147 Dayega si Jah!
Maayo nga mag-awit ug mga pagdayeg sa atong Diyos;
Makapalipay ug angay gayod ang pagdayeg kaniya!+
2 Gitukod ni Jehova ang Jerusalem;+
Gitigom niya ang natibulaag nga mga molupyo sa Israel.+
3 Giayo niya ang mga dugmok ug kasingkasing;
Gibugkosan niya ang ilang mga samad.
4 Ginaihap niya ang gidaghanon sa mga bituon;
Gitawag niya silang tanan sa ilang ngalan.+
5 Ang atong Ginoo gamhanan kaayo;+
Dili matukib ang iyang pagsabot.+
6 Gibayaw ni Jehova ang mga maaghop,+
Apan ang mga daotan gipaubos niya sa yuta.
7 Pag-awit kang Jehova ug awit sa pagpasalamat;
Pag-awit ug mga pagdayeg sa atong Diyos, nga dinuyogag alpa,
8 Ang Usa nga nagtabon ug mga panganod sa kalangitan,
Ang Usa nga nagtaganag ulan sa yuta,+
Ang Usa nga nagpaturok ug sagbot sa kabukiran.+
9 Siya nagahatag ug pagkaon sa mga mananap,+
Sa mga kuyabog nga uwak nga nangayo niini.+
10 Wala siya malipay sa kusog sa kabayo;+
Wala siya makadayeg sa lig-ong mga bitiis sa tawo.+
11 Si Jehova nalipay sa mga may kahadlok kaniya,+
Sa mga naghulat sa iyang maunongong gugma.+
12 Himayaa si Jehova, Oh Jerusalem.
Dayega ang inyong Diyos, Oh Zion.
13 Gipalig-on niya ang mga trangka sa mga ganghaan sa imong siyudad;
Gipanalanginan niya ang imong mga anak.
14 Siya nagdalag pakigdait sa imong teritoryo;+
Gitagbaw ka niya sa kinamaayohang trigo.+
15 Siya naghatag ug sugo sa yuta;
Ang iyang pulong nakaabot dayon didto.
16 Nagpaulan siyag niyebe nga samag balhibo sa karnero;+
Nagsabwag siyag pino nga yelo nga samag nagsabwag ug abo.+
17 Gipaulan niya ang iyang mga yelo nga sama sa mga tipik sa tinapay.+
Kinsay makaantos sa katugnaw?+
18 Naghatag siyag sugo, ug ang mga yelo nangatunaw.
Gipahuros niya ang iyang hangin,+ ug ang katubigan midagayday.
19 Gisulti niya ang iyang pulong kang Jacob,
Ang iyang mga regulasyon ug mga hukom ngadto sa Israel.+
20 Wala niya kana buhata sa ubang mga nasod;+
Wala silay nahibaloan bahin sa iyang mga hukom.
Dayega si Jah!+