Alang sa direktor. Salmo sa mga anak ni Kore.+
85 Oh Jehova, gipakitaan nimog pabor ang imong yuta;+
Gidala nimog balik kadtong iya ni Jacob nga nangabihag.+
2 Gipasaylo nimo ang kasaypanan sa imong katawhan;
Gipasaylo nimo ang tanan nilang sala.+ (Selah)
3 Gipugngan nimo ang imong nagsilaob nga kasuko;
Gitalikdan nimo ang imong nagdilaab nga kasuko.+
4 Ipasig-uli kami, Oh Diyos sa among kaluwasan,
Ug ihiklin ang imong kasuko kanamo.+
5 Masuko ba ka kanamo hangtod sa hangtod?+
Magpabilin ba ang imong kasuko hangtod sa sunodsunod nga kaliwatan?
6 Dili ba mi nimo palagsikon pag-usab
Aron ang imong katawhan magsadya tungod kanimo?+
7 Oh Jehova, ipakita kanamo ang imong maunongong gugma,+
Ug luwasa kami.
8 Mamati ko kon unsay isulti sa matuod nga Diyos nga si Jehova,
Kay siya magsultig bahin sa pakigdait ngadto sa iyang katawhan,+ ngadto sa mga maunongon kaniya,
Apan ayawg tugoting mobalik sila sa ilang sobrang pagsalig sa kaugalingon.+
9 Siya andam sa pagluwas sa mga may kahadlok kaniya,+
Aron ang iyang himaya magpabilin dinhi sa atong yuta.
10 Ang maunongong gugma ug ang pagkamatinumanon magtagbo;
Ang pagkamatarong ug ang pakigdait maghagkanay.+
11 Ang pagkamatinud-anon mogitib sa yuta,
Ug ang pagkamatarong modungaw gikan sa kalangitan.+
12 Oo, ihatag ni Jehova ang maayo,+
Ug ang atong yuta mohatag sa abot niini.+
13 Ang pagkamatarong molakaw sa iyang atubangan+
Ug maghimog dalan alang sa iyang mga tunob.