Ang Iyang Ikaduhang Milagro sa Cana

Human sa duha ka adlaw didto sa Samaria, si Jesus mipauli sa lugar nga iyang gipuy-an. Taudtaod pod siyang nagsangyaw sa Judea. Pero mipauli siya sa Galilea dili aron magpahulay kondili aron mogahin ug mas dakong panahon sa ministeryo sa lugar nga iyang gidak-an. Lagmit wala siya magdahom nga tagdon siyag maayo sa mga tawo didto kay siya miingon nga “ang usa ka propeta walay dungog diha sa iyang kaugalingong dapit.” (Juan 4:44) Imbes mouban kang Jesus, ang iyang mga tinun-an mipauli sa ilang pamilya ug mibalik sa ilang trabaho.

Unsang mensahe ang gisangyaw ni Jesus? Mao kini: “Ang Gingharian sa Diyos duol na. Paghinulsol kamo, ug pagbaton ug pagtuo sa maayong balita.” (Marcos 1:15) Mituo ba ang mga tawo? Daghang taga-Galilea ang mituo kang Jesus ug nagpasidungog kaniya. Mituo sila dili lang tungod sa iyang mensahe. Pipila kanila nakakita sab sa mga milagrong gihimo ni Jesus pag-adto nila sa Jerusalem alang sa Paskuwa pipila ka bulan ang milabay.—Juan 2:23.

Asa gisugdan ni Jesus ang iyang ministeryo sa Galilea? Makaingon ta nga sa Cana, diin iyang gihimong bino ang tubig panahon sa kombira sa kasal. Pag-adto niya sa Cana sa ikaduhang higayon, nasayran ni Jesus nga dunay batang lalaki nga grabeng nasakit ug hapit nang mamatay. Anak siya sa usa ka opisyal ni Herodes Antipas, ang hari nga nagpapunggot sa ulo ni Juan nga Tigbawtismo. Kini nga opisyal nakabalita nga si Jesus miabot na sa Cana gikan sa Judea. Maong mibiyahe siya gikan sa iyang gipuy-an sa Capernaum paingon sa Cana aron makigkita kang Jesus. Ang naguol pag-ayong opisyal nagpakiluoy kang Jesus: “Ginoo, adtoa intawon ang akong anak sa dili pa siya mamatay.”—Juan 4:49.

Seguradong natingala ang opisyal sa tubag ni Jesus: “Lakaw, buhi ra ang imong anak.” (Juan 4:50) Mituo siya kang Jesus ug mipauli sa Capernaum. Samtang nagpaingon na siya, gisugat siya sa iyang mga ulipon aron isulti ang maayong balita. Buhi ang iyang anak ug naulian na! ‘Unsang orasa siya naulian?’ nangutana siya aron masabtan ang mga panghitabo.

“Nahuwasan siya sa hilanat gahapon, mga ala una sa hapon.”—Juan 4:52.

Nahinumdoman sa opisyal nga mao ning orasa dihang miingon si Jesus: “Buhi ra ang imong anak.” Human niana, kining dato ug daghag ulipon nga opisyal, apil ang iyang pamilya, nahimong sumusunod ni Kristo.

Busa sa Cana, duha ka milagro ang gihimo ni Jesus—gihimong bino ang tubig ug giayo ang batang lalaki bisag mga 26 kilometros ang gilay-on sa bata. Siyempre, dili lang kay kini ang iyang mga milagro. Pero dakog kahulogan ang iyang ikaduhang milagro kay kini nagpaila nga siya propeta sa Diyos pagbalik niya sa Galilea. Ilhon pod kaha siya sa mga taga-Nasaret ingong propeta sa Diyos?

Ato nang mahibaloan inigpauli ni Jesus sa Nasaret. Unsa kahay mahitabo niya didto?