Pagbalik ni Kristo

Kahubitan: Sa wala pa mobiya sa yuta, si Jesu-Kristo misaad nga mobalik. Ang kulba-hinam nga mga hitabo nga maylabot sa Gingharian sa Diyos nalambigit sa maong saad. Kinahanglang matikdan nga adunay kalainan tali sa pag-abot ug presensiya (pagkaania). Busa, samtang ang pag-anhi sa usa ka tawo (maylabot sa iyang pag-abot o pagbalik) mahitabo sa gitakdang panahon, ang iyang presensiya o pagkaania mahimong human niana molungtad pa ug yugto sa mga katuigan. Sa Bibliya ang Gregong pulong erʹkho·mai (nga nagakahulogang “moabot”) gigamit usab mahitungod sa pagpunting sa atensiyon ni Jesus ngadto sa importanteng buluhaton diha sa tinong panahon sulod sa iyang presensiya, nga mao, sa iyang buluhaton ingong berdugo ni Jehova sa gubat sa dakong adlaw sa Diyos nga Labing Gamhanan.

Ang mga hitabo ba nga nalangkit sa presensiya ni Kristo mahitabo sa mubong panahon lamang o molungtad sa yugtong mga katuigan?

Mat. 24:37-39: “Maingon kaniadto sa mga adlaw ni Noe, mao man usab ang mahitabo sa presensiya [“pag-abot,” RS, TEV; “presensiya,” Yg, Ro, ED; Grego, pa·rou·siʹa] sa Anak sa tawo. Kay maingon niadtong mga adlawa sa wala pa ang lunop, nanagpangaon, nanagpanginom, ang mga lalaki nanagpangasawa ug ang mga babaye nanagminyo, hangtod sa adlaw nga si Noe misulod sa arka; ug sila wala manumbaling hangtod sa pag-abot sa lunop ug mibanlas kanilang tanan, mao man usab ang mahitabo sa presensiya sa Anak sa tawo.” (Ang mga hitabo “sa mga adlaw ni Noe” nga gibatbat dinhi nahitabo sa yugtong daghang katuigan. Gitandi ni Jesus ang iyang presensiya sa mga nahitabo niadtong panahona.)

Sa Mateo 24:37 ang Gregong pulong pa·rou·siʹa mao ang gigamit. Kini sa literal nagakahulogan “nga abay.” Ang Greek-English Lexicon ni Liddell ug Scott (Oxford, 1968) mibutyag ug “presensiya, sa mga tawo,” ingon nga mao ang unang paghubit niini sa pa·rou·siʹa. Ang kahulogan sa maong pulong matin-aw nga gihikyad sa Filipos 2:12, diin gipalahi ni Pablo ang iyang presensiya (pa·rou·siʹa) sa iyang pagkawala dinha o absensiya (a·pou·siʹa). Sa laing bahin, sa Mateo 24:30, nga nagtug-an sa “Anak sa tawo nga moabot nga sinapwang sa mga panganod sa langit uban sa kagahom ug dakong himaya” ingong berdugo ni Jehova sa gubat sa Armageddon, ang Gregong pulong gigamit maoy er·khoʹme·non. Ang pipila ka maghuhubad migamit sa ‘pag-abot’ alang sa maong duha ka Gregong pulong, pero sila nga mas mabinantayon mipatin-aw sa kalainan tali sa maong duha ka pulong.

Si Kristo ba mobalik diha sa paagi nga makita sa tawhanong mga mata?

Juan 14:19: “Hamubo na lang ang panahon ug ang kalibotan dili na makakita kanako, apan kamo [matinumanong mga apostol ni Jesus] makakita kanako, tungod kay ang ako buhi ug kamo mabuhi.” (Gipasaligan ni Jesus ang iyang mga apostol nga siya mobalik ra ug dad-on sila sa langit aron mahiuban kaniya. Sila makakita kaniya tungod kay sila mahimong espirituhanong mga linalang sama kaniya. Apan ang kalibotan dili na makakita kaniya pag-usab. Itanding 1 Timoteo 6:16.)

Buh. 13:34: “Siya [ang Diyos] mibanhaw kaniya [si Jesus] gikan sa mga patay nga dili na mobalik sa kadunotan.” (Ang tawhanong mga lawas sa kinaiyanhon maoy madunoton. Maoy hinungdan ang 1 Corinto 15:42, 44 migamit sa pulong “pagkadunot” diha sa susamang han-ay uban sa “unodnong lawas.” Si Jesus dili na gayod maghupot pag-usab sa maong madunot nga lawas.)

Juan 6:51: “Ako ang buhing tinapay nga nanaog gikan sa langit; kon ang bisan kinsa mokaon niining maong tinapay siya mabuhi sa walay kataposan; ug, sa pagkamatuod, ang tinapay nga akong ihatag mao ang akong unod alang sa kinabuhi sa kalibotan.” (Tungod kay gihatag na kana, dili na kana bawion ni Jesus. Sa ingon wala niya hikawi ang katawhan sa mga kaayohan sa maong halad sa iyang hingpit tawhanong kinabuhi.)

Tan-awa usab ang mga panid 348, 349, ubos sa “Rapture.”

Unsa ang kahulogan sa pag-anhi ni Jesus “diha sa samang paagi” sa iyang pagsaka sa langit?

Buh. 1:9-11: “Samtang sila [mga apostol ni Jesus] nanagtan-aw, siya naisa sa kahitas-an ug ang usa ka panganod mibayaw kaniya gikan sa ilang panan-aw. Ug samtang nanagtutok sila sa langit sa nagpaingon siya sa itaas, usab, tan-awa! dihay duha ka lalaking nagbestig maputi nga nagtindog tupad kanila, ug sila miingon: ‘Mga tawo sa Galilea, nganong kamong nagatindog nga nagatutok sa langit? Kining Jesus nga gikuha gikan kaninyo ngadto sa langit mobalik ra sa samang paagi sa inyong nakita siya paingon sa langit.’” (Matikdi nga kini nag-ingong “sa samang paagi,” dili sa samang lawas. Unsa man ang “paagi” sa iyang pagsaka sa langit? Ingon sa gipakita sa Buh 1 bersikulo 9, siya nawala sa panan-aw, ang iyang paggikan napanid-an lamang sa iyang mga tinun-an. Ang kalibotan sa kasagaran wala mahibalo sa nahitabo. Sama niana nga paagi ang pagbalik ni Kristo.)

Unsay kahulogan sa iyang ‘pag-abot nga nakasakay sa mga panganod’ ug ang ‘tanang mata makakita kaniya’?

Pin. 1:7: “Tan-awa! Siya moabot uban sa mga panganod, ug ang tanang mata makakita kaniya, ug kadtong nagdughang kaniya; ug ang tanang kabanayan sa yuta magaminatay sa kaguol tungod kaniya.” (Usab ang Mateo 24:30; Marcos 13:26; Lucas 21:27)

Unsa ang ginapaila sa “mga panganod”? Ang pagkadili makita. Sa dihang ang usa ka ayroplano malibotan sa mabagang panganod o anaa sa ibabaw sa mga panganod, ang mga tawo sa yuta sagad dili makakita niana, bisan tuod madungog tingali nila ang dinaguok sa mga makina. Si Jehova misulti kang Moises: “Ako moanha kanimo sa usa ka mabagang panganod.” Si Moises wala makakita sa Diyos, apan ang maong panganod nagbutyag sa dili makitang presensiya ni Jehova. (Ex. 19:9; tan-awa usab ang Levitico 16:2; Numeros 11:25.) Kon si Kristo makitang mopadayag sa kalangitan, maoy matin-aw nga dili ang “tanang mata” makakita kaniya. Kon siya mopadayag ibabaw sa Australia, pananglitan, siya dili makita didto sa Uropa, Aprika, ug bisan sa mga dapit sa Amerika, di ba no?

Sa unsang kahulogan nga ang ‘tanang mata makakita kaniya’? Ilang masabtan gikan sa mga hitabo ibabaw sa yuta nga siya sa dili makita presente. Usab nga nagpunting sa panan-aw nga dili lawasnon, ang Juan 9:41 nagtaho: “Si Jesus miingon sa [mga Pariseo]: ‘Kon kamo mga buta pa, wala unta kamoy sala. Apan karon nag-ingon kamo, “Kami makakita.” Ang inyong sala nagapabilin.’” (Ikomparar ang Roma 1:20.) Human sa pagbalik ni Kristo, ang ubang mga tawo nagapakitag pagtuo; ginaila nila ang ilhanan sa iyang presensiya. Ang uban nagasalikway sa ebidensiya, apan sa panahong si Kristo molihok na ingong berdugo sa Diyos batok sa mga daotan, bisan sila makasabot tungod sa pagpadayag sa iyang gahom nga ang kalaglagan dili gikan sa mga tawo kondili gikan sa langit. Ilang masabtan ang magakahitabo sanglit kay sila gipasidan-an na man nga abante. Tungod sa mahitabo unya kanila, sila “magaminatay sa kaguol.”

Kinsa man “kadtong nagdughang kaniya”? Kon maohon, ang Romanong mga sundalo ang nagbuhat niini sa panahon sa pagpatay kang Jesus. Pero sila dugay nang mga patay. Busa kini magtumong gayod sa mga tawo nga sa susama nagadaugdaog, o ‘nagadughang,’ sa matuod nga mga sumusunod ni Kristo niining mga panahona sa “kataposang mga adlaw.”—Mat. 25:40, 45.

Mahimo bang tinuod ikasulti nga ang usa ka tawo ‘miabot na’ o nga siya ‘presente’ bisan kon siya dili makita?

Ang apostol nga si Pablo naghisgot sa iyang pagkahimong “wala sa lawas apan presente sa espiritu” uban sa kongregasyon sa Corinto.—1 Cor. 5:3.

Si Jehova naghisgot sa iyang ‘pagkanaog’ aron sa paglahugay sa pinulongan sa mga magtutukod sa torre sa Babel. (Gen. 11:7) Siya usab miingon nga siya “manaog” aron sa pagluwas sa Israel gikan sa pagkaulipon sa Ehipto. Ug ang Diyos mipasalig kang Moises, “Ang akong kaugalingong persona magauban” aron sa pagpanguna sa Israel ngadto sa Yutang Saad. (Ex. 3:8; 33:14) Pero walay kinsa mang tawo sa bisan unsang panahon nga nakakita sa Diyos.—Ex. 33:20; Juan 1:18.

Unsa ang pipila sa mga hitabo nga ang Bibliya nagalambigit sa presensiya ni Kristo?

Dan. 7:13, 14: “Uban sa mga panganod sa kalangitan adunay usa nga sama sa anak sa tawo [Jesu-Kristo] miabot; ug ngadto sa Tigulang sa mga Adlaw [Jehova nga Diyos] siya miduol, ug ilang gidala siya nga haduol gayod sa atubangan nianang Usa. Ug ngadto kaniya gihatag ang pagbulot-an ug himaya ug gingharian, aron ang mga katawhan, nasodnong mga grupo ug mga pinulongan ang tanan kinahanglang mag-alagad kaniya.”

1 Tes. 4:15, 16: “Kay kini ang among ipahayag kaninyo sumala sa pulong ni Jehova, nga kitang mga buhi nga magapabilin pa hangtod sa presensiya sa Ginoo dili gayod magauna kanila nga mga nangamatay; tungod kay ang Ginoo mismo mao ang manaog gikan sa langit inubanan sa singgit sa pagsugo, uban sa tingog sa arkanghel ug sa trumpeta sa Diyos, ug sila nga nangamatay diha kang Kristo mouna sa pagpamangon.” (Busa, silang magamando uban kang Kristo pagabanhawon aron mahiuban kaniya sa langit—una silang nangamatay sa nangagi nang katuigan ug dayon silang mamatay human sa pagbalik sa Ginoo.)

Mat. 25:31-33: “Sa dihang moabot na ang Anak sa tawo diha sa iyang himaya, ug ang tanang manulonda uban kaniya, unya siya molingkod diha sa iyang mahimayaong trono. Ug sa iyang atubangan pagatigomon ang tanang kanasoran, ug iyang pagalainon ang mga tawo gikan sa usag usa, sama gayod sa usa ka magbalantay nga magalain sa mga karnero gikan sa mga kanding. Ug iyang ibutang ang mga karnero sa iyang tuong kamot, apan ang mga kanding sa iyang wala.”

2 Tes. 1:7-9: “Alang kaninyo nga nagaantos sa kasakitan, pagahatagan ug kapahulayan uban kanamo sa pagpadayag sa Ginoong Jesus gikan sa langit uban sa gamhanang mga manulonda diha sa nagadilaab nga kalayo, samtang siya magapahamtang sa panimalos kanilang wala makaila sa Diyos ug kanilang wala magmasinugtanon sa maayong balita mahitungod sa atong Ginoong Jesus. Kini sila mismo makaagom sa hudisyal nga silot sa walay kataposang kalaglagan gikan sa atubangan sa Ginoo ug gikan sa himaya sa iyang kagahom.”

Luc. 23:42, 43: “Siya [ang maluloy-ong mamumuhat sa daotan nga gilansang tupad kang Jesus] nagkanayon sa pag-ingon: ‘Jesus, hinumdomi ako inig-abot mo sa imong gingharian.’ Ug siya mitubag kaniya: ‘Sa pagkamatuod ako nagaingon kanimo karon, Ikaw mahauban kanako sa Paraiso.’” (Ubos sa pagmando ni Jesus, ang tibuok nga yuta mahimong usa ka paraiso; ang mga patay nga anaa sa panumdoman sa Diyos pagabanhawon uban sa kahigayonan sa pagpahimulos sa hingpit nga kinabuhi ibabaw sa yuta sa walay kataposan.)

Tan-awa usab ang mga panid 121-126, ubos sa ulohang “Kataposang mga Adlaw.”