Mga Paagi sa Pagsangyaw sa Maayong Balita

INGONG aktibong magmamantala sa maayong balita, si Jesus nagpakitag maayong panig-ingnan sa iyang mga sumusunod. Siya mismo ang miadto sa mga tawo, nga nagsangyaw ug nagtudlo kanila diha sa ilang mga balay ug sa publikong mga dapit. (Mat. 9:35; 13:36; Luc. 8:1) Si Jesus nakigsulti sa mga indibiduwal, nagtudlo sa iyang mga tinun-an sa pribado, ug nagsangyaw sa linibong katawhan. (Mar. 4:10-13; 6:35-44; Juan 3:2-21) Gipahimuslan niya ang matag haom nga higayon sa pagsultig mga pulong nga makapadasig ug makahatag ug paglaom. (Luc. 4:16-19) Bisan tuod angay na unta siyang mokaon ug mopahulay, wala niya palabya ang mga kahigayonan sa pagsangyaw. (Mar. 6:30-34; Juan 4:4-34) Dihang basahon nato ang mga asoy bahin sa ministeryo ni Jesus, dili ba madasig ta sa pagsundog kaniya? Madasig gyod ta, sama sa mga apostoles.​—Mat. 4:19, 20; Luc. 5:27, 28; Juan 1:43-45.

² Sayra ang mga kahigayonan alang sa mga Kristohanon karon sa pagpakigbahin sa buluhatong gisugdan ni Jesu-Kristo duolag 2,000 ka tuig kanhi.

³ Ingong mga Saksi ni Jehova, atong giila nga importante ang sistematikong paagi sa pagsangyaw sa maayong balita sa Gingharian sa balay ug balay. Kini nga paagi ang pirme natong ginagamit maong nailhan na ta sa uban tungod niini. Ang maayong mga resulta sa pagpamalaybalay nagpamatuod nga epektibo gyod kini nga paagi aron maabot ang milyonmilyong tawo sa mubo lang nga panahon. (Mat. 11:19; 24:14) Ang pagpamalaybalay maoy praktikal nga paagi nga atong mapakita ang atong gugma kang Jehova ug sa atong isigkatawo.​—Mat. 22:34-40.

⁴ Ang pagpamalaybalay dili modernong ideya sa mga Saksi ni Jehova. Si apostol Pablo naghisgot nga siya nanudlo diha sa mga balay. Sa paghubit sa iyang ministeryo ngadto sa mga tigdumala sa Efeso, siya miingon: “Sukad pa sa unang adlaw nga mitaak ko sa probinsiya sa Asia, . . . wala ko magpugong sa pagsulti kaninyo sa bisan unsang butang nga mapuslanon o sa pagtudlo kaninyo . . . sa balay ug balay.” Pinaagi sa pagpamalaybalay ug sa uban pang paagi sa pagsangyaw, si Pablo ‘bug-os nga nagpamatuod ngadto sa mga Hudiyo ug Grego bahin sa paghinulsol ngadto sa Diyos ug sa pagtuo diha sa atong Ginoong Jesus.’ (Buh. 20:18, 20, 21) Niadtong panahona, gipasiugda sa Romanong mga emperador ang idolatriya, ug daghan ang ‘mahinadlokon sa mga bathala.’ Ang mga tawo kinahanglang dili maglangan sa pagpangita sa “Diyos nga nagbuhat sa kalibotan ug sa tanang butang diha niini,” ang Diyos nga niadtong panahona mao ang ‘nagmantala sa tanang tawo nga sila angayng maghinulsol.’​—Buh. 17:22-31.

⁵ Karon, mas dinalian pa gyod nga makaabot sa katawhan ang maayong balita. Mas nagkaduol na ang kataposan niining daotang sistema sa mga butang. Tungod niini, kita madasig nga mas maningkamot pa. Dugay nang napamatud-an nga ang pagpamalaybalay mao ang kinamaayohang paagi sa pagpangita niadtong giuhaw sa kamatuoran. Kini nga paagi epektibo gihapon karon sama nga kini epektibo sa panahon ni Jesus ug sa mga apostoles.​—Mar. 13:10.

⁶ Makahimo ba ka sa bug-os nga pagpakigbahin sa balay ug balay nga pagsangyaw? Kon mao, makasalig ka nga si Jehova nalipay nimo. (Ezeq. 9:11; Buh. 20:35) Tingali lisod para nimo ang pagpamalaybalay. Basin duna kay mga limitasyon sa panglawas o tingali daghan ang dili interesado sa inyong teritoryo. Basin gidili sa gobyerno ang atong buluhaton. Basin maulawon ka ug malisdan pag-ayo sa pagpakigsulti sa mga tawo nga dili nimo kaila. Tungod niini, matag higayon nga mamalaybalay ka, mobati kag kabalaka. Ayawg kaluya. (Ex. 4:10-12) Ang imong situwasyon nasinatian pod sa mga igsoon sa daghang lugar.

⁷ Si Jesus misaad sa iyang mga tinun-an: “Hinumdomi nga ako magauban kaninyo sa tanang adlaw hangtod sa hinapos sa sistema sa mga butang.” (Mat. 28:20) Kana nga saad magpalig-on kanato sa paghimog mga tinun-an. Bation nato ang sama sa gibati ni apostol Pablo, kinsa miingon: “Naa koy kusog sa pag-atubang sa tanang butang tungod kaniya nga naghatag nakog gahom.” (Filip. 4:13) Paningkamoti nga bug-os kang makapakigbahin sa mga kahikayan sa kongregasyon sa pagpamalaybalay. Pinaagi sa pagministeryo uban sa mga igsoon, makadawat kag pagdasig ug personal nga tabang. Pag-ampo nga tabangan kang masagubang ang bisan unsang babag, ug himoa ang imong kinamaayohan ingong magsasangyaw sa maayong balita.​—1 Juan 5:14.

⁸ Samtang imong isulti sa uban ang maayong balita, imong mapaambit kanila ang “katarongan sa [imong] paglaom.” (1 Ped. 3:15) Mas makita nimo ang kalainan niadtong dunay paglaom sa Gingharian ug niadtong wala. (Isa. 65:13, 14) Malipay ka kay imong gisunod ang sugo ni Jesus sa ‘pagpalamdag sa kahayag,’ ug pribilehiyo nimo ang pagtabang sa uban nga makaila kang Jehova ug mahibalo sa kamatuoran nga motultol sa kinabuhing walay kataposan.​—Mat. 5:16; Juan 17:3; 1 Tim. 4:16.

⁹ Dunay mga kahikayan sa pagpamalaybalay sa Sabado ug Dominggo ug sa ubang adlaw sa semana. Sa mga lugar nga dili makaplagan ang mga tawo diha sa ilang balay sa maadlaw, ang ubang kongregasyon naghimog kahikayan sa pagsangyaw sa gabii. Ang mga tawo lagmit modawat ug mga bisita sa hapon o sa sayong kagabhion kay sa buntag.

¹⁰ Gisugo ni Jesus ang iyang mga tinun-an sa ‘pagpangita’ sa mga tawong takos. (Mat. 10:11) Siya nangitag mga tawong interesado sa kamatuoran dili lang sa pagpamalaybalay. Sa pagkatinuod, siya naghatag ug pamatuod sa matag haom nga higayon, sa pormal ug impormal nga pagsangyaw. (Luc. 8:1; Juan 4:7-15) Ang mga apostoles nagsangyaw sab sa lainlaing lokasyon.​—Buh. 17:17; 28:16, 23, 30, 31.

¹¹ Tumong sab nato karon nga masangyawan ang tanan sa mensahe sa Gingharian kutob sa mahimo. Kini nagpasabot nga sundogon nato ang paagi ni Jesus ug sa iyang mga apostoles sa paghimog tinun-an, apil na ang pagpasibo sa nagkausab nga panahon ug sa lainlaing kahimtang sa mga tawo sa atong teritoryo. (1 Cor. 7:31) Pananglitan, ang mga magmamantala nagmalamposon sa pagsangyaw sa mga dapit sa negosyohanan. Ang pagsangyaw sa kadalanan napamatud-an nga epektibo sa daghang nasod, apil ang pagsangyaw sa mga parke, parkinganan, o bisan asa nga naay tawo. Ang ubang kongregasyon nagbutang ug mga lamesa, cart, o uban pang displeyhanag literatura diha sa ilang teritoryo. Dugang pa, ang sangang buhatan mahimong mag-organisar ug espesyal nga publikong pagsangyaw sa dagkong siyudad sa mga lugar nga daghag tawo, diin gamiton nila ang mga igsoon sa pipila ka kongregasyon. Ingong resulta, ang mga tawo nga dili makaplagan sa balay masangyawan gihapon sa maayong balita.

¹² Dihang makahibalag tag mga tawo sa publikong mga lugar nga interesado sa mensahe sa Bibliya, puwede tang motanyag ug haom nga publikasyon. Aron maugmad ang iyang interes, puwede nimong ihatag ang imong contact information sa maong interesado ug maghikay ug balikduaw kaniya, isulti ang bahin sa jw.org, o ihatag kaniya ang adres sa pinakaduol nga lugar diin ginahimo ang mga tigom sa kongregasyon. Ang pagsangyaw diha sa publiko makapalipay nga paagi sa pagpauswag sa imong ministeryo.

¹³ Apan dili lang kay pagsangyaw sa maayong balita ang nalangkit sa buluhaton nga gisugo sa mga Kristohanon karon. Aron molampos ka sa pagtabang sa uban nga modawat sa kamatuoran nga motultol sa kinabuhi, maayong balikbalikon nimog duaw ang mga interesado aron sila mouswag ug mahimong hamtong nga mga Kristohanon.

¹⁴ Giingnan ni Jesus ang iyang mga sumusunod: “Kamo mahimong akong mga saksi . . . hangtod sa kinalay-ang bahin sa yuta.” (Buh. 1:8) Apan iya sab silang giingnan: “Adtoa ninyo ang mga tawo sa tanang kanasoran ug tudloi sila aron mahimong akong mga tinun-an. . . . Tudloi ninyo sila sa pagtuman sa tanan nakong gisugo kaninyo.” (Mat. 28:19, 20) Ang pagbalikduaw makahatag ug kalipay sa pag-alagad kang Jehova. Kadtong nagpakitag interes sa maayong balita sa imong unang pagduaw lagmit malipay nga makita ka pag-usab. Pinaagi sa paghatag kanilag dugang impormasyon sa Bibliya, mapalig-on nimo ang ilang pagtuo sa Diyos ug matabangan silang makaamgo sa ilang espirituwal nga panginahanglan. (Mat. 5:3) Kon mangandam ka pag-ayo ug duawon sila pag-usab sa oras nga kombenyente nila, lagmit masugdan nimo silag pagtuon sa Bibliya. Kasagaran, kana gyoy tumong sa pagbalikduaw. Dili lang kay magtanom tag binhi sa kamatuoran kondili ato sab ning bisbisan.​—1 Cor. 3:6.

¹⁵ Malisdan tingali ang uban sa pagbalikduaw. Tingali hanas na ka sa paghatag ug mubong presentasyon sa pagsangyaw, ug ganahan ka niini nga bahin sa ministeryo. Pero lagmit mabalaka ka pag-ayo dihang maghunahuna sa pagbalikduaw aron makighisgot sa Bibliya. Ang maayong pagpangandam makahatag nimog dugang kompiyansa. Seguroa nga imong ipadapat ang praktikal nga mga sugyot diha sa atong midweek nga tigom. Puwede sab kang magpauban sa eksperyensiyadong magmamantala sa pagbalikduaw.

¹⁶ Dihang nakigsulti sa kinabig nga Hudiyo nga nagbasa sa Pulong sa Diyos, ang tig-ebanghelyo nga si Felipe nangutana kaniya: “Nasabtan ba gyod nimo ang imong ginabasa?” Ang lalaki mitubag: “Unsaon man nako pagkasabot kon walay magtudlo kanako?” Dayon ang Buhat kapitulo 8 naghisgot nga gisugdan ni Felipe ang ‘pagpahayag sa maayong balita bahin kang Jesus’ diha sa bahin sa Kasulatan nga ginabasa sa maong lalaki. (Buh. 8:26-36) Wala ta mahibalo kon unsa ka dugay nakig-estorya si Felipe kaniya, pero gipatin-aw ni Felipe ang maayong balita hangtod sa punto nga siya nahimong magtutuo ug mihangyo nga bawtismohan. Siya nahimong tinun-an ni Jesu-Kristo.

¹⁷ Daghan karon ang dili sinati sa Bibliya, maong kinahanglan tingali ang daghang pagduaw ug detalyadong pagtuon sulod sa mga semana, bulan, o bisan usa ka tuig o kapin pa ayha molig-on ang ilang pagtuo ug mokuwalipikar sa bawtismo. Pero ang imong mapailobon ug mahigugmaon nga pagtabang sa mga matinud-anog kasingkasing nga mahimong tinun-an dunay maayong resulta, sama sa giingon ni Jesus: “Dunay labaw nga kalipay sa paghatag kay sa pagdawat.”​—Buh. 20:35.

¹⁸ Seguradong gusto nimong magdumalag pagtuon sa Bibliya gamit ang usa sa mga publikasyon nga para niana nga katuyoan. Samtang imong ipadapat ang mga instruksiyon gikan sa midweek nga tigom ug makig-uban sa mga igsoong hanas sa pagdumalag pagtuon sa Bibliya, magmabungahon ang imong pagdumalag mga pagtuon, nga makatabang sa uban nga mahimong tinun-an ni Jesu-Kristo.

¹⁹ Kon nagkinahanglan kag tabang sa pagsugod ug pagdumalag pagtuon sa Bibliya, pakigsulti sa usa sa mga tigdumala o sa igsoon nga maayong modumalag pagtuon sa Bibliya. Ang mga sugyot nga makita sa Workbook sa Tigom nga Kinabuhi ug Ministeryo ug ang mga pasundayag bahin niini diha sa tigom makatabang sab nimo. Salig kang Jehova ug iampo kaniya ang imong tinguha. (1 Juan 3:22) Busa kon posible, himoang tumong nga makadumala kag pagtuon sa Bibliya gawas pa sa imong pagdumalag pagtuon sa imong pamilya. Pinaagi sa pagdumalag pagtuon sa Bibliya, mas magmalipayon ka sa ministeryo.

²⁰ Dihang tabangan nato ang mga tawo nga mailhan si Jehova nga Diyos ug mahimong tinun-an ni Jesu-Kristo, sila mahimo nang bahin sa kongregasyon. Ang mga Bible study mouswag sa espirituwal ug mohamtong kon ilang mailhan ang organisasyon ni Jehova ug mokooperar niana. Hinungdanon nga matudloan sila sa paghimo niana. Ang mga video ug ang brosyur nga Kinsay Nagabuhat sa Kabubut-on ni Jehova Karon? espesipikong gihimo para niini nga katuyoan. Ang ubang impormasyon sa Kapitulo 4 niining basahona makatabang sab.

²¹ Sa sugod pa lang sa inyong panaghisgot bahin sa Bibliya, tabangi ang estudyante nga makasabot nga si Jehova naggamit ug organisasyon karon aron mapalampos ang pagsangyaw sa tibuok yuta. Ipasiugda ang kahinungdanon sa atong mga giya sa pagtuon sa Bibliya, ug hisgoti kon giunsa kana paghimo ug pag-apod-apod sa tibuok kalibotan pinaagi sa mga boluntaryo nga dedikadong mga alagad sa Diyos. Imbitaha ang imong Bible study nga mouban nimo sa mga tigom sa Kingdom Hall. Ipatin-aw kaniya kon unsay ginahimo diha sa mga tigom, ug ipailaila siya sa mga igsoon. Puwede sab nimo siyang ipailaila sa ubang Saksi panahon sa mga asembliya ug kombensiyon. Sa mga okasyon nga sama niini ug sa uban pa, mas maayo nga ang interesado mismo ang makaobserbar kon sa unsang paagi ang katawhan ni Jehova nagpakitag gugma, ang ilhanan sa tinuod nga mga Kristohanon. (Juan 13:35) Dihang mas molalom ang iyang apresasyon sa organisasyon, siya mas masuod kang Jehova.

²² Ang unang mga Kristohanon maoy madasigong mga magmamantala sa Pulong sa Diyos. Naghimo silag mga kopya sa Kasulatan aron magamit sa personal ug sa pagtuon sa kongregasyon. Ilang gidasig ang uban nga mokat-on sa kamatuoran sa Pulong sa Diyos. Ang ilang sinulat nga mga kopya diyutay ra ug gipabilhan pag-ayo. (Col. 4:16; 2 Tim. 2:15; 3:14-17; 4:13; 1 Ped. 1:1) Karon, ang mga Saksi ni Jehova naggamit ug modernong paagi sa pag-imprentag ginatos ka milyong Bibliya ug mga giya sa pagtuon sa Bibliya. Lakip niini ang mga tract, brosyur, libro, ug magasin diha sa ginatos ka pinulongan.

²³ Dihang isangyaw nimo ang maayong balita, gamita gayod ang mga giya sa pagtuon sa Bibliya nga gitagana sa organisasyon ni Jehova. Kay nakabenepisyo kag dako sa pagbasa ug pagtuon sa mga publikasyon sa mga Saksi ni Jehova, kini magdasig nimo sa pagpaambit niini sa uban.​—Heb. 13:15, 16.

²⁴ Nagkadaghan ang nagsalig sa Internet sa pagkuhag impormasyon. Busa gawas pa sa mga literatura sa Bibliya, ang atong opisyal nga website, ang jw.org, maoy epektibong galamiton sa pagpakaylap sa maayong balita. Ang mga tawo sa tibuok kalibotan makagamit sa computer sa pagbasa o pagpaminaw sa mga audio recording sa Bibliya ug sa mga literatura sa Bibliya diha sa ginatos ka pinulongan. Kadtong nagduhaduhang makig-estorya nato o nagpuyo sa lugar diin wala kaayo silay kahigayonan nga maestorya ang mga Saksi ni Jehova makahimo sa pagsusi sa atong mga pagtulon-an diha mismo sa ilang balay pinaagi sa jw.org.

²⁵ Busa atong ipaila ang jw.org sa matag haom nga kahigayonan. Kon ang tagbalay mangutana bahin sa atong tinuohan, puwede tang mogamit ug gadyet o computer aron ipakita dayon kaniya ang tubag niana. Kon duna tay masangyawan nga lahig pinulongan, apil ang senyas nga pinulongan, puwede natong ipaila o ipakita kaniya ang atong website diin mabasa ang Bibliya ug mga literatura sa Bibliya sa iyang pinulongan. Daghang magmamantala ang nag-play ug usa sa mga video sa website aron makasugod ug panaghisgot sa Bibliya.

²⁶ Kadtong naminaw kang Jesus iyang giingnan: “Kamo ang kahayag sa kalibotan. . . . Palamdaga ang inyong kahayag atubangan sa mga tawo aron ilang makita ang inyong maayong mga buhat ug himayaon ang inyong Amahan nga anaa sa langit.” (Mat. 5:14-16) Gipabanaag sa maong mga tinun-an ang personalidad ug mga sukdanan sa Diyos pinaagi sa pagsundog kang Jesus, kinsa miingon: “Ako mao ang kahayag sa kalibotan.” Si Jesus naghatag ug panig-ingnan para sa mga Kristohanon sa pagpalamdag sa “kahayag sa kinabuhi” aron makabenepisyo ang tanang maminaw.​—Juan 8:12.

²⁷ Si apostol Pablo naghatag sab ug panig-ingnan nga angay natong sundon. (1 Cor. 4:16; 11:1) Sa didto siya sa Atenas, adlaw-adlaw siyang nagsangyaw sa mga tawo sa merkado. (Buh. 17:17) Gisundog sa mga Kristohanon sa Filipos ang iyang panig-ingnan. Tungod niana, si Pablo misulat kanila nga sila nagpuyo “taliwala sa daotan kaayong kaliwatan,” diin sila “nagasidlak nga samag kahayag sa kalibotan.” (Filip. 2:15) Mapasidlak sab nato karon ang kamatuoran sa Gingharian pinaagi sa atong mga pulong ug buhat sa matag higayon nga kita mosangyaw sa maayong balita. Tinuod, ang atong maayong panig-ingnan ingong matinud-anon ug matarong nga mga tawo tingali makahatag nag impresyon sa uban nga kita lahi sa kalibotan. Pero pinaagi sa atong pagsangyaw, ilang mahibaloan kon nganong lahi ta.

²⁸ Daghan sa katawhan ni Jehova ang mosangyaw niadtong ilang mahibalag sa trabahoan, eskuwelahan, publikong transportasyon, o bisan asa. Samtang magbiyahe, may kahigayonan tang makig-estorya sa ubang pasahero. Ang matag usa nato kinahanglang abtik mangitag kahigayonan sa pagsangyaw. Hinaot andam tang makigsulti sa uban sa matag haom nga higayon.

²⁹ Madasig ta sa paghimo niana kon pirme natong hunahunaon nga nagdayeg ta sa atong Maglalalang ug nagpasidungog sa iyang ngalan. Dugang pa, matabangan nato kadtong matinud-anog kasingkasing sa pagkaila kang Jehova aron sila sab makaalagad niya ug makabaton sa paglaom sa kinabuhi pinaagi sa pagtuo kang Jesu-Kristo. Si Jehova malipay niini nga paningkamot ug alang kaniya kini maoy sagradong pag-alagad.​—Heb. 12:28; Pin. 7:9, 10.

³⁰ Kabubut-on ni Jehova nga ang mensahe sa Gingharian isangyaw sa tibuok kalibotan, sa mga siyudad man o mga baryo. Tungod niana, ang mga kongregasyon ingon man ang mga igsoon nga nag-alagad sa hilit nga mga lugar hatagag teritoryo gikan sa sangang buhatan. (1 Cor. 14:40) Sama kini sa kahikayang gihatag sa Diyos niadtong unang siglo. (2 Cor. 10:13; Gal. 2:9) Kay kusog ang pag-uswag sa buluhaton sa Gingharian niining kataposang mga adlaw, dako ang malampos kon maayong pagkaorganisar ang kahikayan sa pagkobre sa teritoryo sa kongregasyon.

³¹ Kini nga kahikayan dumalahon sa tigdumala sa pag-alagad. Puwedeng mogamit ug ministeryal nga alagad sa aktuwal nga pag-asayn ug teritoryo. Dunay duha ka klase sa teritoryo, ang teritoryo sa grupo ug personal nga teritoryo. Kon limitado ang teritoryo, ang matag tigdumala sa grupo hatagag mga teritoryo nga kobrehan sa grupo. Pero kon daghan ang teritoryo, ang mga magmamantala makahangyog personal nga teritoryo.

³² Ang magmamantala nga may personal nga teritoryo dunay lugar nga masangyawan dihang walay gihikay nga tigom alang sa pagsangyaw o dihang dili praktikal nga mouban siya sa grupo. Pananglitan, ang uban mohangyog teritoryo duol sa ilang trabahoan ug mosangyaw sa tingpaniudto o human sa trabaho. Ang pipila ka pamilya mohangyog personal nga teritoryo sa dapit diin sila nagpuyo ug mosangyaw sa gabii. Ang pagbaton ug kombenyenteng personal nga teritoryo makatabang sa magmamantala aron daghang oras ang iyang magahin sa pagsangyaw. Siyempre, ang personal nga mga teritoryo mahimong kobrehan sab alang sa grupo nga pagsangyaw. Kon gusto nimog personal nga teritoryo, makahangyo ka niana sa alagad sa teritoryo.

³³ Teritoryo man kini sa grupo nga atimanon sa tigdumala sa grupo o personal nga teritoryo sa usa ka magmamantala, kadtong nagbaton niini nga teritoryo maningkamot nga dunay makontak sa matag balay. Ang mga kahikayan sa pagkobre sa teritoryo angayng subay sa lokal nga balaod bahin sa pagprotektar ug impormasyon. Ang tigdumala sa grupo o magmamantala nga may personal nga teritoryo kinahanglang maningkamot nga makobrehan ang teritoryo sulod sa upat ka bulan. Dihang bug-os na kining makobrehan, iyang pahibaloon ang alagad sa teritoryo. Depende sa kahimtang, ang tigdumala sa grupo o magmamantala puwedeng mohangyo nga kobrehan kinig otro o ibalik ngadto sa alagad sa teritoryo.

³⁴ Kon ang tanan sa kongregasyon mokooperar, bug-os nga makobrehan ang teritoryo. Malikayan sab ang dungan nga pagkobre sa samang lugar sa duha o kapin pang magmamantala, nga lagmit makapalagot sa mga tagbalay. Sa ingon, makapakita tag konsiderasyon sa atong mga igsoon ug sa mga tawo sa teritoryo.

³⁵ Ang tanan kinahanglang makakat-on bahin kang Jehova nga Diyos, sa iyang Anak, ug sa Gingharian. (Pin. 14:6, 7) Gusto natong tabangan ang mga tawo bisag unsa pay ilang pinulongan nga motawag sa ngalan ni Jehova aron maluwas ug masul-ob nila ang Kristohanong personalidad. (Roma 10:12, 13; Col. 3:10, 11) Unsay pipila ka hagit sa pagsangyaw sa mga lugar diin ang mga tawo lainlaig pinulongan? Unsay himoon aron mas daghan ang mahatagag kahigayonan nga makadungog sa mensahe sa Gingharian diha sa pinulongan nga mas masabtan nila?​—Roma 10:14.

³⁶ Ang teritoryo nga iasayn sa matag kongregasyon ibase sumala sa pinulongan niini. Busa sa mga lugar nga ang mga residente lainlaig pinulongan, ang mga magmamantala sa lainlaing kongregasyon makasangyaw sa mao rang teritoryo. Sa maong kahimtang, mas maayo nga ang mga magmamantala sa matag kongregasyon magpokus sa pagsangyaw sa mga tawong pareho nilag pinulongan. Kini sab ang buhaton panahon sa tinuig nga mga kampanya sa pagpanagtag ug imbitasyon. Pero dihang makigbahin sa publiko ug impormal nga pagsangyaw, ang mga magmamantala makasangyaw kang bisan kinsa ug makatanyag ug literatura sa bisan unsang pinulongan.

³⁷ Sa pipila ka kahimtang, ang mga kongregasyon nga lahig pinulongan dili regular nga makakobre sa lagyong teritoryo. Niana nga mga kahimtang, ang mga tigdumala sa pag-alagad sa maong mga kongregasyon angayng makigkomunikar sa usag usa aron makahimog maayo ug gikauyonang sistema sa pagkobre sa teritoryo. Pinaagi niini, ang tanan mahatagag kahigayonan nga makadungog sa mensahe sa Gingharian ug malikayan ang dobleng pagkobre sa teritoryo.​—Prov. 15:22.

³⁸ Unsay atong himoon kon ang tagbalay lahig pinulongan? Dili ta magsalig nga masangyawan ra siya sa mga magmamantala nga parehas niyag pinulongan. Ang ubang magmamantala nagkat-on ug simpleng presentasyon sa pinulongan sa mga tawo nga sagad nilang mahibalag sa teritoryo. Puwede natong ipakita sa tagbalay kon sa unsang paagi mabasa o ma-download ang mga publikasyon sa iyang pinulongan gikan sa atong opisyal nga website, ang jw.org, o puwede nato siyang dad-an ug publikasyon sa iyang pinulongan.

³⁹ Kon ang tagbalay tinuod nga interesado, angay tang maningkamot nga makakitag magmamantala nga kuwalipikadong motabang niya sa pinulongan nga iyang masabtan. Puwede sab nato siyang sultihan kon asa ang duol nga kongregasyon diin ginahimo ang mga tigom sa iyang pinulongan. Kon gusto niya nga dunay Saksi nga mokontak niya nga kamao sa iyang pinulongan, puwede nato siyang tudloan kon unsaon niya pagbutang ang iyang contact information sa jw.org. Unya ang sangang buhatan mao nay mangita ug magmamantala, grupo, o kongregasyon nga makaatiman niya.

⁴⁰ Samtang ang interesado dili pa makontak sa magmamantala nga pareho niyag pinulongan, kinahanglang padayon nato siyang duawon. Usahay ang sangang buhatan magpahibalo sa mga ansiyano nga wala silay makitang magmamantala nga nagsulti sa maong pinulongan. Kon kanay kahimtang, angay tang maningkamot nga padayong maugmad ang interes sa tagbalay. Kon posible, ato siyang dumalahag pagtuon sa Bibliya, tingali gamit ang publikasyon sa iyang pinulongan. Kon atong gamiton ang mga hulagway sa publikasyon ug ipabasa kaniya ang gisitar nga mga teksto, masabtan niya ang pipila ka pangunang pagtulon-an sa Bibliya. Ang membro sa iyang pamilya nga makamao sa iyang pinulongan ug sa lokal nga pinulongan tingali mosugot nga mahimong interpreter.

⁴¹ Aron ang interesado magiyahan ngadto sa organisasyon sa Diyos, kinahanglan nato siyang imbitahon sa mga tigom, bisan pag dili tingali siya bug-os nga makasabot sa programa. Dihang dunay mga tekstong basahon, puwede nato siyang tabangan nga pangitaon kini gamit ang Bibliya sa iyang pinulongan kon kini mabatonan niana nga pinulongan. Ang pagpakig-uban sa kongregasyon makapalig-on ug makatabang kaniya nga mouswag sa espirituwal.

⁴² Pregroup: Kini maoy grupo sa mga magmamantala nga mosangyaw sa pinulongan nga lahi sa pinulongan sa kongregasyon, bisan pag walay kuwalipikadong ansiyano o ministeryal nga alagad nga makadumalag senemanang tigom sa maong pinulongan. Mahimong aprobahan sa sangang buhatan ang usa ka kongregasyon nga mag-host ug pregroup kon makab-ot ang mosunod nga mga kinahanglanon:

1. (1) Dunay igong gidaghanon sa mga tawo sa maong lugar nga lahig pinulongan kay sa pinulongan sa kongregasyon.

2. (2) Dunay pipila ka magmamantala nga nahibalo o andam mokat-on sa pinulongan.

3. (3) Ang mga ansiyano sa kongregasyon andam nga manguna sa pag-organisar sa pagsangyaw niana nga pinulongan.

Kon ang mga ansiyano sa kongregasyon gustong mag-host ug pregroup, ilang konsultahon ang tigdumala sa sirkito. Tingali nahibalo siya nga dunay ubang kongregasyon nga naningkamot sa pagsangyaw sa mga tawo niana nga pinulongan ug basin makahatag siya ug importanteng impormasyon nga makatabang sa pagtino kon unsang kongregasyon ang naa sa pinakamaayong kahimtang nga mag-host sa pregroup. Dihang duna nay mapili nga kongregasyon, ang mga ansiyano magpadalag sulat sa sangang buhatan ug mohangyo nga aprobahan ang ilang kongregasyon nga mag-host ug pregroup.

⁴³ Grupo: Mahimong aprobahan sa sangang buhatan ang usa ka kongregasyon nga mag-host ug grupo kon makab-ot ang mosunod nga mga kinahanglanon:

1. (1) Dunay igong gidaghanon sa mga interesado ug potensiyal sa pag-uswag sa teritoryo nianang partikular nga pinulongan.

2. (2) Dunay pipila ka magmamantala nga makamao o nagtuon sa maong pinulongan.

3. (3) Dunay kuwalipikadong ansiyano o ministeryal nga alagad nga makapanguna ug makadumala ug labing menos usa ka senemanang tigom​—o usa ka bahin sa senemanang tigom, sama sa pakigpulong publiko o Pagtuon sa Bantayanang Torre—​niana nga pinulongan.

Dihang makab-ot na kini nga mga kinahanglanon, ang mga ansiyano sa kongregasyon maghimog sulat nga may kompletong detalye ug ipadala kini ngadto sa sangang buhatan nga mohangyo nga aprobahan sila ingong kongregasyon nga mag-host ug grupo. Ang ansiyano o ministeryal nga alagad nga nanguna niini maoy mahimong “tigdumala sa grupo” o “alagad sa grupo” nga responsable sa pag-atiman niini.

⁴⁴ Dihang maaprobahan na ang grupo, ang mga ansiyano sa host nga kongregasyon maoy magtino kon unsa pa nga mga bahin sa tigom ang puwedeng idugang sa senemanang tigom sa grupo ug kon kapila kini himoon sa usa ka bulan. Puwede sab maghimog kahikayan sa tigom alang sa pagsangyaw para sa grupo. Ang kalihokan sa tanang magmamantala sa grupo dumalahon sa mga ansiyano sa host nga kongregasyon. Ang mga ansiyano maghatag ug balanse nga giya ug magpakitag inisyatibo sa pag-atiman sa panginahanglan sa grupo. Dihang ang tigdumala sa sirkito mouban sa kalihokan sa grupo panahon sa iyang duaw sa host nga kongregasyon, maghatag siyag mubong report sa sangang buhatan bahin sa pag-uswag sa grupo ug hisgotan ang espesipikong mga panginahanglan niini. Ngadtongadto, ang grupo posible nga mahimong kongregasyon. Kon ang tanan magpadapat sa direksiyon sa organisasyon, malipay gyod si Jehova.​—1 Cor. 1:10; 3:5, 6.

⁴⁵ Ang matag dedikadong Kristohanon dunay responsibilidad sa pagpaambit sa maayong balita sa uban. Dunay daghang paagi sa pagbuhat niini, pero kadaghanan nato malipay nga makig-uban sa mga igsoon sa pagsangyaw. (Luc. 10:1) Tungod niini, ang mga kongregasyon maghimog tigom alang sa pagsangyaw sa adlawng Sabado ug Dominggo ug sa ubang adlaw sa semana. Ang mga holiday maayo sab nga kahigayonan alang sa grupo nga pagsangyaw kay daghang igsoon ang walay trabaho nianang mga adlawa. Ang Komite sa Pag-alagad sa Kongregasyon maoy maghikay kon unsang orasa ug asa himoon ang mga tigom alang sa pagsangyaw, kini man pagsangyaw sa adlaw o sa gabii.

⁴⁶ Ang grupo nga pagsangyaw makatabang sa mga magmamantala nga mag-uban sa pagministeryo ug “magdinasigay.” (Roma 1:12) Ang bag-ong mga magmamantala mabansay kon makauban nila ang hanas ug eksperyensiyadong mga magmamantala. Sa ubang lugar, mas maayo tingali nga duha o kapin pang magmamantala ang mag-uban aron malikayan ang kapeligrohan. Bisan pag nagplano kang moadto sa teritoryo nga ikaw ra, ang imong pagduyog sa grupo para sa tigom alang sa pagsangyaw makapadasig sa tanan. Ang pagkahibalo nga naa kay mga kauban sa ministeryo sa samang lugar makahatag nimog kompiyansa. Ang mga payunir ug ang ubang magmamantala dili ra angayng mobati nga obligado sila sa pagtambong sa tanang tigom alang sa pagsangyaw, ilabina kon ginahimo kini kada adlaw. Pero basin posible ra silang makatambong sa ubang tigom alang sa pagsangyaw matag semana.

⁴⁷ Hinaot kitang tanan mosunod sa panig-ingnan ni Jesus ug sa iyang mga apostoles! Makasalig ta nga panalanginan ni Jehova ang atong mga paningkamot nga bug-os nga makigbahin sa importanteng buluhaton sa pagsangyaw sa maayong balita sa Gingharian.​—Luc. 9:57-62.