Gikan sa Among mga Magbabasa

Ang mga Hudiyo ug ang mga Kristiyano Ako natandog gayod sa pagpahayag sa akong pagpabili alang sa mga serye sa mga artikulo bahin sa mga Hudiyo ug mga Kristiyano. (Hunyo 22, 1991) Ingong usa ka Kristohanong ministro, angay nga isulti nako nga ako mibatig daw kapakyasan kon sa unsang paagi makighisgot ning butanga uban sa mga Hudiyo. Ang artikulo nagpakita nga kita wala magahangyo kanila sa pagbiya sa ilang Hudiyonhong kabilin kondili mao lamang ang pagsusi bahin kay Jesus ug sa Mesiyanikong mga tagna diha sa lamdag sa kamatuoran, dili pinaagi sa tinuis nga kabilinbilin ug bakak nga mga doktrina.

J. L., Tinipong Bansa

Ang artikulo mahimong makapatuo nga ang mga krimen nga gihimo sa Kakristiyanohan pagaisipon nga mas ngilngig kaysa ilaha sa mga Hudiyo. Dili ba mga Hudiyo man ang naglansang sa Anak sa Diyos ngadto sa estaka?

N. L., Alemanya

Ang pagbuno kang Jesu-Kristo, ang Anak sa Diyos, sa pagkamatuod mao ang kinalabwang krimen sa kasaysayan sa tawo. Bisan pa niana, walay ebidensiya nga ang Diyos nagtunglo sa tagsa sa mga kaliwat sa mga nakahimo niadtong maong krimen. Sa kasukwahi, “Ang Diyos walay pinalabi, apan sa matag nasod ang tawo nga nahadlok kaniya ug nagabuhat ug pagkamatarong maoy dalawaton kaniya.” (Buhat 10:34, 35) Samtang walay usa ka nasyonalidad ang tinunglo sa atubangan sa Diyos, ang Kakristiyanohan angay nga manubag alang sa iyang kaagi sa pagkasad-an sa dugo, panglutos, ug relihiyosong kagahian.​—ED.

Atake sa Gang Ako sa tinuoray nakadayeg sa inyong artikulong “Mga Batan-on Nangutana . . . Sa Unsang Paagi Makapanalipod Ako sa Akong Kaugalingon Gikan sa Atake sa Gang?” (Hulyo 22, 1991) Kini miabot sa igong panahon sa dihang ako nanghupaw tungod kay wala masayod sa unsang paagi atubangon kining kahimtanga. Sukad karon ako moamping na sa akong pagpamiste, pagpangareglar, ug pamatasan. Daghan kaayong salamat kaninyo alang sa inyong tabang.

J. H., Hapon

Ang Dakong Impostor Salamat kaninyo sa pagpatik sa artikulong “Gikan sa Apapangig​—Ang Dakong Impostor.” (Hunyo 22, 1991) Ang akong anak babaye subsob sakitan ug ulo ug gitambalan sa nagkadaiyang mga paagi, apan ang hinungdan wala hisayri. Akong gidala ang artikulo sa usa ka dentista; iyang gikuhaan ug rayos ekis ug nakit-an ang suliran. Karon siya nagadawat sa haom nga pagtambal. Ako dili pa usa sa mga Saksi ni Jehova, apan nahinangop sa pagbasa sa Pagmata!

S. M. S., Brazil

Ako usa ka dentista, ug kining artikuloha mahimong usa ka dakong tabang sa daghang tawo. Diyutay ra ang nahibalo nga kining sakita nagalungtad, ug bisan gani kaming mga dentista usahay nagahatag lamang ug diyutayng pagtagad niana. Husto gayod kamo nga ang atong Maglalalang lamang ang adunay sulbad sa tanang mga sakit!

E. F. G., Alemanya

Pagdepensa-sa-Kaugalingon Sa pagbasa sa artikulong “Pagdepensa-sa-Kaugalingon​—Asa Kutob Mahimo Kini sa Usa ka Kristohanon?” (Hulyo 8, 1991), ang usa makatuo nga ang martial arts nagapasiugda ug kaandam alang sa away ug panghagit. Kini dili tinuod. Kadaghanan sa martial arts nagatisok ug pisikal nga pagpugong, disiplina-sa-kaugalingon, ug usa ka pagsabot sa hustisya dinha sa mas labaw nga ang-ang kaysa daghang ubang isports.

T. M., Alemanya

Mahimong tinuod nga ang martial arts naay pipila ka bili alang sa mga nagasalmot. Apan, sila nagatudlo sa usa kon unsaon pag-angol sa isigkatawo, ug kini maoy dili uyon sa prinsipyo sa Bibliya nga mabasa diha sa Isaias 2:4 ug Mateo 26:52.​—ED.