“Tahora ang Imong Amahan ug ang Imong Inahan”
KADTONG mga pulonga nakaabot kanato gikan sa kakaraanan, daghang kasiglohan una pa sa panahon ni Kristo. Sila gidala gikan sa tumoy sa bukid, gisulat diha sa bato pinaagi sa tudlo sa Diyos. Gigamit si Moises sa pagpanguna sa nabihag nga mga Israelinhon sa paggawas gikan sa pagkaulipon sa Ehipto, diha sa Pulang Dagat, ug ngadto sa kampo diha sa tiilan sa batoon nga Bukid sa Sinai. Human nga migugol ug 40 ka adlaw ug gabii uban kang Jehova sa Bukid sa Sinai, si Moises milugsong uban sa duha ka papan nga bato nga diha niana gisulat ang Napulo ka Sugo.—Exodo 34:1, 27, 28.
Diha sa usa niini nga papan nahisulat ang ikalimang sugo, nga karon makita diha sa Bibliya sa Exodo kapitulo 20, bersikulo 12. Kini mabasa sa mosunod: “Tahora ang imong amahan ug ang imong inahan aron motaas ang imong mga adlaw sa yuta nga gihatag kanimo ni Jehova nga imong Diyos.” Sumala kang apostol Pablo, kini maoy “unang sugo nga may saad,” nga ang saad mao: “Aron motaas ang imong mga adlaw sa yuta.”—Efeso 6:1-3.
Ang kahibulongang pasundayag sa kalayo ug aso ug ang makahahadlok nga paglinog sa Bukid sa Sinai sa panahon sa paghatag sa Napulo ka Sugo madulaong nagmantala sa kahinungdanon, apil ang ikalima, sa pagtahod sa amahan ug sa inahan. Unsay nalangkit sa pagpakita sa mao nga pagtahod? Dili lamang pagtahod ug pagsugot kondili pag-atiman ug pagsuportar sa materyal nga paagi kon gikinahanglan.
Kini gitin-aw kasiglohan sa ulahi sa dihang si Jesus nakiglalis uban sa mga eskriba ug mga Pariseo mahitungod sa ilang binaba nga mga tradisyon. Gipunting ni Jesus nga kon sila modumili sa pagsuportar sa materyal sa nanginahanglang mga ginikanan, sila napakyas sa pagtahod sa ilang amahan o inahan. Siya miingon ngadto kanila, ingon sa girekord sa Mateo 15:3-6: “Ang Diyos miingon, ‘Tahora ang imong amahan ug ang imong inahan’; ug, ‘Ang magasultig daotan batok sa iyang amahan o inahan kinahanglan gayod nga siya patyon.’ Apan kamo nag-ingon, ‘Kon may makaingon lang ngadto sa iyang amahan o inahan: “Ang akong nabatonan nga inyong mapahimuslan maoy usa ka gasa nga gipahinungod ngadto sa Diyos,” siya dili na angay motahod pa sa iyang amahan.’ Ug busa inyong gipakawalay-bili ang pulong sa Diyos tungod sa inyong mga tradisyon.”
Sa bahin ni Jesus, siya nagpakita ug pagkamasinugtanon sa iyang mga ginikanan, nagpasakop kanila. (Lucas 2:51) Sa katuigan sa ulahi, sa dihang siya himalatyon diha sa kahoy sa pagsakit, iyang gipakita ang iyang pagtahod sa iyang inahan pinaagi sa paghimog mahigugmaong tagana alang sa iyang pag-atiman ug suportar.—Juan 19:25-27.
Si apostol Pablo nahibalo gayod nga kini maoy kinahanglanon sa Diyos alang sa mga anak, ug bisan sa mga apo, sa pag-atiman sa nanginahanglang mga ginikanan. Ug, makaiikag, iyang gilangkit ang maong materyal nga tabang sa pagpakitag pagtahod: “Tahora ang mga balo nga tinuod mga balo. Apan kon ang mga balo adunay mga anak o mga apo, patun-a sila una sa pagbuhat sa diyosnong debosyon diha sa ilang kaugalingong panimalay ug sa padayon sa paghatag sa angay nga balos sa ilang mga ginikanan ug mga apohan, kay kini dalawaton sa panan-aw sa Diyos.” (1 Timoteo 5:3, 4) Ang imong mga ginikanan nag-atiman kanimo sa dihang ikaw wala pay buot ug bata pa; sa ilang pagkatigulang, imo nang panahon ang pagtabang kanila sa ilang mga panginahanglan.