Unang Cronicas

17 Dihang si David nagpuyo na sa iyang kaugalingong balay,* siya miingon kang propetang Natan:+ “Ania nagpuyo ko sa balay nga sedro+ samtang ang kaban sa pakigsaad ni Jehova anaa taliwala sa mga telang pangtolda.”+ 2 Si Natan miingon kang David: “Buhata ang bisan unsa nga anaa sa imong kasingkasing, kay ang matuod nga Diyos nagauban kanimo.”

3 Niadto mismong gabhiona, si Natan nakadawat ug mensahe gikan sa Diyos, nga nag-ingon: 4 “Lakaw, ingna ang akong alagad nga si David, ‘Mao kini ang giingon ni Jehova: “Dili ikaw ang magtukod sa balay nga akong puy-an.+ 5 Kay ako wala magpuyo sa usa ka balay sukad nga akong gipagawas ang Israel hangtod niining adlawa, apan ako nagbalhinbalhin gikan sa usa ka tolda ngadto sa lain ug gikan sa usa ka tabernakulo ngadto sa lain.*+ 6 Sa tibuok panahon nga ako nag-uban sa tibuok Israel, nakadungog ba mo nga ang mga maghuhukom sa Israel kinsa akong gitudlo sa pagbantay sa akong katawhan akong giingnan, ‘Nganong wala ko ninyo tukorig balay nga sedro?’”’

7 “Karon isulti kini sa akong alagad nga si David, ‘Si Jehova sa mga panon miingon niini: “Gikuha ka nako sa sibsibanan, gikan sa pag-atiman sa panon sa mga karnero, aron mahimong pangulo sa Israel nga akong katawhan.+ 8 Ug ako magauban kanimo bisan asa ka moadto,+ ug akong patyon* sa imong atubangan ang tanan nimong kaaway;+ ug ang imong ngalan akong himoon nga sama sa ngalan sa bantogang mga tawo sa yuta.+ 9 Magtudlo kog dapit alang sa akong katawhan nga Israel ug ipahiluna nako sila didto. Sila magpuyo didto ug dili na pagatugawon; ug ang daotang mga tawo dili na magdaogdaog* kanila sama sa ilang ginabuhat kaniadto,+ 10 sukad pa sa adlaw nga nagtudlo kog mga maghuhukom sa Israel nga akong katawhan.+ Ug akong pildihon ang tanan nimong kaaway.+ Dugang pa, sultihan ko ikaw, ‘Si Jehova magtukod ug balay* alang kanimo.’

11 “‘“Dihang matapos na ang imong mga adlaw ug ikaw mahiuban na sa imong mga katigulangan, akong ipatungha ang imong kaliwat* sunod kanimo, ang usa sa imong mga anak,+ ug palig-onon gayod nako ang iyang pagkahari.+ 12 Siya ang magtukod ug balay alang kanako,+ ug ako gayong palig-onon ang iyang trono hangtod sa hangtod.+ 13 Ako mahimong iyang amahan, ug siya mahimong akong anak.+ Dili nako kuhaon ang akong maunongong gugma kaniya+ sama sa akong pagkuha niini sa usa nga nauna kanimo.+ 14 Ako siyang itudlo sa akong balay ug sa akong gingharian hangtod sa hangtod,+ ug ang iyang trono magpabilin hangtod sa hangtod.”’”+

15 Gisulti ni Natan kang David kining tanan ug kining tibuok nga panan-awon.

16 Tungod niini, si Haring David misulod ug milingkod sa atubangan ni Jehova ug miingon: “Kinsa ba ko, Oh Jehova nga Diyos? Ug unsa ba ang akong panimalay nga imo mang gibuhat kining tanan kanako?+ 17 Ug dili kay kana ra, Oh Diyos, naghisgot pa gyod ka nga ang panimalay sa imong alagad magpabilin sa taas kaayong panahon sa umaabot,+ ug imo kong gilantaw nga daw usa ka tawo nga takos sa dugang pa nga pagbayaw,* Oh Jehova nga Diyos. 18 Unsa pa may ikasulti kanimo sa imong alagad nga si David bahin sa imong pagpasidungog kanako nga ikaw nakaila man kaayo sa imong alagad?+ 19 Oh Jehova, tungod sa imong alagad ug sa gikahukom sa imong kasingkasing,* imong gibuhat kining tanang dagkong butang pinaagi sa pagpadayag sa imong pagkagamhanan.+ 20 Oh Jehova, walay sama kanimo,+ ug walay laing Diyos gawas kanimo;+ ang tanan nga among nadungog nagpamatuod niini. 21 Ug unsang nasora sa yuta ang sama sa Israel nga imong katawhan?+ Ikaw, ang matuod nga Diyos, miadto sa pagtubos kanila aron mahimo silang imong katawhan.+ Imong gipabantog ang imong ngalan pinaagi sa imong dagko ug makapahingangha nga mga buhat,+ nga nag-abog sa mga nasod pahilayo sa imong katawhan,+ kinsa imong gitubos gikan sa Ehipto. 22 Gihimo nimo ang Israel ingong imong katawhan hangtod sa hangtod;+ ug ikaw, Oh Jehova, nahimong ilang Diyos.+ 23 Karon, Oh Jehova, hinaot nga ang imong gisaad labot sa imong alagad ug labot sa iyang panimalay mahimong kasaligan hangtod sa hangtod, ug hinaot nga imong buhaton ang sumala sa imong gisaad.+ 24 Hinaot nga ang imong ngalan magpabiling kasaligan ug mabayaw+ hangtod sa hangtod, aron ang katawhan moingon, ‘Si Jehova sa mga panon, ang Diyos sa Israel, Diyos gayod sa Israel,’ ug hinaot nga ang panimalay sa imong alagad nga si David mahimong lig-on sa imong atubangan.+ 25 Kay gipadayag nimo sa imong alagad, Oh akong Diyos, ang imong katuyoan nga tukoran siya ug balay.* Busa ang imong alagad nakabaton ug pagsalig sa pag-ampo niini kanimo. 26 Ug karon, Oh Jehova, ikaw ang matuod nga Diyos, ug imong gisaad kining maayong mga butang labot sa imong alagad. 27 Busa hinaot nga malipay ka sa pagpanalangin sa panimalay sa imong alagad, ug hinaot nga kini magpabilin sa imong atubangan hangtod sa hangtod, kay ikaw, Oh Jehova, nagpanalangin, ug kini panalanginan hangtod sa hangtod.”