Unang Cronicas

22 Unya si David miingon: “Kini mao ang balay ni Jehova nga matuod nga Diyos, ug kini maoy halaran alang sa halad nga sinunog alang sa Israel.”+

2 Dayon si David nagsugo nga tigomon ang langyawng mga residente+ sa yuta sa Israel, ug gitudlo sila ingong mga magtatabas ug bato sa pagtabas ug pagporma sa mga bato alang sa pagtukod sa balay sa matuod nga Diyos.+ 3 Nag-andam usab si David ug daghan kaayong puthaw aron himoong mga lansang para sa mga pultahan sa mga ganghaan ug aron himoong mga pangdugtong, ug tumbaga nga dili na matimbang sa kadaghan,+ 4 ug usab mga kahoyng sedro+ nga dili maihap, kay ang mga taga-Sidon+ ug taga-Tiro+ nagdalag daghan kaayong kahoyng sedro kang David. 5 Ug si David miingon: “Ang akong anak nga si Solomon batan-on pa ug kulag eksperyensiya,*+ ug ang balay nga tukoron alang kang Jehova hilabihan ka halangdon,+ aron ang kabantog ug kanindot+ niini mahibaloan sa tanang kayutaan.+ Mao nga mangandam ko alang niya.” Busa si David nangandam ug daghan kaayong materyales sa wala pa siya mamatay.

6 Dugang pa, iyang gipatawag si Solomon nga iyang anak ug gisugo siya sa pagtukod ug balay alang kang Jehova nga Diyos sa Israel. 7 Giingnan ni David si Solomon nga iyang anak: “Tinguha gyod sa akong kasingkasing nga magtukod ug balay alang sa ngalan ni Jehova nga akong Diyos.+ 8 Apan mao kini ang pulong ni Jehova alang kanako: ‘Daghan kaayong dugo ang imong gipabanaw, ug ikaw nakigsangka ug dagkong gubat. Dili ka magtukod ug balay alang sa akong ngalan,+ kay daghan kaayong dugo ang imong gipabanaw sa yuta sa akong atubangan. 9 Ania, makabaton kag anak nga lalaki+ nga mahimong tawong makigdaiton,* ug ako maghatag kaniyag pahulay gikan sa tanan niyang kaaway sa iyang palibot,+ kay Solomon*+ ang mahimo niyang ngalan, ug hatagan nakog pakigdait ug kalinaw ang Israel sa iyang mga adlaw.+ 10 Siya ang magtukod ug balay alang sa akong ngalan.+ Siya mahimong akong anak, ug ako mahimong iyang amahan.+ Tukoron nako nga lig-on ang trono sa iyang pagkahari ibabaw sa Israel hangtod sa hangtod.’+

11 “Karon, anak ko, hinaot si Jehova magauban kanimo, ug hinaot nga magmalamposon ka ug imong tukoron ang balay ni Jehova nga imong Diyos, sumala sa iyang gisulti bahin kanimo.+ 12 Hinaot hatagan ka ni Jehova ug kaalam ug pagsabot+ dihang ihatag niya kanimo ang awtoridad ibabaw sa Israel, aron matuman nimo ang balaod ni Jehova nga imong Diyos.+ 13 Unya magmalamposon ka kon imo gyong sundon ang mga regulasyon+ ug ang mga hukom nga gihatag ni Jehova sa Israel+ pinaagi kang Moises. Magmaisogon ka ug magmalig-on. Ayawg kahadlok o kalisang.+ 14 Ania, naghago ko pag-ayo sa pag-andam alang sa balay ni Jehova ug 100,000 ka talanton* nga bulawan, 1,000,000 ka talanton nga plata, ug tumbaga ug puthaw+ nga dili matimbang sa kadaghan, ug nag-andam kog mga kahoy ug mga bato,+ apan dugangan pa nimo kini. 15 Uban nimo ang daghan kaayong trabahador​—mga magtatabas ug bato, mason,*+ panday, ug mga trabahador nga lainlaig kahanas.+ 16 Ang bulawan, plata, tumbaga, ug puthaw dili maihap.+ Lakaw ug sugdi ang buluhaton, ug hinaot si Jehova magauban kanimo.”+

17 Unya gisugo ni David ang tanang prinsipe sa Israel sa pagtabang kang Solomon nga iyang anak, nga nag-ingon: 18 “Dili ba si Jehova nga inyong Diyos nag-uban kaninyo, ug dili ba gihatagan man mo niyag pahulay gikan sa tanan ninyong kaaway sa palibot? Kay iyang gitugyan sa akong kamot ang mga molupyo sa yuta, ug ang yuta nasakop sa atubangan ni Jehova ug atubangan sa iyang katawhan. 19 Karon pangitaa gayod ninyo si Jehova nga inyong Diyos+ sa bug-os ninyong kasingkasing ug kalag,* ug sugdig tukod ang sangtuwaryo ni Jehova nga matuod nga Diyos,+ aron dad-on ang kaban sa pakigsaad ni Jehova ug ang balaang mga galamiton sa matuod nga Diyos+ ngadto sa balay nga tukoron alang sa ngalan ni Jehova.”+