hari sa Asirya; siya usa ka pangulo sa mga Rubenhon. 7 Sumala sa talaan sa kagikan sa ilang mga banay, ang iyang mga igsoon mao si Jeiel nga pangulo, si Zacarias, 8 ug si Bela nga anak ni Azaz nga anak ni Sema nga anak ni Joel nga nagpuyo sa Aroer+ ug hangtod sa Nebo ug sa Baal-meon.+ 9 Sa sidlakan, sila mipuyo hangtod sa entrada sa kamingawan nga mosangko sa Suba sa Euprates,+ kay ang ilang kahayopan midaghan man sa yuta sa Gilead.+ 10 Sa mga adlaw ni Saul sila nakiggubat sa mga Hagrihanon, kinsa ilang napildi. Busa sila mipuyo sa ilang mga tolda sa tibuok teritoryo sa sidlakan sa Gilead.
11 Karon ang mga kaliwat ni Gad nagpuyo tapad nila diha sa yuta sa Basan hangtod sa Saleca.+ 12 Si Joel mao ang pangulo, si Sapam ang ikaduha, ug si Janai ug Sapat sa Basan. 13 Ug ang ilang mga igsoon nga sakop sa ilang mga banay* mao si Miguel, Mesulam, Sheba, Jorai, Jacan, Zia, ug Eber, pito tanan. 14 Mao kini ang mga anak ni Abihail nga anak ni Huri nga anak ni Jaroa nga anak ni Gilead nga anak ni Miguel nga anak ni Jesisai nga anak ni Jado nga anak ni Buz. 15 Si Ahi nga anak ni Abdiel nga anak ni Guni mao ang pangulo sa ilang banay.* 16 Sila mipuyo sa Gilead,+ sa Basan+ ug sa mga lungsod nga sakop* niini, ug sa tanang sibsibanan sa Saron hangtod sa mga utlanan niini. 17 Silang tanan gitala sumala sa ilang kagikan sa panahon ni Haring Jotam+ sa Juda ug sa panahon ni Haring Jeroboam*+ sa Israel.
18 Ang mga Rubenhon, Gadhanon, ug ang katunga sa tribo ni Manases may 44,760 ka banggiitang manggugubat sa ilang kasundalohan nga nagdalag mga taming ug espada ug may mga pana,* ug sila nabansay sa pagpakiggubat. 19 Sila nakiggubat sa mga Hagrihanon,+ sa Jetur, Napis,+ ug Nodab. 20 Ug sila gitabangan sa pagpakig-away kanila, mao nga ang mga Hagrihanon ug ang tanang uban kanila gitugyan ngadto sa ilang kamot, kay sila nangayog tabang sa Diyos sa pagpakiggubat, ug iyang gidungog ang ilang pangaliyupo kay sila misalig kaniya.+ 21 Ilang gikuha ang ilang kahayopan—50,000 ka kamelyo, 250,000 ka karnero, ug 2,000 ka asno. Gibihag usab nila ang 100,000 ka tawo.* 22 Daghan ang napatay, kay ang matuod nga Diyos ang nakiggubat.+ Ug sila mipuyo sa ilang dapit hangtod sa panahon sa pagkadestiyero.+
23 Ang mga kaliwat sa katunga sa tribo ni Manases+ nagpuyo sa Basan hangtod sa Baal-hermon ug sa Senir ug sa Bukid sa Hermon.+ Daghan kaayo sila. 24 Mao kini ang mga pangulo sa ilang mga banay:* si Eper, Isi, Eliel, Azriel, Jeremias, Hodavia, ug Jadiel; sila mga banggiitang manggugubat, bantogan, ug mga pangulo sa ilang mga banay.* 25 Apan wala sila magmatinumanon sa Diyos sa ilang mga katigulangan ug nakighilawas sila sa mga diyos sa mga katawhan sa yuta,+ nga gilaglag sa Diyos sa ilang atubangan. 26 Busa gipalihok sa Diyos sa Israel si* Haring Pul sa Asirya+ (nga mao si Haring Tilgat-pilneser+ sa Asirya) mao nga iyang gibihag kadtong mga Rubenhon, Gadhanon, ug katunga sa tribo ni Manases ug gidala sila ngadto sa Hala, sa Habor, sa Hara, ug sa suba sa Gozan.+ Atua sila didto hangtod niining adlawa.