Jeremias
20 Karon si Pasur nga anak ni Imer, ang saserdote, nga mao usab ang pangunang opisyal sa balay ni Jehova, namati dihang nanagna si Jeremias niining mga butanga. 2 Unya gidapatan ni Pasur si propetang Jeremias ug gibutang siya sa sepohan*+ sa Ibabaw nga Ganghaan ni Benjamin, nga didto sa balay ni Jehova. 3 Apan pagkasunod adlaw, dihang gibuhian ni Pasur si Jeremias gikan sa sepohan, si Jeremias miingon kaniya:
“Ginganlan ka ni Jehova ug Kalisang sa Tibuok Palibot,+ dili Pasur. 4 Kay kini ang giingon ni Jehova, ‘Akong ipahinabo nga malisang ka ug ang imong mga higala, ug imo mismong makita nga mapukan sila pinaagi sa espada sa ilang mga kaaway;+ ug akong itugyan ang tibuok Juda ngadto sa kamot sa hari sa Babilonya, ug iya silang idestiyero sa Babilonya ug pamatyon pinaagi sa espada.+ 5 Ug ang tanang bahandi niining siyudara, ang tanang kahinguhaan niini, ang tanang bililhong butang niini, ug ang tanang bahandi sa mga hari sa Juda akong ihatag sa ilang mga kaaway.+ Ug ila kining panguhaon ug dad-on sa Babilonya.+ 6 Ug kon bahin kanimo, Pasur, ug sa tanang nagpuyo sa imong balay, kamo mabihag. Dad-on ka sa Babilonya ug didto ka mamatay, ug didto ka ilubong uban sa tanan nimong higala, kay nanagna kag kabakakan kanila.’”+
7 Imo kong gilimbongan, Oh Jehova, ug ako nalimbongan.
Gigamit nimo ang imong kusog batok kanako, ug milampos ka.+
Nahimo kong kataw-anan sa tibuok adlaw;
Ang matag usa nagtamay kanako.+
8 Kay matag higayon nga mosulti ko, kinahanglan kong motuaw ug mopahayag,
“Kapintasan ug kalaglagan!”
Tungod sa pulong ni Jehova, ako giinsulto ug giyagayagaan sa tibuok adlaw.+
Apan sa akong kasingkasing nahisama kinig kalayo nga nagdilaab sulod sa akong kabukogan,
Ug gikapoy na kog pinugong niini;
Dili na nako kini maagwanta.+
“Hukmi siya; hukman nato siya!”
Ang matag tawo nga nagpakaaron-ingnong may pakigdait kanako nagbantay sa akong pagkapukan:+
“Tingalig malimbongan siya ug makahimog sayop,
Ug makadaog ta ug makapanimalos kaniya.”
11 Apan si Jehova nag-uban kanako samag makahahadlok nga manggugubat.+
Mao nga kadtong mga naglutos kanako mangapukan ug dili modaog.+
Sila maulawan pag-ayo, kay sila dili molampos.
Ang ilang walay kataposang kaulawan dili makalimtan.+
12 Apan ikaw, Oh Jehova sa mga panon, nagausisa sa matarong;
Imong nakita ang kinasulorang mga hunahuna* ug ang kasingkasing.+
13 Pag-awit mo kang Jehova! Dayega ninyo si Jehova!
Kay iyang giluwas ang kabos gikan sa kamot sa mga mamumuhat ug daotan.
14 Tinunglo ang adlaw nga natawo ko!
Hinaot nga ang adlaw nga gihimugso ko sa akong inahan dili mapanalanginan!+
15 Tinunglo ang tawo nga nagdalag maayong balita sa akong amahan, nga nag-ingon:
“Natawo kanimo ang usa ka anak, usa ka lalaki!”
Nga nakapalipay kaniya pag-ayo.
16 Hinaot nga kanang tawhana mahisamag mga siyudad nga gipukan ni Jehova nga walay pagbasol.
Hinaot nga makadungog siyag singgit sa kabuntagon ug tingog sa pasidaan sa kaudtohon.