Deuteronomio

21 “Kon may patayng tawo nga makita diha sa yuta nga ihatag kaninyo ni Jehova nga inyong Diyos aron mapanag-iya ug walay nahibalo kon kinsay nagpatay niya, 2 ang inyong mga ansiyano ug mga maghuhukom+ kinahanglang moadto aron sukdon ang gilay-on sa palibot nga mga siyudad gikan sa patayng lawas. 3 Dayon ang mga ansiyano sa siyudad nga kinadul-an sa patayng lawas magkuhag nating baka nga wala pa magamit sa pagtrabaho, kanang wala sukad mabutangig yugo, 4 ug dad-on sa mga ansiyano nianang siyudara ang nating baka sa walog* nga may nagaagos nga tubig, nga wala sukad madaro o matamnig binhi, ug balion nila ang liog sa nating baka didto sa walog.+

5 “Moadto didto ang mga saserdote nga Levihanon kay silay gipili ni Jehova nga inyong Diyos sa pag-alagad kaniya,+ sa pagpanalangin pinaagi sa ngalan ni Jehova.+ Ilang isulti kon unsay himoon sa matag kaso nga nalangkit ang pintas nga buhat.+ 6 Unya ang tanang ansiyano sa siyudad nga kinadul-an sa patayng lawas angayng manghunaw+ ibabaw sa nating baka nga ang liog gibali diha sa walog, 7 ug moingon sila, ‘Dili kami ang nagpatay niya, ug wala mi makakita dihang nahitabo kini. 8 Ayaw papanubaga niini ang imong katawhang Israel nga imong gitubos,+ Oh Jehova, ug ayaw ipabilin sa imong katawhang Israel ang sala sa pagpatayg inosenteng tawo.’+ Ug sila dili na manubag sa pagkasad-an sa dugo. 9 Niining paagiha, mawala kaninyo ang pagkasad-an sa pagpatayg inosenteng tawo kay inyong gibuhat kon unsay husto sa panan-aw ni Jehova.

10 “Kon makiggubat mo sa inyong kaaway ug pildihon sila ni Jehova nga inyong Diyos para kaninyo ug bihagon ninyo sila,+ 11 ug naa kay makitang guwapa sa mga binihag ug nakagusto ka niya ug gusto nimo siyang pangasaw-on, 12 puwede nimo siyang dad-on sa imong balay. Dayon ang babaye magpaupaw, manghinguko, 13 maghukas sa besti sa iyang pagkabinihag, ug mopuyo sa imong balay. Usa ka bulan niyang hilakan ang iyang amahan ug inahan,+ unya puwede na kang makigdulog niya. Ikaw mahimo niyang bana ug siya mahimo nimong asawa. 14 Apan kon dili na ka makauyon niya, tugoti siyang moadto+ bisan asa niya gusto. Apan dili nimo siya ibaligya o trataron nga dili maayo, kay pinugos ang imong pagpangasawa niya.

15 “Kon ang usa ka tawo may duha ka asawa, unya mas gihigugma niya ang usa,* ug ang duha nanganak ug mga batang lalaki, apan ang panganay anak sa asawa nga wala niya higugmaa,+ 16 inigbahin niya sa iyang katigayonan ngadto sa iyang mga anak nga lalaki, dili puwede nga ang iyang tratarong panganay mao kadtong anak sa gihigugma niyang asawa imbes ang anak niadtong wala niya higugmaa, nga maoy panganay. 17 Kinahanglang ilhon niya ingong panganay ang anak nga lalaki sa asawa nga wala niya higugmaa pinaagi sa paghatag kaniyag duha ka bahin sa tanan niyang gipanag-iya, kay siya ang unang bunga sa iyang katakos sa pagsanay. Iya ang katungod sa pagkapanganay.+

18 “Kon ang usa ka tawo may anak nga gahig ulo ug rebelyoso ug dili siya mosunod sa iyang amahan o inahan,+ ug naningkamot sila sa pagtul-id kaniya apan dili gyod siya maminaw nila,+ 19 dad-on siya sa iyang amahan ug inahan ngadto sa mga ansiyano sa ganghaan sa ilang siyudad 20 ug ingnon nila ang mga ansiyano sa ilang siyudad, ‘Kining among anak gahig ulo ug rebelyoso ug dili gyod mosunod namo. Ulit siyag pagkaon+ ug palahubog.’+ 21 Unya batoon siya sa tanang lalaki sa ilang siyudad hangtod mamatay. Kinahanglang kuhaon ninyo ang daotan gikan sa inyong taliwala, ug ang tibuok Israel makadungog niini ug mahadlok.+

22 “Kon ang usa ka tawo makahimog sala nga ang silot kamatayon ug siya gipatay+ ug gibitay sa estaka,+ 23 ayaw ipabilin sa estaka ang iyang patayng lawas sa tibuok gabii.+ Ilubong gayod ninyo siya nianang adlawa, kay ang usa nga gibitay tinunglo sa Diyos,+ ug dili ninyo hugawan ang inyong yuta nga ihatag kaninyo ni Jehova nga inyong Diyos ingong panulondon.+