Kon Nganong Nawad-an Sila sa Ilang Pinuy-anan

TAN-AWA unsay nahitabo karon. Si Adan ug si Eva gipagawas sa tanaman sa Eden. Nahibalo ka ba sa hinungdan?

Tungod kay ilang gibuhat ang butang nga daotan kaayo, usa ka butang nga sila giingnan nga dili buhaton. Ang Diyos nagsulti kanila nga mahimong makakaon sila gikan sa mga kahoy sa tanaman. Apan gikan sa usa ka kahoy ang Diyos nag-ingon nga dili magkaon, o sila hinuon mamatay. Iyang gihuptan kanang kahoya ingon nga iyang kaugalingon. Sumala sa atong nahibaw-an, maoy sayop ang pagkuha sa usa ka butang nga gipanag-iya sa usa ka tawo, dili ba?

Usa ka adlaw, sa dihang si Eva nag-inusara sa tanaman, ang usa ka bitin nakigsulti kaniya. Palandonga kana! Miawhag kini kang Eva sa pagkaon sa bunga sa kahoy nga diin ang Diyos nagsulti kanila nga dili pagakan-on. Karon, kita nahibalo nga ang mga bitin dili makasulti, dili ba? Busa may usa gayod nga naghimo ning bitin nga makasulti. Kinsa kana?

Dili si Adan. Busa segurong usa sa mga manulunda nga gibuhat ni Jehova sa dugay na una pa sa iyang pagbuhat sa yuta. Ang usa ka manulunda nahimong mapahitas-on kaayo. Gusto niyang ang mga tawo mosugot kaniya inay sa pagsugot kang Jehova.

Kining manulunda naghimo sa bitin nga makasulti. Gisultihan niya si Eva nga siya mahisama sa Diyos kon siya mokaon sa bunga, ug siya mituo niini. Busa mikaon siya, ug si Adan mikaon usab. Gisupak nila ang Diyos, ug mao nga nawad-an sila sa ilang matahom nga puluy-anan.

Apan may adlaw ra, tinoon sa Diyos nga ang tibuok yuta mahimong sama ka maanindot sa tanaman sa Eden. Sa ulahi atong makat-onan sa unsang paagi ikaw mahimong makaambit sa paghimo niining ingon. Apan karon, atong susihon unsay nahitabo kang Adan ug Eva.