Deuteronomio
11 “Higugmaa si Jehova nga inyong Diyos+ ug tumana kanunay ang inyong obligasyon kaniya ug ang iyang mga lagda, hudisyal nga mga hukom, ug mga sugo. 2 Nahibalo mo nga kamo ang akong giingnan karon, dili ang inyong mga anak nga wala mahibalo o makakita sa disiplina ni Jehova nga inyong Diyos,+ sa iyang pagkabantogan ug sa iyang dako kaayong gahom.+ 3 Wala nila makita ang iyang mga ilhanan ug mga buhat didto sa Ehipto, nga iyang gibuhat sa Paraon nga hari sa Ehipto ug sa tibuok niyang yuta;+ 4 o sa iyang gibuhat sa kasundalohan sa Ehipto, sa mga kabayo ug mga karong panggubat sa Paraon nga natabonan sa tubig sa Pulang Dagat dihang ila mong gigukod, ug gilaglag gayod sila ni Jehova.+ 5 Wala nila makita kon unsay iyang gihimo para ninyo didto sa kamingawan hangtod nga nakaabot mo dinhi, 6 o kon unsay iyang gibuhat kang Datan ug Abiram, mga anak ni Eliab nga anak ni Ruben, dihang nakita sa tibuok Israel nga mibuka ang yuta ug gilamoy sila, apil ang ilang panimalay, tolda, ug ang tanang misunod kanila.+ 7 Nakita mismo ninyo ang tanang gamhanang buhat ni Jehova.
8 “Tumana gayod ang tanang sugo nga akong gihatag kaninyo karon, aron mahimo mong lig-ong katawhan ug makatabok ngadto sa yuta aron panag-iyahon kini, 9 ug aron mabuhi mog dugay+ sa yuta nga gipanumpa ni Jehova nga inyong Diyos sa inyong mga katigulangan ug sa ilang kaliwat,*+ yuta nga abunda sa gatas ug dugos.+
10 “Ang yuta nga inyong panag-iyahon dili parehas sa Ehipto nga inyong gigikanan, diin nagpugas mog mga binhi ug naghago pag-ayo aron patubigan kini* parehas sa tamnanag mga gulay. 11 Apan ang yuta nga inyong adtoon aron panag-iyahon maoy yuta nga daghag bukid ug kapatagan.+ Abunda kinig tubig tungod sa ulan;+ 12 yuta kini nga ginaatiman ni Jehova nga inyong Diyos. Ang mga mata ni Jehova nga inyong Diyos kanunayng nagbantay niini, gikan sa sinugdanan sa tuig hangtod sa kataposan sa tuig.
13 “Ug kon tumanon gayod ninyo ang mga sugo nga akong gihatag karon ug higugmaon ninyo si Jehova nga inyong Diyos ug alagaron siya sa bug-os kasingkasing ug sa bug-os kalag,*+ 14 hatagan sab mo niyag* ulan para sa inyong yuta sa gitakdang panahon, ulan sa tinglarag* ug tingpamulak, ug tigomon ninyo ang inyong mga lugas, bag-ong bino, ug lana.+ 15 Ug magpatubo siyag sagbot sa inyong yuta para sa inyong binuhing mga hayop, ug kamo mokaon ug mabusog.+ 16 Pagbantay nga ang inyong kasingkasing dili motipas ug mosimba sa laing mga diyos ug moyukbo kanila.+ 17 Kay kon dili, mosilaob ang kasuko ni Jehova kaninyo, ug iyang tak-opan ang langit aron dili moulan+ ug ang yuta dili magpatunghag abot ug kamo malaglag dayon gikan sa maayong yuta nga ihatag ni Jehova kaninyo.+
18 “Kining akong mga pulong kinahanglang isilsil ninyo sa inyong kasingkasing ug himoa kining bahin sa inyong pagkatawo ug ihigot kini sa inyong kamot ingong pahinumdom, ug kinahanglang sama kinig bugkos sa inyong agtang.*+ 19 Itudlo kini sa inyong mga anak; isulti kini dihang maglingkod mo sa inyong balay, maglakaw sa dalan, maghigda, ug mobangon.+ 20 Isulat kini sa mga haligi sa pultahan sa inyong balay ug sa inyong mga ganghaan, 21 aron kamo ug ang inyong mga anak mabuhig dugay+ sa yuta nga gipanumpa ni Jehova nga ihatag sa inyong mga katigulangan,+ hangtod nga naa pa ang langit ibabaw sa yuta.
22 “Kon tumanon gayod ninyo kining tanang sugo nga akong gihatag kaninyo, nga higugmaon si Jehova nga inyong Diyos,+ subayon ang tanan niyang dalan, ug mounong kaniya,+ 23 abogon ni Jehova kining tanang nasod gikan sa inyong atubangan,+ ug inyong papahawaon ang mga nasod nga mas gamhanan ug mas daghag molupyo kay kaninyo.+ 24 Mainyoha ang tanang lugar nga inyong matumban.+ Ang inyo unyang utlanan maoy gikan sa kamingawan hangtod sa Lebanon, gikan sa Suba, ang suba sa Euprates, hangtod sa dagat sa kasadpan.*+ 25 Walay makabarog batok kaninyo.+ Ipahinabo ni Jehova nga inyong Diyos nga kalisangan ug kahadlokan mo sa mga tawo sa yuta nga inyong adtoan,+ sumala sa iyang gisaad kaninyo.
26 “Ania, ibutang nako karon sa inyong atubangan ang panalangin ug ang tunglo:+ 27 panalangin kon tumanon ninyo ang mga sugo ni Jehova nga inyong Diyos nga akong gihatag kaninyo karon,+ 28 ug tunglo kon dili mo motuman sa mga sugo ni Jehova nga inyong Diyos+ ug mosimang mo sa dalan nga akong gisugo kaninyo karon ug mosunod mo sa laing mga diyos nga wala ninyo mailhi.
29 “Dihang dad-on mo ni Jehova nga inyong Diyos sa yuta nga inyong panag-iyahon, isulti* ang mga panalangin didto sa Bukid sa Gerizim ug ang tunglo didto sa Bukid sa Ebal.+ 30 Dili ba tua kini sa tabok sa Jordan sa kasadpan,* sa yuta sa mga Canaanhon nga namuyo sa Araba, atbang sa Gilgal, duol sa dagkong kahoy sa More?+ 31 Kay manabok mo sa Jordan aron sudlon ug panag-iyahon ang yuta nga ihatag kaninyo ni Jehova nga inyong Diyos.+ Dihang mainyo na kini ug didto na mo mamuyo, 32 paneguroa nga matuman ninyo ang tanang regulasyon ug hudisyal nga mga hukom nga akong gihatag kaninyo karon.+