“Mga Abnormalidad sa Pagkaon”—Sanong sa Among mga Magbabasa
ANG mga artikulo sa Pagmata! bahin sa ulohan nga “Mga Abnormalidad sa Pagkaon—Unsay Mahimo?” (Disyembre 22, 1990) nagpatunghag daghan kaayong sulat. Ang mga magbabasa gikan sa tibuok kalibotan misulat sa pagpasalamat kanamo tungod sa paghisgot niining delikado ug kasagarang makapasilo nga ulohan. Ang mga artikulo nakapatandog sa balatian sa daghan nga dugay nang nakigbisog sa mga abnormalidad sa pagkaon.
Pananglitan, usa ka babaye misulat: “Minahal nga Ginoo o Ginang: Ang Watchtower Bible and Tract Society takos sa labing taas nga komendasyon tungod sa artikulo niini bahin sa mga abnormalidad sa pagkaon. Kay girekonosir nga may anorexia sa 9 anyos pa, ako nakigbisog niini sa 34 anyos. Kay nakabasa sa halos tanang basahon nga mabatonan bahin sa mga abnormalidad sa pagkaon ug nakasinati sa nagkadaiyang mga terapiya, ako matinud-anong makaingon nga ang presentasyon diha sa Pagmata! mao ang labing maayo nga sukad akong nahibalag. Walay basahon o magtatambag ang nakapresentar ug espirituwal nga panglantaw nga masakopon sama sa artikulo sa Pagmata! Sa unang panahon, akong nasabtan ang anorexia sumala sa pagsabot sa Diyos niini.”
Daghan ang nagapadapat na sa tambag sa mga artikulo. Usa ka babaye misulat: “Sa gibasa nako ang artikulo, ‘Kinsay Makaugmad sa mga Abnormalidad sa Pagkaon?’ ako natingala sa pagkabasa sa kahubitan sa akong kinaiya. Ang matag punto nga gihisgotan diha sa artikulo ‘Pagdaog sa Bugno!’ nakatabang kaayo nako. Natul-id na nako ang akong mga pagtuo. Nakahupay ang pagkasayod nga ang uban, bisan mga Kristohanon, nagbaton niining samang suliran. Naghunahuna ako niadto nga ako lamang ang anaa niana.”
Usa ka 25-anyos nga babaye misulat: “Nag-antos ako sa bulimia sukad ako 13 anyos. Gigugol ko ang tibuok tuig sa 1989 ug bahin sa 1988 diha sa grabe, makapainutil nga depresyon. Sa kaduha ako misulay gani sa paghikog. Ako makalangkit sa kaisipan sa maong labing makapatandog nga mga artikulo ug nagpadapat na sa pipila sa mga sugyot ug maayong tambag. Ang mga artikulo naghatag kanakog labaw nga tunong ug dulnganan. Kini tino nga usa ka isyu nga tinuod kong MAHALON ug konsultahon kanunay!”
“Gibalikbalik ko pagbasa ang magasin,” misulat ang usa ka batan-ong babaye nga nakigbisog sa mga abnormalidad sa pagkaon sulod sa napulo ka tuig. “Bag-o pa akong nakadawat nga ako may problema. Ang pagkasayod nga buot ni Jehova nga motabang ug dili kita biyaan kon kita may kakulian maoy dako kaayong kahupayan.”
“Gibati ko nga gibasa ko ang akong kaugalingong mga pagbati!” misulat ang usa ka batang babaye. “Ang maong artikulo nakatabang nga ako magmapadayganon ug makigsulti sa akong inahan, ug karon ako mas makaarang sa pagdumala sa akong mga pagbati sa akong kaugalingon.” Usa ka 16-anyos nga babaye misulat: “Ako nagakaulian na gikan sa anorexia nervosa. Ako nag-ampo kang Jehova nga may makasabot unta sa akong sakit. Gipakita kanako sa Pagmata! nga nabatonan ko na ang maong mga tawo alirong nako. Ako nakabaton sa akong pamilya, sa daghang Saksi ni Jehova nga akong mga higala, ug ilabina ako nagbaton kang Jehova. Hinaot ang Disyembre 22 nga isyu sa Pagmata! makatabang sa uban sama nga kini nakatabang kanako ug sa akong pamilya.”
Ang usa ka 20-anyos nga babaye diha sa bug-os-panahong ministeryo misulat: “Sa kinadugayang panahon, gisulayan ko pagsulbad ang akong abnormalidad sa pagkaon sa akong kaugalingon. Gibati ko gani sa usa ka panahon nga binuang ang pag-ampo bahin niini. Nakahilak ako sa kalipay sa pagkasayod nga giisip gayod ni Jehova ang maong butang nga importante kaayo.”
“Ekselente kadto! Tininuod gayod ning ako! misulat ang laing babaye. Siya mipadayon: “Ako usa ka naluwas sa daghang kasakitan sa pagkabata, nga ang duha ka pinakadaotan mao ang pag-abuso sa sekso ug rituwal nga pag-abuso. Ang unang duha ka parapo ubos sa sub-ulohang ‘Mga Pagbati sa Kakulang’ tukmang nagbatbat sa paninugdang suliran. Kini tinuod nga usa ka butang maylabot sa pagbansay pag-usab sa kaisipan sa pagkat-on sa pag-angay sa kaugalingon, ug kini dili mahimo sa kaugalingon, sumala sa gipahayag nga maayo.”
Daghan ang maorag mibati nga ang mga artikulo miabot ingong tubag sa ilang mga pag-ampo. “Ang maong mga artikulo wala isulat nga sulagma tungod kay si Jehova tinuod nga nagatubag sa mga pag-ampo!” mipatugbaw ang usa ka magbabasa. Midugang siya: “Bisan pag ako nakigbugno sa ‘Bugno sa Tambok’ sa kinadak-ang bahin sa akong kinabuhi, maoy pagkahuman lang nako sa pagbasa sa artikulo nga akong naamgohan nga ako may seryosong abnormalidad sa pagkaon (bulimia).” Matud sa usa ka 19-anyos nga nakigbugno sa bulimia sulod sa unom ka tuig: “Ako bag-o pang nag-andam sa pagsulat kaninyo sa sinugdan niining bulana sa pagsusi kon kamo makapatungha bag usa ka maayong-pagkasulat nga artikulo bahin niining ulohana. Ako nalipay kaayo nga kamo naghisgot niana nga detalyado ug wala lang magtago o malimot sa isyu sumala sa gihimo sa kadaghanang tawo.”
Usa ka sulat sa yano mabasa: “Ako nag-ampo ug nagpaabot nga mapailobon alang sa mga artikulo bahin sa mga abnormalidad sa pagkaon. Mangayo unta akog impormasyon kon wala pa ako maulaw kaayo bahin niana. Ang kaluoy nga inyong gipakita kanako ingong indibiduwal diha sa mga artikulo naglig-on sa akong pagtuo sa pagbuntog niining suliran sa tanang panahon.” Usa ka hayskul nga babaye misulat: “Naugmad nako ang anorexia nervosa ug bulimia ug busa nag-antos sa hunahuna ug sa lawasnon. Miampo ako kang Jehova alang sa panabang, ug kining mga artikuloha migawas. Ako nakahilak gayod tungod sa kalipay.”
Alang sa daghan, ang pagbasa sa mga artikulo maoy emosyonal nga kasinatian. “Sa pag-abli nako niini,” misulat ang usa ka batan-ong babaye, “ang hapin halos nadawat ko dayon. Ako halos nahadlok sa paghikap niadto. Gibutang ko kadto sa katre sa tupad nako ug gitan-aw lang kana sulod sa pila ka minutos. Ang ako lang nabuhat mao ang pagpasalamat kang Jehova tungod sa mga artikulo. Ako makasabot gayod nga gihigugma ako ni Jehova. Ang mga artikulo nagtabang nako sa pagpabili pag-usab nga ang akong lawas maoy bililhong gasa ug angay nakong tagdon sa ingon.”
“Sa pagbasa nako sa mga artikulo,” misulat ang usa ka babaye, “ug samtang gimakenilya ko kining sulata, dili ako makapugong sa mga luha sa pagdaligdig sa akong mga aping. Ako naayo na sa bulimia ug nangandoy sa usa ka artikulo gikan sa Sosyedad bahin niining ulohana. Ang pagkat-on sa pagdawat sa akong kaugalingon—pagtuo nga ako may bili ug balor sa mga mata ni Jehova ug dili pagtugot nga ang panghunahuna sa ubang mga tawo mag-apektar kon unsay pag-isip nako sa akong kaugalingon—maoy usa sa labing lisod nga mga butang nga sukad kinahanglang akong buhaton. Sa pila ka adlaw kini mas sayon kay sa ubang adlaw, apan ako naningkamot gihapon niini.”
“Maoy uban sa mga mata nga napuno sa mga luha nga akong gisakmit kining magasina ug gibutang sa akong kasingkasing,” misulat ang usa ka 21-anyos nga babaye. “Sulod sa halos nuybe anyos, ako nakigbisog sa tanang tulo ka abnormalidad nga gihisgotan. Ako kanunay mahadlok kaayo sa pagtug-an kang bisan kinsa. Karon, ingong resulta sa praktikal nga tambag nga gihatag, gibati ko nga ako makatakod niining sulirana uban sa tabang sa Diyos. Kini mao gayod ang akong giampo.”
Sa kataposan, usa ka Kristohanong ansiano misulat: “Akong nakaplagan kining mga artikuloha nga dako kaayong tabang. Pagkabililhon nga kitang mga ansiano mainampingong magtuon ug magsabot sa maong impormasyon aron sa pagtabang sa uban, sa sulod ug sa gawas sa kongregasyon!”
Ang maong mga kinutlo nagagikan sa pipila ra sa mga sulat sa apresasyon nga among nadawat. Maoy among tim-os nga paglaom ug pag-ampo nga ang mga artikulo magpadayon sa pagtabang sa mga tawo sa tibuok kalibotan sa pagsagubang niining makaguol nga mga abnormalidad.