Si Job Matinumanon sa Diyos

NAKITA mo ba kining masakitong tawo? Ang iyang ngalan maoy Job, ug ang babaye mao ang iyang asawa. Matod niya kang Job: ‘Tungloha ang Diyos ug magpakamatay.’ Ngano mang nakasulti siya sa maong butang? Ug ngano mang si Job nag-antos sa labihan?

Si Job maayong tawo ug masinugtanon kang Jehova. Si Jehova nahigugma kang Job. Apan may usa nga nagdumot kaniya. Nahibalo ka ba kon kinsa siya?

Mao si Satanas nga Yawa. Si Satanas mao ang daotang manulunda nga nagdumot kang Jehova. Naninguha siya sa pagkabig sa matag tawo nga mosupak kang Jehova. Apan milampos ba siya? Wala. Palandonga lamang ang daghan matinumanong lalaki ug babaye nga atong nahibaw-an na. Pila ang imong mahinganlan?

Tapos si Jose namatay sa Ehipto, si Job mao ang labing matinumanong tawo sa tibuok yuta. Si Jehova buot mopakita kang Satanas nga dili tanan daotan, busa siya miingon: ‘Tan-awa unsa kamatinumanon si Job kanako.’

‘Siya matimunanon,’ sumbalik ni Satanas, ‘kay may daghan siyang maayong butang gikan nimo. Kuhaa kini, ug siya magtunglo kanimo.’

Nagkanayon ang Diyos: ‘Buhatang tanang daotan nga gusto mo kang Job. Lamang ayaw siya pagpatya. Tan-awon ta kon siya magtunglo kanako!’

Una, gipakawat ni Satanas sa mga tawo ang mga baka ug mga kamelyo ni Job, ug nangamatay ang iyang mga karnero. Unya ang iyang 10 ka anak lalaki ug anak babaye namatay. Sunod, si Satanas mihampak kang Job sa usa ka makalilisang, sakit nga balatian. Mao kanay hinungdan nga miingon ang asawa ni Job: ‘Tungloha ang Diyos ug magpakamatay.’ Apan si Job wala magbuhat niini. Usab, tulo ka mining mga higala miduaw ug mipasangil nga siya nagkinabuhi nga daotan. Apan si Job nagmatinumanon.

Kini nakalipay kaayo ni Jehova. Iyang gipanalanginan si Job sumala sa makita mo dinhi sa hulagway. Iyang giayo siya, ug gihatagan siyag dugang matahom kabataan, maingon man sa daghan pa kaayong baka, karnero ug mga kamelyo.

Magmatinumanon ka ba kanunay sama kang Job? Kon ikaw magmatinumanon, may adlaw nga ikaw mabuhi sa walay kataposan, dihang ang yuta mahimong tahom samag tanaman sa Eden.