1987—Tuig sa mga Walay Balay
INIGTIKYOP sa kagabhion, kaliboan nga tawo sa Bombay, São Paulo, Mexico City, New York City, ug kawhakawhaan pang ubang siyudad manghigda sa mga tulay-agianan, sa silong sa mga taytayan, ug sa asiras. Sila manikutkot sulod sa karton, motuyhad sa paghigda sa gihanig gum-os nga mga peryodiko, o mahikatulog ibabaw sa semento lamang. Ang usa ka gatos ka milyong walay balay sa kalibotan nahiabot na sa “balay.”
Bisan pa niana, ang minilyon maoy walay balay sa lain pang diwa. Sila nagapuyo ingong mga eskuwater sa dili-legal ug mangil-ad nga mga dapit sa mga payag, mga dapit sa mga barongbarong diin ang mga kalye mao ang mga banyo ug ang nagaatang nga mga langgam mao ang mga tighipos sa basura. Ang ilang minaomaong “mga balay” mao ang mga payag nga nagatulo ang atop nga binuhat sa mga sako, mga sawali, pinipi nga mga dram sa aseite, lapok, ug mga bato. Kapin sa katunga sa tanang molupyo sa siyudad sa Ikatulong Kalibotan nagapuyo nianang mangil-ad kaayong mga kahimtang.
Aron ihatag ang bug-os nga pagtagad sa kalibotan sa kahimtang sa mga tagasiyudad nga walay balay ug sa pagpauswag sa ilang mga pamuyo, ang organisasyong Hiniusang Kanasoran nagdeklarar sa 1987 nga Internasyonal nga Tuig sa Walay Balay.
“Sa tibuok kalibotan, kinahanglang atong amgohon nga kita dili na makalikay pa niining sulirana,” matud ni Max van der Stoel, tsirman sa Olandes Nasyonal nga Komite sa Tuig sa Walay Balay. “Kini usa sa labing seryosong mga suliran sa kalibotan.” Ug nagadako ang suliran. Ang NieuwsBrief voor het International Jaar van de Daklozen (Newsletter for the International Year of the Homeless) nagabanabana nga sa umaabot nga napulo ka tuig o kapin pa, usa pa ka bilyong tawo modugang sa ilang mga payag ngadto sa naghuot nang mga dapit sa barongbarong sa siyudad—nga magdoble sa populasyon sa daghang siyudad sa Ikatulong Kalibotan!
Unsa ba ang mahimo bahin sa suliran? Ang pagpapas sa mga dapit sa barongbarong makapadaghan lamang sa mga tawong walay balay. Busa ang HK, hinunoa, nagapalabi sa pagpaarang-arang sa mga dapit sa barongbarong, pinaagi sa pagtagana nianang mga dapita sa pangunang mga tagana, sama sa mga pasilidad sa sanitasyon. Ug inay sa pagpadalag mga buldoser—nga magbilin sa agi sa napinong mga payag ug katawhang nawad-ag paglaom—ang mga gobyerno makahatag sa mga eskuwater sa seguridad bahin sa balay, tingali sa matang sa pagpaabang. Ang HK nagrekomendar sa dugang pa nga ang pondo sa siyudadnong kaugmaran pauswagan ug dako kay, sumala pa sa newsletter, “ang balay, uban sa pagkaon ug sinina, nahisakop sa labing pangunang panginahanglan sa tawo.”
“Ang pagkaon ug panapot” sa pagkamatuod maoy pangunang mga kinahanglanon. (1 Timoteo 6:8) Ug ang Diyos nagadasig kanato sa pagbuhat sa mga buhat sa tawhanong kalulot aron ihatag ang hinabang niadtong nakulangan, ilabina ang atong isigkamagtutuo. (1 Juan 3:17; Galacia 6:10) Bisan pa niana, ang Pulong sa Diyos nagatabang kanato sa pagbatog matinud-anong panghunahuna sa mga suliran sa katawhan. Miingon si Haring Solomon: “Ang gihimong baliko dili na matul-id.” (Ecclesiastes 1:15) Busa, ang mga proyekto sama sa Internasyonal nga Tuig sa Walay Balay, bisan pag maayog tuyo, dili bug-os makasulbad sa mga suliran sa tawo.
Ang mga walay balay ba mawad-ag paglaom tungod niini? Sa kaatbang! Panahon sa ikaunom nga siglo W.K.P., si Jehova nga Diyos nagtagna sa usa ka “proyekto sa mga balay” nga pagatukoron sa Juda—usa ka yuta nga mahimo unang “kamingawan, nga walay magapuyo” sulod sa 70 ka tuig. (Jeremias 9:11; 29:4, 5, 10; 32:43) Sa susama, ang mga walay balay karong adlawa makatino nga ipasig-uli ni Jehova ang katawhan sa tibuok-kalibotang gidak-on. (Isaias 65:21) Nan, makapalipay ang pagkahibalo nga ang Tuig sa Walay Balay pagasundan sa dili madugay sa usa ka milenyo nga mopatungha sa tinuod nga kalinaw, kasegurohan, ug igong balay!—Pinadayag 20:4; 21:3, 4.