Ezequiel
25 Nakadawat na usab kog mensahe gikan kang Jehova, nga nag-ingon: 2 “Anak sa tawo, ipatumong ang imong nawong sa mga Ammonhanon,+ ug panagna batok kanila.+ 3 Isulti kini bahin sa mga Ammonhanon, ‘Paminawa ang pulong sa Soberanong Ginoong Jehova. Kini ang giingon sa Soberanong Ginoong Jehova: “Kay miingon kag ‘Aha!’ batok sa akong sangtuwaryo dihang kini gipasipalahan, ug batok sa yuta sa Israel dihang kini nabiniyaan, ug batok sa panimalay ni Juda dihang sila nadestiyero, 4 itugyan ka nako sa katawhan sa Sidlakan ingong katigayonan. Ipahimutang nila ang ilang mga kampo* diha kanimo ug ipatindog nila ang ilang mga tolda diha sa imong taliwala. Kaonon nila ang imong mga bunga, ug imnon nila ang imong gatas. 5 Himoon nakong sibsibanan sa mga kamelyo ang Raba,+ ug pahulayanan sa panon sa mga karnero ang yuta sa mga Ammonhanon; ug kamo makaila gayod nga ako si Jehova.”’”
6 “Kay kini ang giingon sa Soberanong Ginoong Jehova: ‘Kay gipakpak nimo ang imong mga kamot+ ug gibundak nimo ang imong mga tiil ug nagsadya ka uban ang grabeng pagtamay tungod sa nahitabo sa yuta sa Israel,+ 7 ituy-od nako ang akong kamot batok kanimo aron itugyan ka ngadto sa kanasoran aron panguhaan kag kabtangan. Ako kang putlon gikan sa mga katawhan ug laglagon gikan sa kayutaan.+ Puohon ka nako, ug ikaw makaila gayod nga ako si Jehova.’
8 “Kini ang giingon sa Soberanong Ginoong Jehova: ‘Kay ang Moab+ ug Seir+ miingon, “Tan-awa! Ang panimalay ni Juda sama sa tanang ubang kanasoran,” 9 ipahinabo nako nga atakehon ang mga siyudad sa Moab nga anaa sa iyang utlanan, diha sa bakilid* sa Moab, ang mga siyudad nga nagpatahom* sa iyang yuta, ang Bet-jesimot, Baal-meon, ug hangtod sa Kiriataim.+ 10 Itugyan nako kini uban sa mga Ammonhanon ingong katigayonan ngadto sa katawhan sa Sidlakan,+ aron ang mga Ammonhanon dili na hinumdoman taliwala sa kanasoran.+ 11 Ug hukman nako ang Moab,+ ug sila makaila gayod nga ako si Jehova.’
12 “Kini ang giingon sa Soberanong Ginoong Jehova: ‘Ang Edom nanimalos sa panimalay ni Juda ug nakahimog dakong sala sa pagpanimalos kanila;+ 13 busa kini ang giingon sa Soberanong Ginoong Jehova: “Ituy-od usab nako ang akong kamot batok sa Edom ug laglagon nako gikan niini ang mga tawo ug hayop, ug himoon nako kining biniyaan.+ Gikan sa Teman hangtod sa Dedan, sila mapukan sa espada.+ 14 ‘Manimalos ko sa Edom pinaagi sa kamot sa akong katawhang Israel.+ Ibubo nila ang akong kasuko ug ang akong kapungot sa Edom, aron ilang maagoman ang akong pagpanimalos,’+ miingon ang Soberanong Ginoong Jehova.”’
15 “Kini ang giingon sa Soberanong Ginoong Jehova: ‘Tungod sa ilang dugay nang pagdumot sa Israel, ang mga Filistehanon nagtinguha gayod sa pagpanimalos ug pagdalag kalaglagan.+ 16 Busa kini ang giingon sa Soberanong Ginoong Jehova: “Ania, ituy-od nako ang akong kamot batok sa mga Filistehanon,+ ug akong laglagon ang mga Keretnon+ ug ang nahibiling mga molupyo sa kabaybayonan.+ 17 Ipahamtang nako kanila ang dagkong buhat sa pagpanimalos uban ang pintas nga mga silot, ug sila makaila gayod nga ako si Jehova dihang manimalos ko kanila.”’”