Matapos pa Kaha ang Pag-antos?

“Ang Diyos . . . magpahid sa tanang luha sa ilang mga mata, ug wala nay kamatayon, pag-antos, paghilak, o kasakit.”​—Pinadayag 21:3, 4, Contemporary English Version.

 Makasalig ka nga ang Diyos dili maoy hinungdan sa imong mga problema.​—Santiago 1:13.

 Mahupayan kang mahibalo nga ang Diyos nakasabot gyod sa imong gibati dihang ikaw mag-antos.​—Zacarias 2:8.

 Makasalig ka nga matapos ang tanang pag-antos.​—Salmo 37:9-11.

Oo, tungod sa duha ka rason:

•  Ang Diyos wala malipay sa pag-antos ug inhustisya. Matikdi kon unsay gibati ni Jehova nga Diyos sa dihang gidaogdaog ang iyang katawhan kaniadto. Ang Bibliya nag-ingon nga siya nasakitan tungod sa mga “nagmaltratar kanila.”​—Maghuhukom 2:18, Bag-ong Kalibotang Hubad.

  Ang Diyos dili gayod malipay niadtong mohimog kadaot sa uban. Pananglitan, ang Bibliya nag-ingon nga gidumtan niya ang “mga kamot nga nagaula ug inosenteng dugo.”​—Proverbio 6:16, 17.

•  Ang Diyos may pagtagad sa matag usa kanato. Dili lang ang matag tawo ang nahibalo sa “iyang hampak ug sa iyang kasakit” kondili si Jehova usab!​—2 Cronicas 6:29, 30.

  Pinaagi sa iyang Gingharian, hapit nang taposon ni Jehova ang pag-antos sa matag usa. (Mateo 6:9, 10) Kasamtangan, mahigugmaon niyang hupayon kadtong sinserong modangop kaniya.​—Buhat 17:27; 2 Corinto 1:3, 4.