Mayo
Dominggo, Mayo 1
Siya . . . padayong nagpasakop kanila.—Luc. 2:51.
Sa bata pa si Jesus, midesisyon siya nga magpasakop sa iyang ginikanan. Wala gyod siya mosupak nila, nga mangatarongan nga mas labaw siyag kahibalo kay kanila. Sa walay duhaduha, gituman niya ang iyang responsibilidad ingong kamagulangang anak. Seguradong naningkamot siya nga makakat-on sa pagpamanday gikan sa iyang amaama aron makatabang siya sa ilang pamilya. Posibleng gisultihan si Jesus sa iyang ginikanan bahin sa iyang milagrosong pagkatawo ug sa gisulti sa mga mensahero sa Diyos bahin kaniya. (Luc. 2:8-19, 25-38) Pero wala maghunahuna si Jesus nga igo na kana; iya pong gitun-an ang Kasulatan. Giunsa nato pagkahibalo nga gitun-an pag-ayo ni Jesus ang Pulong sa Diyos? Tungod kay sa bata pa siya, ang mga magtutudlo sa Jerusalem “nahingangha sa iyang mga tubag ug pagsabot.” (Luc. 2:46, 47) Ug sa edad nga 12, napamatud-an na ni Jesus sa iyang kaugalingon nga si Jehova iyang Amahan.—Luc. 2:42, 43, 49. w20.10 29-30 ¶13-14
Lunes, Mayo 2
Ang Kristo gibanhaw.—1 Cor. 15:12.
Ang pagtuo sa pagkabanhaw ni Jesus maoy basehanan sa atong paglaom sa pagkabanhaw. Dihang si Pablo nagsugod pagsulat bahin sa pagkabanhaw, gihisgotan niya ang tulo ka kamatuoran: (1) “Ang Kristo namatay alang sa atong mga sala.” (2) Siya “gilubong.” (3) Siya “gibanhaw sa ikatulong adlaw sumala sa Balaang Kasulatan.” (1 Cor. 15:3, 4) Unsay kahulogan alang kanato sa kamatayon, paglubong, ug pagkabanhaw ni Jesus? Si propetang Isaias nagtagna nga ang Mesiyas ‘wagtangon gikan sa yuta sa mga buhi’ ug ‘hatagag lubnganan taliwala sa mga daotan.’ Pero, duna pay laing mahitabo. Si Isaias midugang nga ang Mesiyas ‘magpas-an sa sala sa daghang tawo.’ Gihimo kini ni Jesus pinaagi sa pagtagana sa lukat. (Isa. 53:8, 9, 12; Mat. 20:28; Roma 5:8) Busa ang kamatayon, paglubong, ug pagkabanhaw ni Jesus naghatag ug lig-ong basehanan sa atong paglaom nga mapahigawas sa sala ug kamatayon ug makauban pag-usab ang atong mga minahal nga nangamatay. w20.12 2-3 ¶4-6; 5 ¶11
Martes, Mayo 3
Sa tanang tawo, ako ang naay rason nga magsalig sa tawhanong mga kuwalipikasyon. Kon naay tawo nga naghunahuna nga naa siyay rason nga magsalig sa tawhanong mga kuwalipikasyon, labaw na ko.—Filip. 3:4.
Si apostol Pablo sagad magsangyaw sa mga sinagoga sa mga Hudiyo. Pananglitan, sa sinagoga sa Tesalonica, “sulod sa tulo ka igpapahulay siya nangatarongan [sa mga Hudiyo] gikan sa Balaang Kasulatan.” (Buh. 17:1, 2) Tingali komportable si Pablo nga mosangyaw sa sinagoga. Gimatuto siya ingong Hudiyo. (Buh. 26:4, 5) Kay nakasabot siya sa mga Hudiyo, komportable siyang mosangyaw kanila. (Filip. 3:5) Human mopahawa si Pablo sa Tesalonica ug unya sa Berea tungod sa paglutos, nakaabot siya sa Atenas. “Sa sinagoga siya nanudlo ug nangatarongan [na sab] sa mga Hudiyo ug sa ubang mga tawo kinsa nagsimba sa Diyos.” (Buh. 17:17) Pero dihang nagsangyaw siya sa merkado, lahi na ang iyang mamiminaw. Apil kanila ang mga pilosopo ug ubang mga Hentil nga nag-isip sa mensahe ni Pablo ingong “bag-ong pagtulon-an.” Sila miingon kaniya: “Nagpahayag kag mga butang nga bag-o sa among mga igdulungog.”—Buh. 17:18-20. w20.04 9 ¶5-6
Miyerkoles, Mayo 4
Dihang gusto nakong buhaton ang matarong, ang daotan ania kanako.—Roma 7:21.
Kon naningkamot ka nga madaog ang usa ka kahuyangan, ayaw paghunahuna nga wala kay pulos. Hinumdomi nga walay usa kanato ang makabaton ug matarong nga baroganan atubangan sa Diyos sa kaugalingon lang natong paningkamot. Kitang tanan nagkinahanglan sa dili hitupngang pagkamaayo sa Diyos pinaagi sa lukat. (Efe. 1:7; 1 Juan 4:10) Ug makaduol ta sa mga igsoon—sa atong espirituwal nga pamilya—kinsa makadasig kanato! Maminaw sila dihang nagkinahanglan tag kaestorya, ug makadasig sila kanato. (Prov. 12:25; 1 Tes. 5:14) Si Joy, sister nga taga-Nigeria nga naningkamot nga madaog ang kaluya sa buot, miingon: “Mag-unsa na lang kaha ko kon wala pa ang mga igsoon? Ang pagdasig nga akong nadawat sa mga igsoon nagpakita nga gitubag ni Jehova ang akong mga pag-ampo. Nakakat-on pa gani ko nila kon unsaon pagdasig kadtong mga naluya.” Pero kinahanglan natong hinumdoman nga dili sa tanang higayon nga mahibaloan sa atong mga igsoon nga nagkinahanglan tag pagdasig. Busa kinahanglan tingali nga kitay mounag duol sa usa ka hamtong nga igsoon ug sultihan siya nga nagkinahanglan tag tabang. w20.12 23-24 ¶7-8
Huwebes, Mayo 5
Gitawag mo nakong mga higala.—Juan 15:15.
Sagad, ang una nimong himoon aron masuod ka sa usa mao ang paggahin ug panahon uban kaniya. Samtang mag-estoryahay mo bahin sa inyong mga hunahuna ug mga eksperyensiya, mahimo mong managhigala. Pero kon bahin sa pagpakigsuod kang Jesus, dunay mga kalisdanan. Ang usa niana mao nga dili nato makita si Jesus. Ingon ana sab ang kahimtang sa daghang Kristohanon sa unang siglo. Bisan pa niana, si apostol Pedro miingon: “Bisag wala mo makakita niya, gihigugma ninyo siya. Bisag wala mo makakita niya karon, nagpakita mog pagtuo kaniya.” (1 Ped. 1:8) Busa posibleng masuod kang Jesus bisag dili nato siya makita. Ang laing rason mao nga dili nato maestorya si Jesus. Dihang mag-ampo ta, si Jehova ang atong kaestorya. Tinuod, mag-ampo ta sa ngalan ni Jesus, pero wala ta makig-estorya kaniya. Gani, dili gusto ni Jesus nga moampo ta kaniya. Ngano? Tungod kay ang pag-ampo maoy matang sa pagsimba, ug si Jehova lang ang angayng simbahon. (Mat. 4:10) Bisan pa niana, mapakita gihapon nato ang atong gugma kang Jesus. w20.04 20 ¶1-3
Biyernes, Mayo 6
Palig-onon mo [sa Diyos], hatagan mo niyag kusog.—1 Ped. 5:10.
Ang mga magdadagan sa mga dula sa Gresya kinahanglang molahutay sa mga kalisdanan sama sa kakapoy ug kaul-ol sa lawas. Pero ang ila lang gisaligan mao ang ilang pagbansay ug ang ilang kaugalingong kusog. Sama ta sa maong mga magdadagan kay gibansay ta kon unsaon pagdagan sa lumba nga atong giapilan. Pero naa tay bentaha sa literal nga mga magdadagan. Makapangayo tag tabang kang Jehova, ug walay limitasyon ang mahatag niyang tabang kanato. Kon mosalig ta niya, siya nagsaad nga dili lang kay bansayon ta niya, hatagan pa gyod ta niyag kusog! Si apostol Pablo daghag gilahutay nga kalisdanan. Gawas nga giinsulto ug gilutos, siya mibati sab usahay ug kaluya ug nagsagubang sa gitawag niya nga “tunok sa unod.” (2 Cor. 12:7) Pero imbes mosurender, giisip niya kana ingong kahigayonan sa pagsalig kang Jehova. (2 Cor. 12:9, 10) Kay ingon niana ang panghunahuna ni Pablo, gitabangan siya ni Jehova sa tanan niyang kalisdanan. w20.04 29 ¶13-14
Sabado, Mayo 7
Walay tawo nga makaari kanako gawas kon siya gikabig sa Amahan.—Juan 6:44.
Duna tay dili makitang regalo nga mahimong “isigkamagbubuhat” ni Jehova ug sa langitnong bahin sa iyang organisasyon. (2 Cor. 6:1) Mahimo nato kana matag higayon nga makigbahin ta sa ministeryo. Si Pablo miingon bahin kaniya ug niadtong nakigbahin niini nga buluhaton: “Kami mga isigkamagbubuhat sa Diyos.” (1 Cor. 3:9) Dihang makigbahin ta sa ministeryo, kita mga isigkamagbubuhat usab ni Jesus. Hinumdomi nga human sugoa ni Jesus ang iyang mga sumusunod nga tudloan ‘ang mga tawo sa tanang kanasoran aron mahimong mga tinun-an,’ siya miingon: “Ako magauban kaninyo.” (Mat. 28:19, 20) Ug komosta ang bahin sa mga anghel? Mapasalamaton gyod ta nga ang mga anghel naggiya kanato samtang atong ginasangyaw ang “walay kataposang maayong balita ngadto sa mga nagpuyo sa yuta.” (Pin. 14:6) Tungod sa tabang gikan sa langit, unsay atong nalampos? Samtang nagpugas ta sa mensahe sa Gingharian, ang pipila ka binhi mahulog sa madinawatong kasingkasing ug motubo. (Mat. 13:18, 23) Kinsay nagpahinabo nga ang maong mga binhi sa kamatuoran motubo ug mamunga? Gipatin-aw kana ni Jesus sa teksto karong adlawa. w20.05 30 ¶14-15
Dominggo, Mayo 8
Hunong na sa pagpaimpluwensiya niini nga sistema sa mga butang.—Roma 12:2.
Minilyong pamilya karon ang nabahin tungod sa diborsiyo. Bisan ang mga pamilya nga nagpuyo sa usa lang ka balay dili suod sa usag usa. “Ang inahan, amahan, ug mga anak dili na mag-estoryahanay ug pirme na lang mag-atubang sa ilang computer, tablet, smartphone, o magdulag video game,” miingon ang usa ka magtatambag sa pamilya. “Bisag kini nga mga pamilya nagpuyo sa usa lang ka balay, morag dili sila magkaila.” Dili nato gustong maimpluwensiyahan sa dili mahigugmaong mga tawo sa kalibotan. Hinunoa, kinahanglan natong ugmaron ang mabinationg pagmahal dili lang sa atong pamilya kondili sa ato pong mga igsoon sa kongregasyon. (Roma 12:10) Unsa ang mabinationg pagmahal? Nagtumong ni sa suod nga relasyon tali sa mga membro sa pamilya. Kana ang klase sa gugma nga kinahanglan natong ugmaron para sa atong espirituwal nga pamilya—ang mga igsoon sa kongregasyon. Sa dihang magpakita tag mabinationg pagmahal, makatabang ta sa pagmentinar sa panaghiusa nga importante sa matuod nga pagsimba.—Miq. 2:12. w21.01 20 ¶1-2
Lunes, Mayo 9
Bug-osa ang akong kasingkasing aron mahadlok ko sa imong ngalan.—Sal. 86:11.
Ang sports team nga nagkahiusa mas dakog purohan nga molampos kay sa team nga wala magkahiusa. Ang imong kasingkasing mahisama nianang malamposon nga team kon ang imong hunahuna, tinguha, ug emosyon nagkahiusa sa pag-alagad kang Jehova. Hinumdomi, gusto gyod ni Satanas nga mabahin ang imong kasingkasing. Gusto niya nga ang imong hunahuna, tinguha, ug emosyon dili magkahiusa ug mosupak sa mga sukdanan ni Jehova. Pero kinahanglang bug-os ang imong kasingkasing aron makaalagad ka kang Jehova. (Mat. 22:36-38) Ayaw gyod tugoti si Satanas sa pagbahin sa imong kasingkasing! Sama kang David, pag-ampo kang Jehova: “Bug-osa ang akong kasingkasing aron mahadlok ko sa imong ngalan.” Paningkamot pag-ayo nga ipadapat nâ sa imong kinabuhi. Kada adlaw, magmadeterminado nga sa imong mga desisyon, gamay man o dako, ikapakita nimo nga gitahod nimo pag-ayo ang balaang ngalan ni Jehova. Pinaagi niana, ingong usa sa mga Saksi ni Jehova, makatabang ka nga mabalaan ang iyang ngalan. (Prov. 27:11) Ug sama kang propetang Miqueas, kitang tanan makaingon: “Kita maglakaw sa ngalan ni Jehova nga atong Diyos hangtod sa kahangtoran.”—Miq. 4:5. w20.06 13 ¶17-18
Martes, Mayo 10
Siya mogawas nga may dakong kasuko aron puohon ug laglagon ang daghan.—Dan. 11:44.
Dihang ang hari sa amihanan ug ang uban pang gobyerno sa kalibotan moatake sa katawhan sa Diyos, ang Labing Gamhanan masuko pag-ayo, dayon magsugod ang Armagedon. (Pin. 16:14, 16) Nianang panahona, laglagon ang hari sa amihanan ug ang uban pang nasod nga bahin sa Gog sa Magog, ug “walay motabang kaniya.” (Dan. 11:45) Ang sunod nga bersikulo sa asoy ni Daniel naghatag ug dugang nga detalye kon sa unsang paagi laglagon ang hari sa amihanan ug ang mga kaalyado niini, ug kon sa unsang paagi ta luwason. (Dan. 12:1) Unsay gipasabot niini nga bersikulo? Ang Miguel maoy laing ngalan sa atong nagamandong Hari, si Kristo Jesus. Siya “nagtindog alang” sa katawhan sa Diyos sukad niadtong 1914 dihang ang iyang Gingharian natukod sa langit. Sa dili madugay, siya “motindog,” o maglaglag sa iyang mga kaaway, sa gubat sa Armagedon. Ang maong gubat mao ang kataposang panghitabo diha sa gitawag ni Daniel nga kinagrabehang “panahon sa kasakitan.”—Pin. 6:2; 7:14. w20.05 15-16 ¶15-17
Miyerkoles, Mayo 11
Si Jose gidala . . . sa Ehipto.—Gen. 39:1.
Sa dihang si Jose naulipon ug sa ulahi napriso, wala kaayo siyay mahimo aron mausab ang iyang kahimtang. Unsay nakatabang niya sa pagpabiling positibo? Imbes magpokus sa kon unsay dili niya mahimo, gihimo niya ang iyang maarangan sa gipabuhat kaniya. Kanunayng giisip ni Jose si Jehova ingong labing importanteng Persona sa iyang kinabuhi. Tungod niana, gipanalanginan ni Jehova ang tanang gibuhat ni Jose. (Gen. 39:21-23) Ang nahitabo kang Jose nagpahinumdom kanato nga niining kalibotana, makasinati tag inhustisya. Basin mapasakitan pa gani ta sa mga igsoon. Pero kon isipon nato si Jehova ingong atong Bato, o Dangpanan, dili ta maluya pag-ayo o mohunong sa pag-alagad kaniya. (Sal. 62:6, 7; 1 Ped. 5:10) Hinumdomi sab nga si Jose mga 17 anyos tingali dihang gipakitaan siya ni Jehova ug espesyal nga pagtagad. Busa si Jehova may pagsalig sa iyang batan-ong mga alagad. Karon, daghang batan-on ang sama kang Jose. Sila may pagtuo sab kang Jehova. Ang pipila kanila gipriso pa gani kay wala nila ikompromiso ang ilang pagkamaunongon sa Diyos.—Sal. 110:3. w20.12 16 ¶3; 17 ¶5, 7
Huwebes, Mayo 12
Gipatawag nila ang mga apostoles, gibunalan sila, ug gibaoran nga mohunong na sa pagsulti pinasukad sa ngalan ni Jesus.—Buh. 5:40.
Giisip ni apostol Pedro ug Juan nga usa ka kadungganan nga lutoson sila tungod sa pagsunod kang Jesus ug pagtudlo sa uban bahin kaniya. (Buh. 4:18-21; 5:27-29, 41, 42) Ang mga tinun-an walay angayng ikaulaw. Sa ngadtongadto, ang maong mapainubsanong mga Kristohanon sa unang siglo mas daghag nahimong kaayohan sa uban kay sa ilang mga magsusupak. Pananglitan, ang mga basahon sa Bibliya nga gisulat sa pipila sa maong mga Kristohanon padayong naghatag ug tabang ug paglaom ngadto sa milyonmilyong tawo. Ug ang Gingharian nga ilang gisangyaw nagmando na karon sa langit ug sa dili madugay magmando sa tanang katawhan. (Mat. 24:14) Ang gamhanang gobyerno nga naglutos sa mga Kristohanon dugay nang nahanaw, samtang ang maong maunongong mga tinun-an naghari na karon sa langit. Ang ilang mga magsusupak nangamatay na; ug kon banhawon man galing sila, mandoan sila sa Gingharian nga gisangyaw sa mga Kristohanon nga ilang gidumtan.—Pin. 5:10. w20.07 15 ¶4
Biyernes, Mayo 13
Gipaabot [ni Abraham] ang siyudad nga may tinuod nga mga pundasyon, nga ang tigdisenyo ug magtutukod mao ang Diyos.—Heb. 11:10.
Lig-on kaayo ang pagtuo ni Abraham sa mga saad sa Diyos nga mora bag nakita niya ang Dinihogan, o Mesiyas, kinsa mahimong Hari sa Gingharian sa Diyos. Tungod niana, giingnan ni Jesus ang mga Hudiyo sa iyang panahon: “Si Abraham nga inyong amahan nalipay pag-ayo sa paglaom nga makita ang akong adlaw, ug siya nakakita niini ug nagmaya.” (Juan 8:56) Klaro nga nahibalo si Abraham nga ang pipila sa iyang mga kaliwat mahimong bahin sa Gingharian nga tukoron ni Jehova, ug andam siyang magpaabot nga tumanon ni Jehova kanang saara. Sa unsang paagi gipakita ni Abraham nga nagpaabot siya sa siyudad, o Gingharian, nga tukoron sa Diyos? Una, si Abraham wala mahimong lungsoranon sa bisan unsang gingharian dinhi sa yuta. Siya nagbalhinbalhin ug puyo ug wala gyod mosuportar sa usa ka tawhanong hari. Dugang pa, si Abraham wala magtukod ug kaugalingong gingharian. Hinunoa, padayon siyang nagsunod kang Jehova ug nagpaabot nga tumanon Niya ang Iyang saad. Pinaagi niana, gipakita ni Abraham ang iyang talagsaong pagtuo kang Jehova. w20.08 3 ¶4-5
Sabado, Mayo 14
Siya nga namatay gipagawas na gikan sa iyang sala.—Roma 6:7.
Si Jehova nagsaad nga sa Paraiso, walay moingon: “Masakiton ko.” (Isa. 33:24) Busa ang mga binanhaw lalangon pag-usab nga may himsog nga lawas. Pero dili dayon sila mahimong hingpit. Kay kon mao, basig dili na sila mailhan sa ilang mga minahal. Posible nga ang tanang katawhan anam-anam nga mahimong hingpit panahon sa Usa ka Libo ka Tuig nga Pagmando sa Kristo. Inigkahuman lang sa usa ka libo ka tuig nga ibalik ni Jesus ang Gingharian ngadto sa iyang Amahan. Nianang panahona, nahimo na sa Gingharian ang tanang gipahimo ni Jehova, apil na ang paghimo sa katawhan nga hingpit. (1 Cor. 15:24-28; Pin. 20:1-3) Imadyina ang mahitabo dihang abiabihon na nimo ang imong mga minahal. Sa imong kalipay, makakatawa ka ba o makahilak? Makakanta ka ba sa pagdayeg kang Jehova? Usa ka butang ang segurado: Mobati kag dakong gugma para sa imong mapinanggaong Amahan ug sa iyang mahigugmaong Anak tungod sa ilang nindot nga regalo—ang pagkabanhaw. w20.08 16-17 ¶9-10
Dominggo, Mayo 15
Ang matag usa dunay kaugalingong gasa gikan sa Diyos, ang usa niining paagiha, ug ang lain nianang paagiha.—1 Cor. 7:7.
Gidasig ni apostol Pablo ang mga Kristohanon nga konsiderahon kon makaalagad ba sila kang Jehova ingong tagsaanon. (1 Cor. 7:8, 9) Klaro nga wala pakamenosa ni Pablo ang mga Kristohanon nga dili minyo. Gani, gipili niya ang batan-ong si Timoteo, nga usa ka ulitawo, sa pag-atiman sa bug-at nga mga asaynment. (Filip. 2:19-22) Busa sayop gyod ang paghunahuna nga ang usa ka brader mas kuwalipikado o dili kaayo kuwalipikado tungod lang kay siya minyo o tagsaanon. (1 Cor. 7:32-35, 38) Si Jesus ug Pablo wala magtudlo nga ang mga Kristohanon angay o dili angayng magminyo. Busa, unsay atong ikasulti bahin sa kaminyoon ug pagkatagsaanon? Nindot ang giingon sa Oktubre 1, 2012 nga Bantayanang Torre bahin niana: “Ang kaminyoon ug pagkatagsaanon parehong gihubit ingong mga gasa sa Diyos. . . . Si Jehova wala mag-isip [sa pagkatagsaanon] ingong hinungdan sa kaulawan o kasub-anan.” Busa kinahanglan natong tahoron ang dili minyong mga igsoon sa kongregasyon. w20.08 28 ¶8-9
Lunes, Mayo 16
Bahin nianang adlawa ug orasa walay nahibalo, . . . ang Amahan lang.—Mat. 24:36.
Sa pipila ka nasod, ang mga tawo malipay dihang makadungog sila sa maayong balita. Dugay na nila kanang gipaabot! Sa ubang nasod, kadaghanan sa mga tawo wala kaayoy interes sa Diyos o sa Bibliya. Unsay komon nga reaksiyon sa inyong dapit? Bisan unsa pa man, gusto ni Jehova nga magpadayon ta sa pagsangyaw hangtod moingon siya nga ang buluhaton natapos na. Gitakda na ni Jehova kon kanus-a matapos ang buluhatong pagsangyaw. Dayon, “moabot ang kataposan.” (Mat. 24:14) Si Jesus nagtagna sa mga hitabo ug kahimtang nga mahimong ilhanan sa kataposang mga adlaw ug posibleng makabalda sa iyang mga sumusunod sa pag-una sa buluhatong pagsangyaw. Giingnan niya ang iyang mga tinun-an nga ‘magpadayon sa pagbantay.’ (Mat. 24:42) Karon, duna poy mga kabaldahan nga susama niadtong nakapugong sa mga tawo sa adlaw ni Noe sa pagpaminaw sa pasidaan nga iyang gihatag. (Mat. 24:37-39; 2 Ped. 2:5) Busa, kinahanglan nga padayon natong unahon ang buluhaton nga gipabuhat ni Jehova kanato. w20.09 8 ¶1-2; 9 ¶4
Martes, Mayo 17
Ang tanan nga nagkinabuhi nga nahiusa kang Kristo Jesus ug may debosyon ngadto sa Diyos lutoson sab.—2 Tim. 3:12.
Si Satanas may “dakong kasuko,” ug gilimbongan nato ang atong kaugalingon kon maghunahuna ta nga makalikay ta sa iyang kasuko. (Pin. 12:12) Sa dili madugay, kitang tanan makasinatig mga pagsulay sa atong pagtuo. Ang kalibotan hapit nang makasinati sa “dakong kasakitan nga wala pa mahitabo sukad sa sinugdan sa kalibotan hangtod karon.” (Mat. 24:21) Nianang panahona, ang mga membro sa atong pamilya mahimong mokontra nato ug ang atong buluhaton posibleng idili. (Mat. 10:35, 36) Sundogon ba nato si Haring Asa ug mosalig sa tabang ug proteksiyon ni Jehova? (2 Cron. 14:11) Ginaandam ta ni Jehova karon aron molig-on ang atong pagtuo. Iyang gigamit “ang matinumanon ug maalamong ulipon” sa paghatag kanato ug “pagkaon sa hustong panahon” aron makapabilin tang lig-on sa espirituwal. (Mat. 24:45) Pero kinahanglan tang maningkamot aron molig-on ang atong pagtuo kang Jehova.—Heb. 10:38, 39. w20.09 18 ¶16-18
Miyerkoles, Mayo 18
Ang kasingkasing sa usa ka hari samag agos sa sapa sa kamot ni Jehova. Iya ning giyahan bisan asa Niya gusto.—Prov. 21:1.
Kon uyon sa iyang katuyoan, puwedeng gamiton ni Jehova ang iyang gamhanang balaang espiritu aron himoon sa mga tawong dunay awtoridad ang iyang gusto. Ang mga tawo puwedeng magkalot ug kanal aron patipason ang tubig sa sapa ngadto sa direksiyon nga gusto nila. Sa susama, pinaagi sa iyang espiritu, puwedeng patipason ni Jehova ang hunahuna sa mga magmamando aron molihok sila uyon sa iyang katuyoan. Kon mahitabo kana, ang mga tawong dunay awtoridad mapalihok sa paghimog mga desisyon nga makahatag ug kaayohan sa katawhan sa Diyos. (Itandi ang Esdras 7:21, 25, 26.) Unsay atong mahimo? Puwede natong iampo ‘ang mga hari ug ang tanan nga may awtoridad’ dihang sila kinahanglang mohimog mga desisyon nga makaapektar sa atong Kristohanong kinabuhi ug ministeryo. (1 Tim. 2:1, 2, footnote; Neh. 1:11) Sama sa mga Kristohanon sa unang siglo, kita tim-os ug mapinadayonong nag-ampo sa Diyos para sa atong mga igsoon nga napriso.—Buh. 12:5; Heb. 13:3. w20.11 15 ¶13-14
Huwebes, Mayo 19
Adtoa ninyo ang mga tawo sa tanang kanasoran ug tudloi sila aron mahimong akong mga tinun-an. Bawtismohi sila.—Mat. 28:19.
Kon ikaw ang nag-study sa bag-ong tinun-an, mobati kag dako kaayong kalipay! (1 Tes. 2:19, 20) Ang bag-ong nabawtismohan nga mga tinun-an maoy maayong “mga sulat sa rekomendasyon,” dili lang sa nag-study nila kondili sa tibuok kongregasyon usab. (2 Cor. 3:1-3) Makapalipay kaayo nga sulod sa upat ka tuig, sa aberids, dihay mga 10,000,000 ka Bible study nga gireport kada bulan sa tibuok kalibotan. Ug nianang mga tuiga, sa aberids, kapig 280,000 ang nabawtismohan kada tuig ingong mga Saksi ni Jehova ug bag-ong mga tinun-an ni Jesu-Kristo. Unsay atong himoon aron mas daghan pa tag matabangan nga Bible study nga mabawtismohan? Samtang si Jehova mapailobong naghatag sa mga tawo ug panahon ug kahigayonan nga mahimong mga tinun-an sa Kristo, gusto natong buhaton ang tanan natong maarangan aron tabangan sila nga mouswag ug mabawtismohan sa labing madali. Mubo na lang kaayo ang panahon!—1 Cor. 7:29a; 1 Ped. 4:7. w20.10 6 ¶1-2
Biyernes, Mayo 20
Ang Diyos mobatok sa mga mapahitas-on, apan siya mohatag ug dili hitupngang pagkamaayo sa mga mapainubsanon.—Sant. 4:6.
Wala sunda ni Haring Saul si Jehova. Ug dihang giestorya siya ni propetang Samuel bahin niana, wala dawata ni Saul ang iyang sayop. Hinunoa, iyang gipakamatarong ang iyang gihimo pinaagi sa pag-ingon nga dili kaayo to seryosong butang ug nga gipugos lang siya sa mga tawo. (1 Sam. 15:13-24) Una pa niana, nagpakita na si Saul ug susamang kinaiya. (1 Sam. 13:10-14) Ikasubo, gitugotan niya nga mahimong mapahitas-on ang iyang kasingkasing. Wala niya usba ang iyang panghunahuna, busa gibadlong siya ni Jehova ug gisalikway. Aron makakuha tag leksiyon sa pananglitan ni Saul, kinahanglan natong pangutan-on ang atong kaugalingon niini nga mga pangutana: ‘Dihang makabasa kog tambag gikan sa Pulong sa Diyos, maghunahuna ba ko nga dili ni mapadapat kanako? Mangrason ba ko nga dili ra man daotan ang akong gihimo? Basolon ba nako ang ubang tawo sa akong gihimo?’ Kon oo ang atong tubag sa bisan hain niana nga mga pangutana, kinahanglan natong usbon ang atong panghunahuna ug pagbati. Kay kon dili, ang atong kasingkasing mahimong mapahitas-on ug isalikway ta ni Jehova ingong iyang higala. w20.11 20 ¶4-5
Sabado, Mayo 21
Hinumdomi ang imong Dakong Maglalalang sa mga adlaw sa imong pagkabatan-on, sa dili pa moabot ang mga adlaw sa kagul-anan ug ang mga tuig dihang moingon ka: “Wala koy kalipay sa kinabuhi.”—Eccl. 12:1.
Mga batan-on, magdesisyon kon kinsay inyong alagaran. Kinahanglan ninyong pamatud-an sa inyong kaugalingon kon kinsa si Jehova, kon unsay iyang katuyoan, ug kon unsaon ninyo kini paghimo. (Roma 12:2) Pinaagi niana, makahimo mo sa pinakaimportanteng desisyon, ang pag-alagad kang Jehova. (Jos. 24:15) Kon regular mong magbasa ug magtuon sa Bibliya, mas modako ang inyong gugma kang Jehova ug mas molig-on ang inyong pagtuo kaniya. Magdesisyon nga unahon ang kabubut-on ni Jehova. Ang kalibotan ni Satanas nagsaad nga kon inyong gamiton ang inyong mga katakos para sa inyong kaugalingong interes, magmalipayon mo. Ang tinuod, kadtong nagpokus sa materyal nga mga tumong nagtusaktusak sa ilang kaugalingon “sa daghang kasakitan.” (1 Tim. 6:9, 10) Pero, kon maminaw mo kang Jehova ug modesisyon nga unahon ang iyang kabubut-on, kamo magmalamposon ug “molihok nga maalamon.”—Jos. 1:8. w20.10 30-31 ¶17-18
Dominggo, Mayo 22
Kinahanglan . . . nakong isangyaw ang maayong balita sa Gingharian sa Diyos . . . kay ako gipadala alang niini.—Luc. 4:43.
Sa unang siglo, ang mensahe nga gisangyaw ni Jesus naghatag ug paglaom sa tanan. Iyang gisugo ang iyang mga sumusunod nga ipadayon ang buluhaton nga iyang gisugdan, aron sa paghatag ug pamatuod “hangtod sa kinalay-ang bahin sa yuta.” (Buh. 1:8) Siyempre, dili nila ni mahimo sa kaugalingon nilang paningkamot. Magkinahanglan sila sa balaang espiritu, “ang magtatabang” nga gisaad ni Jesus kanila. (Juan 14:26; Zac. 4:6) Ang mga sumusunod ni Jesus nakadawat sa balaang espiritu niadtong Pentekostes 33 C.E. Sa tabang niana nga espiritu, sila misugod dayon sa pagsangyaw, ug sa mubo lang nga panahon, linibo ang midawat sa maayong balita. (Buh. 2:41; 4:4) Dihang mitungha ang paglutos, ang mga tinun-an wala magpadaog sa kahadlok kondili nangayo silag tabang sa Diyos. Sila nag-ampo: “Tabangi ang imong mga ulipon nga padayong mosulti sa imong pulong uban ang bug-os nga kaisog.” Unya, sila napuno sa balaang espiritu ug padayong “nagsulti sa pulong sa Diyos nga may kaisog.”—Buh. 4:18-20, 29, 31. w20.10 21 ¶4-5
Lunes, Mayo 23
Ang Kristo namatay alang sa atong mga sala sumala sa Balaang Kasulatan; ug . . . siya gibanhaw.—1 Cor. 15:3, 4.
Nganong makaseguro ta nga gibanhaw ni Jehova si Jesus? Dihay daghang nakakita nga nabanhaw si Jesus, ug ila nang gisulti sa uban. (1 Cor. 15:5-7) Ang unang saksi nga gihisgotan ni apostol Pablo mao si apostol Pedro (Cefas). Ang usa ka grupo sa mga tinun-an nagpamatuod nga nakita ni Pedro ang nabanhawng si Jesus. (Luc. 24:33, 34) Dugang pa, ‘ang Dose,’ ang mga apostoles, nakakita kang Jesus human siya mabanhaw. Dayon ang Kristo “nagpakita sa kapin sa 500 ka igsoon sa usa ka higayon,” tingali diha sa malipayong okasyon sa Galilea nga gihisgotan sa Mateo 28:16-20. Si Jesus “nagpakita [sab] kang Santiago,” posible ang igsoon ni Jesus sa inahan, kinsa kaniadto wala motuo nga si Jesus ang Mesiyas. (Juan 7:5) Human makita ni Santiago ang nabanhawng si Jesus, siya nakombinsir. Makapainteres, sa mga 55 C.E. dihang gisulatan ni Pablo ang mga taga-Corinto, daghan niadtong nakakita sa pagkabanhaw ni Jesus ang buhi pa. Busa kon dunay magduhaduha, puwede nilang pangutan-on ang kasaligan ug buhi pa nga mga saksi. w20.12 3 ¶5, 7-8
Martes, Mayo 24
Si Jehova magpalig-on kaniya sa iyang higdaanan dihang siya masakit.—Sal. 41:3.
Kon dili maayo ang atong paminaw, ug ilabina kon dugay na tang nag-antos sa usa ka sakit, lisod tingaling magpabiling positibo. Busa pangayog tabang kang Jehova. Bisag dili ta ayohon ni Jehova sa milagrosong paagi karon, iya tang hupayon ug hatagag kusog aron makalahutay. (Sal. 94:19) Pananglitan, palihokon tingali niya ang atong mga isigkamagtutuo sa pagtabang kanato sa atong mga buluhaton sa balay. Mahimong palihokon niya ang mga igsoon sa pag-ampo uban kanato. O ipahinumdom niya kanato ang makapahupayng mga pulong sa Bibliya, sama sa nindot nga paglaom nga sa umaabot nga bag-ong kalibotan, makabaton tag hingpit nga kinabuhi nga walay balatian ug kasakit. (Roma 15:4) Pero, mobati tingali ta nga limitado na ang atong mahimo sa ministeryo. Ang sister nga si Laurel 37 ka tuig nga naghigda sulod sa iron lung, makina nga motabang niya sa pagginhawa. Siya may kanser sab, kadaghan maoperahi, ug may grabeng mga sakit sa panit. Pero kini wala makapugong niya sa pagsangyaw. Gisangyawan niya ang mga nars ug ang uban pa nga mobisita sa iyang balay ug nakatabang siya ug labing menos 17 ka tawo nga makakat-on bahin sa Bibliya! w20.12 24 ¶9; 25 ¶12
Miyerkoles, Mayo 25
Si Jehova dapig kanako; dili ko mahadlok. Unsay mabuhat sa tawo kanako?—Sal. 118:6.
Si apostol Pablo nagkinahanglag tabang. Niadtong mga 56 C.E., gipugos siya pagdala sa mga tawo pagawas sa templo sa Jerusalem ug misulay sila sa pagpatay kaniya. Pagkaugma, dihang gidala si Pablo atubangan sa Sanhedrin, halos mawataswatas na siya sa iyang mga kaaway. (Buh. 21:30-32; 22:30; 23:6-10) Nianang tungora, naghunahuna tingali si Pablo, ‘Hangtod kanus-a kaha nako maagwanta kini nga pagmaltratar?’ Unsang tabang ang nadawat ni Pablo? Sa gabii human madakpi si Pablo, “ang Ginoo,” si Jesus, mibarog duol kaniya ug miingon: “Magmaisogon! Kay sama nga naghatag kag bug-os nga pagpamatuod bahin kanako sa Jerusalem, kinahanglang magpamatuod usab ka sa Roma.” (Buh. 23:11) Tayming kaayo to nga pagdasig! Gikomendahan ni Jesus si Pablo sa iyang pagpamatuod sa Jerusalem. Ug gisaaran niya si Pablo nga luwas kining makaabot sa Roma, diin mohatag kinig dugang pamatuod. Human siya pasaligi, seguradong mibating luwas si Pablo, sama sa usa ka bata nga gikugos sa iyang amahan. w20.11 12 ¶1, 3; 13 ¶4
Huwebes, Mayo 26
Kining paglaom nga atong nabatonan . . . segurado ug lig-on.—Heb. 6:19.
Ang atong paglaom sa Gingharian magsilbing “angkla sa atong kinabuhi,” nga magpalig-on kanato bisan pa sa lisod o makapabalakang mga kahimtang. Palandonga ang saad ni Jehova nga sa umaabot wala na tay angayng kabalak-an. (Isa. 65:17) Imadyina ang imong kaugalingon sa malinawong bag-ong kalibotan diin wala nay makapaguol nga mga kahimtang. (Miq. 4:4) Molig-on sab ang imong paglaom dihang isulti nimo kini sa uban. Magkugi diha sa buluhatong pagsangyaw ug paghimog tinun-an. Kon buhaton nimo kana, mabatonan nimo ang ‘seguradong paglaom hangtod sa kataposan.’ (Heb. 6:11) Samtang magkaduol ang kataposan niining sistemaha sa mga butang, masinati nato ang dugang mga problema nga makapabalaka kanato. Maatubang nato ang maong mga problema ug makapabilin tang kalmado, dili pinaagi sa atong kaugalingong kusog, kondili sa atong pagsalig kang Jehova. Ipakita nato sa atong mga binuhatan nga may pagtuo ta sa saad ni Jehova: “Mahimo mong kusgan kon magpabilin mong kalmado ug mosalig mo.”—Isa. 30:15. w21.01 7 ¶17-18
Biyernes, Mayo 27
Si Jehova mabination kaayo.—Sant. 5:11.
Matikdi nga ang Santiago 5:11 naghisgot sa pagkamabination ni Jehova uban sa laing hiyas nga makapasuod nato kaniya—ang iyang pagkamaluluy-on. (Ex. 34:6) Ang usa ka paagi nga si Jehova nagpakitag pagkamaluluy-on mao ang pagpasaylo sa atong kasaypanan. (Sal. 51:1) Sa Bibliya, ang pagkamaluluy-on wala lang magpasabot ug pagpasaylo. Kini nagpasabot sab ug kusganong pagbati nga bation sa usa dihang makakita siyag tawo nga naa sa kalisdanan ug tungod niana, mapalihok siya sa pagtabang sa maong tawo. Si Jehova nag-ingon nga ang iyang tinguha sa pagtabang kanato mas kusganon pa kay sa pagbati sa usa ka inahan ngadto sa iyang gamayng bata. (Isa. 49:15) Sa dihang kita anaa sa kalisdanan, ang pagkamaluluy-on ni Jehova magpalihok niya sa pagtabang kanato. (Sal. 37:39; 1 Cor. 10:13) Makapakita tag kaluoy sa atong mga igsoon pinaagi sa pagpasaylo kanila ug dili paghambin ug kasuko dihang makasala sila kanato. (Efe. 4:32) Pero ang usa ka pangunang paagi nga makapakita tag kaluoy mao ang pagtabang sa atong mga igsoon dihang duna silay mga problema. Pinaagi niana, atong gisundog si Jehova, ang kinalabwang ehemplo sa mabinationg pagmahal.—Efe. 5:1. w21.01 21 ¶5
Sabado, Mayo 28
Ang Kristo . . . nagbilin kaninyog sulondan aron sundon ninyo pag-ayo ang iyang mga tunob.—1 Ped. 2:21.
Ang ulo sa pamilya kinahanglang mahimong balanse. Dili siya angayng magsige na lag trabaho nga dili na niya maatiman ang espirituwal ug emosyonal nga panginahanglan sa iyang pamilya ug ang pagtaganag pagbansay kanila. Si Jehova nagbansay ug nagdisiplina kanato alang sa atong kaayohan. (Heb. 12:7-9) Sama sa iyang Amahan, si Jesus nagbansay niadtong ilalom sa iyang awtoridad sa mahigugmaong paagi. (Juan 15:14, 15) Siya mohatag ug bug-at nga tambag pero mabination sab siya. (Mat. 20:24-28) Siya nakasabot nga kita dili hingpit ug sagad masayop. (Mat. 26:41) Ang ulo sa pamilya nga nagsundog kang Jehova ug Jesus mohatag ug konsiderasyon sa kasaypanan sa iyang asawa ug mga anak. Dili siya ‘masuko pag-ayo’ kanila. (Col. 3:19) Hinunoa, iyang ipadapat ang prinsipyo sa Galacia 6:1 ug maningkamot siya sa pagtul-id kanila “sa malumong paagi,” nga maghunahuna nga siya dili sab hingpit. Sama kang Jesus, siya nahibalo nga ang pagpakitag maayong ehemplo mao ang kinamaayohang paagi sa pagtudlo. w21.02 6-7 ¶16-18
Dominggo, Mayo 29
Padayega kang Jah ang tanang buhing linalang.—Sal. 150:6.
Pinaagi sa lukat, gipalit ni Jehova ang kinabuhi sa matag indibiduwal diha sa kongregasyon ug ni bisan kinsa nga magpakitag pagtuo kang Jesus. (Mar. 10:45; Buh. 20:28; 1 Cor. 15:21, 22) Busa haom nga iyang gitudlo si Jesus, kinsa naghalad sa iyang kinabuhi para kanato, ingong ulo sa kongregasyon. Ingong atong ulo, si Jesus may awtoridad sa paghimo ug pagpatuman ug mga balaod kon unsay angayng buhaton sa matag indibiduwal, pamilya, ug sa tibuok kongregasyon. (Gal. 6:2) Pero si Jesus wala lang maghimog mga balaod. Siya nagpakaon ug nagpangga sa matag usa kanato. (Efe. 5:29) Gipakita sa mga sister nga ilang gitahod ang Kristo pinaagi sa pagsunod sa giya nga gihatag sa mga lalaki nga gitudlo niya sa pag-atiman kanila. Gipakita sa mga brader nga ilang giapresyar ang kahikayan sa pagkaulo pinaagi sa pagtahod ug pagpasidungog sa mga sister. Kon ang tanan makasabot ug magtahod sa kahikayan sa pagkaulo, ang kongregasyon magmalinawon. Ug labaw sa tanan, madayeg nato ang atong mahigugmaon nga langitnong Amahan, si Jehova. w21.02 18-19 ¶14-17
Lunes, Mayo 30
Si David nagpakisayod kang Jehova.—1 Sam. 30:8.
Sa panahon nga si David ug ang iyang mga sundalo nagtagotago, gibiyaan nila ang ilang mga pamilya aron makiggubat. Samtang wala sila didto, gisulong sa mga kaaway ang ilang mga balay ug gibihag ang ilang mga pamilya. Puwede untang maghunahuna si David nga kay banggiitan siya nga manggugubat, seguradong makahimo siyag maayong estratehiya aron maluwas ang mga binihag. Pero, si David nangayog giya kang Jehova. Si David nangutana kang Jehova: “Gukdon ba nako kini nga mga bandido?” Giingnan ni Jehova si David nga gukdon sila ug gipasaligan siya nga mabawi niya ang tanan. (1 Sam. 30:7-10) Unsay inyong makat-onan niini nga hitabo? Pangayog tambag sa dili pa mohimog mga desisyon. Mga batan-on, konsultaha ang inyong ginikanan. Makakuha pod mog maayong tambag pinaagi sa pagpakig-estorya sa eksperyensiyadong mga ansiyano. Si Jehova may pagsalig niining tinudlong mga lalaki, ug makasalig pod mo nila. Giisip sila ni Jehova ingong mga gasa ngadto sa kongregasyon. (Efe. 4:8) Makabenepisyo mo kon inyong sundogon ang ilang pagtuo ug sundon ang ilang maayong mga sugyot. w21.03 4-5 ¶10-11
Martes, Mayo 31
[Walay] makabulag nato gikan sa gugma sa Diyos.—Roma 8:38, 39.
Si Jesus miingon nga kon dili nato ipadapat ang atong nakat-onan, sama ra ta sa tawo nga nagtukod sa iyang balay ibabaw sa balas. Siya naghago pero sayang lang ang iyang paningkamot. Ngano? Tungod kay sa dihang mibundak ang ulan, mibul-og ang baha, ug mihuros ang kusog nga hangin, ang iyang balay nagun-ob. (Mat. 7:24-27) Sa susama, kon dili nato ipadapat ang atong nakat-onan, sayang lang ang atong paningkamot. Sa dihang makasinati tag mga problema o paglutos, ang atong pagtuo dili makalahutay. Sa laing bahin, kon magtuon ta ug ipadapat nato ang atong nakat-onan, makahimo tag mas maayong mga desisyon, makabaton tag dugang kalinaw, ug mas molig-on ang atong pagtuo. (Isa. 48:17, 18) Aron makapabilin tang matinumanon dihang mag-atubang ug mga problema, kinahanglan nga padayon tang moampo kang Jehova ug regular nga magtuon sa iyang Pulong. Ug kinahanglang pirme natong hinumdoman nga usa sa pinakaimportanteng mga butang nga atong mahimo mao ang paghimaya kang Jehova. Makaseguro ta nga dili gyod ta biyaan ni Jehova ug walay makapugong niya sa paghigugma kanato.—Heb. 13:5, 6. w21.03 15 ¶6; 18 ¶20