Naluoy Siya ug Giayo ang Sanlahon

Samtang si Jesus ug ang iyang upat ka tinun-an nagsangyaw “sa mga sinagoga sa tibuok Galilea,” daghan kaayo ang nakabalita bahin sa mga milagro nga iyang gihimo. (Marcos 1:39) Nakaabot kini sa siyudad diin naay tawong sanlahon. Sumala sa doktor nga si Lucas, ang tawo “punog sanla.” (Lucas 5:12) Kon grabe na ang sanla, anam-anam nga ut-oton niini ang lawas sa tawo.

Busa makaluluoy gayod ang situwasyon sa tawong sanlahon ug kinahanglang magpuyo siya layo sa mga tawo. Kinahanglan pod siyang mosinggit ug “Hugaw ko, hugaw ko!” aron dili siya duolon sa mga tawo ug dili sila matakdan. (Levitico 13:45, 46) Pero unsay gihimo sa tawong sanlahon? Miduol siya kang Jesus ug miluhod, nga nagpakiluoy: “Ginoo, kon buot lang nimo, ikaw makahinlo kanako.”—Mateo 8:2.

Dako gayod ang iyang pagtuo kang Jesus! Ug seguradong makaluluoy kaayo ang iyang hitsura! Unsay gihimo ni Jesus? Kon tua ka didto, unsay imong himoon? Tungod sa iyang kaluoy, gihikap ni Jesus ang tawo ug miingon: “Buot ko! Mamahinlo ka.” (Mateo 8:3) Bisag lisod tong tuohan sa uban, naayo dayon ang tawong sanlahon.

Gusto gayod natog hari nga gamhanan ug maluluy-on sama kang Jesus! Tungod sa iyang gipakitang kaluoy sa tawong sanlahon, kita makasalig nga dihang si Jesus mao nay maghari sa tibuok yuta, kini nga tagna sa Bibliya matuman: “Maluoy siya sa timawa ug sa kabos, ug pagaluwason niya ang mga kalag sa mga kabos.” (Salmo 72:13) Oo, buhaton ni Jesus ang tinguha sa iyang kasingkasing nga tabangan ang tanang nag-antos.

Hinumdomi nga sa wala pa ayoha ni Jesus ang tawong sanlahon, ang mga tawo nagsige nag estorya bahin sa iyang ministeryo. Karon mabalitaan na pod sa mga tawo ang pag-ayo niya sa tawong sanlahon. Pero dili gusto ni Jesus nga motuo niya ang mga tawo tungod lang sa mga estorya nga ilang nadungog. Nahibalo siya sa tagna nga “sa dalan dili niya ipadungog ang iyang tingog” aron magpasikat. (Isaias 42:1, 2) Busa gisugo ni Jesus ang naayong tawo: “Ayaw gayod kini ipanulti kang bisan kinsa, apan adto sa saserdote ug ipakita ang imong kaugalingon, ug pagtanyag ug halad sumala sa Balaod ni Moises.”—Mateo 8:4.

Pero siyempre, nalipay kaayo ang tawo nga naayo sa sanla ug dili niya kaya nga isekreto ang nahitabo. Iya ning giestorya sa uban. Mas nainteres na nuon ang mga tawo ug gustong magsukitsukit. Tungod niini, dili na bastabasta nga makaadtog siyudad si Jesus, busa miadto na lang usa siyag mga lugar nga walay tawo. Pero miadto gihapon ang mga tawo gikan sa lainlaing lugar aron matudloan ug ayohon niya.