Mapuslanon ba nga Magmatinud-anon?

KAY nakakita sa tuman ka limbongan taliwala sa edarang mga tawo, ang mga batan-on kasagaran nga mokopya sa ilang panig-ingnan. Busa, makapahupay gayod​—ingon man angay himatikdan​—sa dihang may usa nga matinud-anon! Ang Sports Illustrated nagpaila sa maong panig-ingnan sa kamatinud-anon pinaagi sa pahayag: “Aniay usa ka estorya nga magpasig-uli sa pagtuo sa usa.”

Ang magasin mitaho bahin sa usa ka dula sa besbol sa mga batan-on sa Florida, sa Tinipong Bansa. Ang bantay sa unang bes nagsalo sa bola ug misulay sa pagpaawot sa nagdagan paingon sa ikaduhang bes gikan sa una. Ang umpire, si Laura Benson, nag-awot sa nagdagan, pero ang bantay sa unang bes miingon kaniya: “Mam, wala ako makapadapat sa bola sa nagdagan.” Busa gipapabilin ni Benson ang magdudula ug gipabalhin ngadto sa posisyon sa ikaduhang bes.

Panahon sa laing dula duha ka semana sa ulahi, ang samang batan-on nalangkit sa samang maneobra sa dula. Si Benson mao gihapon ang umpire. Sa maong panahon abi niyag wala maawot sa batang lalaki ang nagdagan, ug gitugotan niyang magpabilin sa bes ang magdudula. Bisan tuod ang batang lalaki walay gisulti sa pagbalik niya sa iyang posisyon, iyang namatikdang may deperensiya tungod sa iyang tinan-awan kaniya. Mao nga siya miadto kaniya ug nangutana: “Naawot ba nimo ang nagdagan?”

“Oo,” miingon siya.

Sa gibalit-ad ni Benson ang iyang desisyon ug giawot ang magdudula, ang kaatbang nga mga coach miprotesta. Apan iyang gisaysay kon unsay nahitabo duha ka semana nga miagi ug miingon: “Kon ang usa ka bata ingon ka matinud-anon, kinahanglang ihatag ko kaniya ang paborableng hukom.”

Kadtong limbongan morag mauswagon sa kalibotan karong adlawa. Kini maoy sumala sa giingon kas-a sa salmista sa Bibliya: “Kini sila mao ang mga daotan, kinsa hayahay sa panahong walay katinoan. Ilang napauswag ang ilang katigayonan.” (Salmo 73:12) Apan, sa pagkamatuod ang pagkamatinud-anon sa kataposan mao ang labing mapuslanon. Maangkon sa usa ang pagtahod sa isigkatawo. Apan labi pang hinungdanon, maangkon niini ang pag-uyon ni Jehova nga Diyos, kinsa mahimong moganti sa usa ug kinabuhing walay kataposan.