Jeremias

40 Si Jeremias nakadawat ug mensahe gikan kang Jehova human siya buhii ni Nebuzaradan+ nga pangulo sa mga bantay gikan sa Rama.+ Gikuha niya siya didto nga pinosasan, ug lakip siya sa tanang destiyero sa Jerusalem ug Juda nga dad-on sa Babilonya. 2 Unya gikuha sa pangulo sa mga bantay si Jeremias ug giingnan: “Si Jehova nga imong Diyos nagtagna niini nga katalagman batok niining dapita, 3 ug gipahinabo kini ni Jehova sumala sa iyang gisulti, kay kamo nga katawhan nakasala kang Jehova ug wala mosunod sa iyang tingog. Mao nga kini nahitabo kaninyo.+ 4 Karon tangtangon nako ang imong mga posas. Kon maayo alang kanimo nga mouban kanako sa Babilonya, uban nako, ug atimanon ka nako. Apan kon dili ka gustong mouban sa Babilonya, ayawg uban. Tan-awa! Ang tibuok yuta anaa sa imong atubangan. Adto kon asa nimo gusto.”+

5 Samtang wala pa makadesisyon si Jeremias nga mobalik, si Nebuzaradan miingon: “Balik kang Gedalias+ nga anak ni Ahikam+ nga anak ni Sapan,+ nga gitudlo sa hari sa Babilonya nga magdumala sa mga siyudad sa Juda, ug puyo uban kaniya taliwala sa katawhan; o adto bisan asa nimo gusto.”

Unya gihatagan siya sa pangulo sa mga bantay ug pagkaon ug gasa, ug gipalakaw siya. 6 Busa si Jeremias miadto sa Mizpa+ kang Gedalias nga anak ni Ahikam ug mipuyo uban kaniya taliwala sa katawhan nga nahibilin sa yuta.

7 Sa ulahi, ang tanang pangulo sa kasundalohan nga didto sa kapatagan uban sa ilang mga tawo nakadungog nga gitudlo sa hari sa Babilonya si Gedalias nga anak ni Ahikam nga magdumala sa yuta ug magdumala sa mga lalaki, mga babaye, ug mga bata taliwala sa mga kabos sa yuta nga wala dad-a sa Babilonya.+ 8 Busa miadto sila kang Gedalias sa Mizpa.+ Sila mao si Ismael+ nga anak ni Netanias, si Johanan+ ug Jonatan nga mga anak ni Karea, si Seraias nga anak ni Tanhumet, ang mga anak ni Epai nga Netopahanon, ug si Jezanias+ nga anak sa Maacatnon, uban ang ilang mga tawo. 9 Si Gedalias nga anak ni Ahikam nga anak ni Sapan nanumpa kanila ug sa ilang mga tawo: “Ayaw mog kahadlok sa pag-alagad sa mga Caldeanhon. Puyo mo sa yuta ug alagari ang hari sa Babilonya, ug mamaayo ang inyong kahimtang.+ 10 Kon bahin kanako, magpabilin ko sa Mizpa aron morepresentar kaninyo* sa mga Caldeanhon nga moanhi kanato. Busa pagtigom mog bino, mga bunga sa ting-init, ug lana ug isulod kini sa inyong mga sudlanan ug pamuyo mo sa mga siyudad nga inyong nasakop.”+

11 Ug ang tanang Hudiyo nga didto sa Moab, Ammon, ug Edom, ingon man kadtong didto sa tanang ubang kayutaan, nakadungog usab nga gitugotan sa hari sa Babilonya nga dunay mahibilin nga magpuyo sa Juda ug nga iyang gitudlo si Gedalias nga anak ni Ahikam nga anak ni Sapan nga magdumala kanila. 12 Busa ang tanang Hudiyo namalik gikan sa tanang dapit diin sila gipatibulaag, ug sila nangadto sa yuta sa Juda, ngadto kang Gedalias sa Mizpa. Ug sila nagtigom ug daghan kaayong bino ug bunga sa ting-init.  

13 Si Johanan nga anak ni Karea ug ang tanang pangulo sa kasundalohan nga didto sa kapatagan nangadto kang Gedalias sa Mizpa. 14 Sila miingon kaniya: “Wala ba ka mahibalo nga si Baalis, ang hari sa mga Ammonhanon,+ nagpadala kang Ismael nga anak ni Netanias sa pagpatay kanimo?”+ Apan wala motuo kanila si Gedalias nga anak ni Ahikam.

15 Unya sekretong giingnan ni Johanan nga anak ni Karea si Gedalias sa Mizpa: “Gusto nakong adtoon ug patyon si Ismael nga anak ni Netanias, ug walay usa nga makahibalo niini. Nganong patyon man ka niya, ug nganong kinahanglan mang matibulaag ang tanang katawhan sa Juda nga namalik kanimo ug mangalaglag ang mga nahibilin sa Juda?” 16 Apan si Gedalias+ nga anak ni Ahikam miingon kang Johanan nga anak ni Karea: “Ayaw kinig buhata, kay dili tinuod ang imong gipanulti bahin kang Ismael.”