Jeremias
16 Nakadawat na usab kog mensahe gikan kang Jehova, nga nag-ingon: 2 “Ayaw pagminyo ug ayaw pagbaton ug mga anak nga lalaki ug babaye niining dapita. 3 Kay kini ang giingon ni Jehova bahin sa mga anak nga lalaki ug babaye nga nangatawo dinhi ug bahin sa ilang inahan nga nanganak kanila ug sa ilang amahan nga nagpakatawo kanila niining yutaa: 4 ‘Sila mamatay tungod sa makamatayng mga sakit,+ apan walay magbangotan alang kanila o maglubong kanila; sila mahisamag kinalibang diha sa nawong sa yuta.+ Sila mangamatay pinaagi sa espada ug gutom,+ ug ang ilang mga patayng lawas mahimong pagkaon sa mga langgam sa kalangitan ug sa mga mananap sa yuta.’
5 Kay kini ang giingon ni Jehova,
‘Ayawg sulod sa balay diin may kombira alang sa mga nagbangotan,
Ug ayawg adto aron magminatay o mosimpatiya.’+
‘Kay gikuha nako ang akong pakigdait gikan niini nga katawhan,’ miingon si Jehova,
‘Ingon man ang akong maunongong gugma ug kaluoy.+
6 Ang mga prominente ug ang ubos nga mga tawo mamatay niining yutaa.
Sila dili ilubong,
Walay magbangotan alang kanila,
Ug walay magsamad sa iyang kaugalingon o magpaupaw tungod kanila.*
7 Ug walay magtaganag pagkaon alang niadtong mga nagbangotan,
Aron hupayon sila kay sila namatyan;
Ug walay maghatag kanilag kopa sa bino nga makapahupay
Aron ilang imnon kay namatyan silag amahan o inahan.
8 Ug ayawg sulod sa balay nga may kombira
Aron mokaon ug moinom uban kanila.’
9 “Kay kini ang giingon ni Jehova sa mga panon, ang Diyos sa Israel, ‘Sa inyong panahon ug sa inyo mismong atubangan, akong pahunongon niining dapita ang mga tingog sa kasadya ug kalipay, ang tingog sa pamanhonon ug ang tingog sa pangasaw-onon.’+
10 “Dihang isulti nimo niini nga katawhan kining tanan, sila mangutana kanimo, ‘Nganong gisulti ni Jehova kining tanang dagkong katalagman batok kanamo? Unsay among sayop ug sala kang Jehova nga among Diyos?’+ 11 Angay nimo silang tubagon, ‘“Kay gibiyaan ko sa inyong mga katigulangan,”+ miingon si Jehova, “ug nagpadayon sila sa pagsunod, pag-alagad, ug pagyukbo sa ubang mga diyos.+ Apan ila kong gibiyaan, ug wala nila tumana ang akong balaod.+ 12 Ug migawi mo nga mas daotan pa kay sa inyong mga katigulangan,+ ug ang matag usa kaninyo wala gyod mopatuo ug misunod hinuon sa iyang daotang kasingkasing imbes mosunod kanako.+ 13 Busa papahawaon mo nako gikan niining yutaa ngadto sa yuta nga wala ninyo mailhi o sa inyong mga katigulangan,+ ug didto mapugos mo sa pag-alagad sa ubang mga diyos adlaw ug gabii,+ kay dili ko magpakitag kaluoy kaninyo.”’
14 “‘Apan ang mga adlaw moabot,’ miingon si Jehova, ‘dihang sila dili na moingon: “Ingon nga si Jehova buhi, nga nagpagawas sa katawhan sa Israel gikan sa yuta sa Ehipto!”+ 15 kondili: “Ingon nga si Jehova buhi, nga nagpagawas sa katawhan sa Israel gikan sa yuta sa amihanan ug gikan sa tanang kayutaan diin iyang gipatibulaag sila!” ug dad-on nako silag balik sa ilang yuta, nga akong gihatag sa ilang mga katigulangan.’+
16 ‘Ania, magpatawag kog daghang mangingisda,’ miingon si Jehova,
‘Ug sila mangisda alang kanila.
Human niana magpatawag kog daghang mangangayam,
Ug sila mangayam kanila sa matag bukid ug sa matag bungtod
Ug sa mga giwang sa dagkong bato.
17 Kay ang akong mga mata nagtan-aw sa tanan nilang ginahimo.*
Kini wala matago kanako,
Ug ang ilang kasaypanan wala matago kanako.
18 Bug-os nakong panimaslan ang tanan nilang kasaypanan ug sala,+
Kay ilang gihugawan ang akong yuta pinaagi sa walay kinabuhing mga imahen* sa ilang makaluod nga mga idolo
Ug ilang gipuno ang akong panulondon sa ilang dulumtanang mga butang.’”+
19 Oh Jehova, ang akong kusog ug akong salipdanan,
Akong dapit nga kalagiwan sa adlaw sa kasakit,+
Kanimo manganha ang kanasoran gikan sa kinatumyan sa yuta,
Ug sila moingon: “Ang among mga katigulangan nakapanunod ug dakong kabakakan,
Kawang ug walay pulos nga mga butang.”+
20 Makabuhat ba ang tawo ug mga diyos alang sa iyang kaugalingon?
Ang iyang gibuhat dili tinuod nga mga diyos.+
21 “Busa pahibaloon nako sila,
Niining higayona ipaila nako kanila ang akong gahom ug ang akong kusog,
Ug sila mahibalo gayod nga ang akong ngalan maoy Jehova.”