Hulyo

Kinahanglang makigsuod ta kang Jesus aron dunggon ang atong mga pag-ampo. Nagpasabot ni nga dili lang kay moingon tag “sa ngalan ni Jesus” sa tumoy sa atong mga pag-ampo. Kinahanglang masabtan nato kon sa unsang paagi gigamit ni Jehova si Jesus sa pagtubag sa atong mga pag-ampo. Giingnan ni Jesus ang iyang mga apostoles: “Bisan unsay inyong ihangyo pinaagi sa akong ngalan, ako kining buhaton.” (Juan 14:13) Bisag si Jehova ang maminaw ug motubag sa atong mga pag-ampo, iyang gihatag kang Jesus ang awtoridad sa pagpatuman sa Iyang mga desisyon. Busa, sa dili pa tubagon sa Diyos ang atong mga pag-ampo, tan-awon una niya kon gipadapat ba nato ang tambag ni Jesus. Pananglitan, si Jesus miingon: “Kon inyong pasayloon ang mga tawo sa ilang kasaypanan, pasayloon usab kamo sa inyong langitnong Amahan; apan kon dili ninyo pasayloon ang mga tawo sa ilang kasaypanan, dili usab pasayloon sa inyong Amahan ang inyong kasaypanan.” (Mat. 6:14, 15) Busa importante gyod nga trataron nato ang uban sama sa maayong pagtratar ni Jehova ug Jesus kanato! w20.04 22 ¶6

Si apostol Pablo naningkamot nga mahibaloan kon unsay makapainteres sa iyang mamiminaw, ug iyang gipahaom ang iyang presentasyon. Pananglitan, ang mga tawo nga iyang naestorya sa Listra wala kaayoy nahibaloan o wala gyoy nahibaloan sa Kasulatan. Busa si Pablo misulti sa paagi nga ilang masabtan. Naghisgot siya bahin sa mabungahon nga mga ani ug sa kapasidad nga mag-enjoy sa kinabuhi. Migamit siyag mga pulong ug pananglitan nga daling masabtan sa iyang mamiminaw. Paningkamoti nga masabtan nimo kon unsay makapainteres sa mga tawo sa inyong teritoryo ug ipahaom ang imong presentasyon. Unsaon nimo ni pagkahibalo samtang nagpadulong ka sa usa ka tawo o sa iyang balay? Maayong maniid ka. Tingali nag-garden siya, nag-ayog sakyanan, o naay laing ginahimo. Kon haom, ibase sa iyang ginahimo ang imong pagpakig-estorya niya. (Juan 4:7) Naa kay mahibaloan bahin sa usa ka tawo bisan sa iyang sinina—tingali bahin sa iyang nasyonalidad, trabaho, o paboritong sports team. w20.04 11 ¶11-12

Tungod sa sobrang kabalaka, ang pipila ka igsoon mobatig grabeng kakulba bisan sa adlaw-adlawng situwasyon diin kauban nila ang ubang tawo. Tingali malisdan sila kon naa sa dagkong grupo, pero motambong gihapon sila sa mga tigom, asembliya, ug kombensiyon. Malisdan sila sa pagpakig-estorya sa dili nila kaila, pero nakigbahin gihapon sila sa ministeryo. Kon mao nay imong kahimtang, makasalig ka nga wala ka mag-inusara. Daghan ang sama nimo. Hinumdomi nga si Jehova nalipay sa imong tibuok kalag nga paningkamot. Ang imong paglahutay maoy pamatuod nga siya nagpanalangin kanimo ug naghatag nimo sa kusog nga imong gikinahanglan. (Filip. 4:6, 7) Kon nag-alagad ka kang Jehova bisan pa sa imong problema sa panglawas o emosyon, makasalig ka nga imong napalipay si Jehova. Daghan kanato ang dunay problema sa panglawas, pero nagpadayon ta sa paglahutay. (2 Cor. 4:16) Sa tabang ni Jehova, matapos natong tanan ang lumba! w20.04 31 ¶20-21

Ang kaalam sa Diyos klarong makita sa iyang paagi sa paghimo sa atong pinuy-anan, ang yuta. (Heb. 3:4) Ang yuta talagsaon kay nabatonan niini ang tanang gikinahanglan aron mabuhi ang tawo. Atong ikakomparar ang yuta sa usa ka barko diha sa lawod. Pero daghag kalainan ang barko nga punog tawo ug ang yuta. Pananglitan, unsa ka dugay mabuhi ang mga tawo sa barko kon silay magpatunghag oksiheno, pagkaon, ug tubig, ug kon dili nila ikalabay ang ilang basura sa dagat? Sa dili madugay, ang mga tawo nianang barkoha mangamatay. Pero lahi ang yuta kay kini nagsuportar sa kinabuhi sa bilyonbilyong tawo ug mananap. Kini nagpatungha sa tanang oksiheno, pagkaon, ug tubig nga atong gikinahanglan, ug dili ta mahutdan niana. Bisag ang tanang basura nagpabilin sa yuta, ang yuta nindot ug mapuy-an gihapon. Sa unsang paagi naposible kana? Gidisenyo ni Jehova ang yuta nga maka-recycle ug basura. w20.05 20 ¶3-4

Sa pagsulti niana, sama rag giingnan ni Satanas si Eva nga si Jehova bakakon. Busa si Satanas nahimong yawa, o tigpasipala. Si Eva bug-os nga nalimbongan; siya mituo kang Satanas. (1 Tim. 2:14) Mas misalig siya kang Satanas kay kang Jehova. Tungod niana, nahimo ni Eva ang sayop kaayong desisyon. Misupak siya kang Jehova. Gikaon niya ang bunga sa kahoy nga gidili ni Jehova. Unya, gihatagan sab niya si Adan. (Gen. 3:6) Hunahunaa kadiyot kon unsa untay angayng isulti ni Eva kang Satanas. Imadyina nga mao ni iyang gisulti: “Wala ko kaila nimo, pero nakaila ko sa akong Amahan, si Jehova, ug ako nahigugma ug nagsalig niya. Ang tanan namong nabatonan ni Adan naggikan kaniya. Unya mosulti kag daotan bahin niya? Pahawa!” Malipay gyod unta si Jehova nga makadungog nianang mga pulonga gikan sa mahigugmaon ug maunongon nga anak! (Prov. 27:11) Pero si Eva walay maunongong gugma kang Jehova, mao pod si Adan. Tungod niana wala madepensahi ni Adan ug Eva ang ngalan ni Jehova dihang kini gipasipalahan. w20.06 4 ¶10-11

Ang mga sister angayng komendahan sa tanan nilang gihimo sa pag-alagad kang Jehova. Apil niana ang pagtukod ug pagmentinar sa mga bilding, pagsuportar sa mga grupo nga langyaw ug pinulongan, ug pagboluntaryo sa Bethel. Sila nagsuportar sa disaster relief work, nagtabang sa paghubad sa atong mga publikasyon, ug nag-alagad ingong mga payunir ug misyonarya. Dugang pa, ang mga asawa nagtabang sa ilang mga bana sa pag-abaga sa bug-at nga mga responsibilidad diha sa kongregasyon ug sa organisasyon. Ang maong mga brader mas maglisod sa ilang papel ingong “gasa nga mga lalaki” kon wala sila suportahi sa ilang asawa. (Efe. 4:8) Ang maalamong mga ansiyano nahibalo nga ang mga sister maoy “usa ka dakong panon” nga andam motrabaho ug sagad epektibo kaayo sa ministeryo. Dugang pa, ang mga ansiyano nahibalo nga ang matinumanon ug hamtong nga mga sister maayo kaayo sa pagtabang sa batabatang mga sister nga nag-atubang ug mga problema. (Tito 2:3-5) Oo, ang mga sister angay gyong pabilhan! w20.09 23 ¶13-14

Si Jehova dili malimot niadtong nag-alagad kaniya kaniadto pero karon temporaryong mipalayo sa iyang katawhan. Dili sab niya kalimtan ang ilang gihimo kaniadto sa pag-alagad kaniya. (Heb. 6:10) Si propetang Isaias naggamit ug nindot nga ilustrasyon aron ipakita kon unsa ka dako ang pagmahal ni Jehova sa iyang katawhan. Siya misulat: “Samag magbalantay sa karnero, iyang atimanon ang iyang panon. Pinaagi sa iyang bukton iyang tapokon ang mga nating karnero, ug iya silang kugoson.” (Isa. 40:11) Unsay bation ni Jehova, ang Kinalabwang Magbalantay, kon ang usa moundang sa pag-alagad kaniya? Gipadayag ni Jesus kon unsay pagbati ni Jehova dihang iyang gipangutana ang iyang mga tinun-an: “Unsay inyong hunahuna? Kon ang usa dunay 100 ka karnero ug ang usa niini masaag, dili ba niya biyaan sa kabukiran ang 99 ug pangitaon ang usa nga nasaag? Ug kon makaplagan niya kini, sultihan ko kamo, mas dako ang iyang kalipay labot niining usa kay sa 99 nga wala masaag.”—Mat. 18:12, 13. w20.06 19-20 ¶8-9

Giisip nato nga pribilehiyo ang pag-alagad kang Jehova sa bisan unsang paagi nga atong maarangan. (Sal. 27:4; 84:10) Kon ang usa ka brader makaarang sa pagdawat ug espesyal nga pribilehiyo sa pag-alagad, dalayegon kana. Pero kon makadawat siyag pribilehiyo, dili siya angayng maghunahuna nga mas importante na siya kay sa uban. (Luc. 17:7-10) Angay nga ang iyang motibo mao ang pag-alagad sa uban nga mapainubsanon. (2 Cor. 12:15) Ang Bibliya naghisgot bahin sa mga tawo nga naghunahuna nga importante kaayo sila. Si Diotrefes mapahitas-on. Gusto niyang “molabaw” diha sa kongregasyon. (3 Juan 9) Si Uzzias nangahas sa paghimo sa usa ka buluhaton bisag wala siya awtorisahi ni Jehova sa pagbuhat niana. (2 Cron. 26:16-21) Si Absalom gustong mahimong hari, busa nagpakaaron-ingnon siya nga gimahal niya ang mga tawo aron suportahan nila siya. (2 Sam. 15:2-6) Klarong gipakita sa maong mga asoy nga si Jehova dili malipay sa mga tawo nga nagtinguha sa ilang kaugalingong kadungganan. (Prov. 25:27) Sa ngadtongadto, ang garbo ug ambisyon moresulta sa kadaot.—Prov. 16:18. w20.07 4 ¶7-8

Ang ubang Kristohanong pamilya mibalhin sa laing nasod aron makalingkawas sa lisod nga mga kahimtang sa ilang nasod o aron mangitag trabaho. Tungod niana, ang ilang mga anak tingali giedukar na diha sa pinulongan sa gibalhinan nilang nasod. Ang mga ginikanan kinahanglan sab tingaling makakat-on sa bag-ong pinulongan aron makakitag trabaho. Komosta kon dunay kongregasyon o grupo nga nagsulti sa ilang kaugalingong pinulongan? Asa sila angayng motambong? Sa kongregasyon ba nga naggamit sa pinulongan sa ilang gibalhinan nga nasod, o sa kongregasyon nga nagsulti sa ilang kaugalingong pinulongan? Ang ulo sa pamilya kinahanglang modesisyon kon asang kongregasyona motambong ang iyang pamilya. Kay personal ni nga desisyon, kinahanglan niyang konsiderahon kon unsay pinakamaayo para sa iyang pamilya. Kinahanglang tahoron nato ang desisyon sa ulo sa pamilya. Bisag unsay iyang desisyon, dawaton nato kana. Abiabihon nato ang pamilya ug isipon ingong bililhong bahin sa atong kongregasyon.—Roma 15:7. w20.08 30 ¶17-18

Kon gusto natong tabangan ta ni Jehova, dili ta angayng maghunahuna nga ang atong kusog, edukasyon, kultura, o bahandi makapahimo natong bililhon. Kining mga butanga dili maoy makapahimo natong mapuslanon kang Jehova. Gani, dili daghan sa katawhan sa Diyos ang “maalamon sumala sa sukdanan sa tawo, dili daghan ang gamhanan, dili daghan ang halangdon ug kagikan.” (1 Cor. 1:26) Busa bisag wala nimo mabatoni ang mga butang nga daw makahatag ug bentaha, makaalagad gihapon ka kang Jehova. Hinunoa, isipa ang imong kahimtang sa positibong paagi—ingong kahigayonan nga makita nimo kon sa unsang paagi tabangan ka ni Jehova. Pananglitan, kon mahadlok ka sa mga magsusupak, pag-ampo kang Jehova nga hatagan kag kaisog sa pagdepensa sa imong pagtuo. (Efe. 6:19, 20) Kon nag-antos ka sa grabeng sakit, hangyoa si Jehova nga hatagan kag kusog aron makapabiling aktibo kutob sa imong maarangan diha sa pag-alagad kaniya. Sa matag higayon nga makita nimo ang tabang ni Jehova, mas modako ang imong pagtuo ug mas molig-on ka. w20.07 16 ¶9

Kon gusto natong unahon ang Gingharian sa Diyos, kinahanglan natong sundogon si Abraham, kinsa kinabubut-ong mihimog mga sakripisyo aron mapalipay ang Diyos. (Mar. 10:28-30; Heb. 11:8-10) Ayaw pagdahom nga dili ka makaatubang ug mga problema. Bisan kadtong nag-alagad kang Jehova sa tibuok nilang kinabuhi makaatubang gihapon ug mga problema. (Sant. 1:2; 1 Ped. 5:9) Karon, mas daghan tag rason nga magpokus sa umaabot. Ang mga panghitabo sa kalibotan klarong nagpakita nga naa na ta sa kataposang bahin sa kataposang mga adlaw niini nga sistema sa mga butang. Usa sa mga panalangin nga atong matagamtam ubos sa pagmando sa Gingharian mao ang pagkabanhaw sa atong mga minahal. Nianang panahona, gantihan ni Jehova ang pagtuo ug pagkamapailobon ni Abraham pinaagi sa pagbanhaw kaniya ug sa iyang pamilya dinhi sa yuta. Tua ba unya ka aron abiabihon sila? Oo, kon sama ni Abraham, andam kang mosakripisyo para sa Gingharian sa Diyos, kon huptan nimong lig-on ang imong pagtuo bisan pa sa mga problema, ug kon mapailobon kang magpaabot kang Jehova.—Miq. 7:7. w20.08 5-6 ¶13-14; 7 ¶17

Nahibalo ta nga kon patyon ta sa atong mga kaaway, banhawon ta ni Jehova. Kombinsido ta nga bisag unsay ilang buhaton, walay makapugong nato sa pag-alagad kang Jehova. (Roma 8:35-39) Gipakita gayod ni Jehova nga maalamon kaayo siya pinaagi sa paghatag kanato sa paglaom sa pagkabanhaw! Pinaagi niini, iyang gidis-armahan si Satanas sa usa sa iyang labing epektibong mga hinagiban, ug sa samang higayon gihatagan ta niyag dili matarog nga kaisog. Kon ang mga kaaway ni Jehova manghulga nga patyon ka nila, isalig ba nimo kang Jehova ang imong kinabuhi? Unsaon nimo pagkahibalo? Ang usa ka paagi mao ang pagpangutana sa kaugalingon, ‘Ang ginagmay bang desisyon nga akong ginahimo kada adlaw nagpakita nga nagsalig ko kang Jehova?’ (Luc. 16:10) Ang laing pangutana mao, ‘Ang ako bang paagi sa pagkinabuhi nagpamatuod nga nagsalig ko sa saad ni Jehova nga iyang itagana ang akong materyal nga mga panginahanglan kon unahon nako ang Gingharian?’ (Mat. 6:31-33) Kon oo ang imong tubag sa maong mga pangutana, imong gipamatud-an nga nagsalig ka kang Jehova, ug andam ka sa bisan unsang pagsulay nga imong maatubang.—Prov. 3:5, 6. w20.08 17-18 ¶15-16

Kinahanglang mahimo tang hanas sa paggamit sa Pulong sa Diyos. Makat-onan nato diha sa mga tigom ang pipila ka paagi nga mahimo tang hanas. Pero kon gusto natong makombinsir ang uban nga bililhon kaayo ang kamatuoran sa Bibliya, kinahanglan nga regular nato ning tun-an. Kinahanglan natong gamiton ang Pulong sa Diyos sa pagpalig-on sa atong pagtuo. Nagpasabot ni nga dili lang basta basahon ang Bibliya. Kinahanglan sab tang mamalandong sa atong nabasa ug mag-research sa atong mga publikasyon aron husto ang atong pagsabot ug pagpadapat sa Kasulatan. (1 Tim. 4:13-15) Pinaagi niana, magamit nato ang Pulong sa Diyos sa pagtudlo sa uban. Sa gihapon, nagpasabot ni nga dili lang ta basta magbasa ug teksto. Gusto natong tabangan ang atong gisangyawan nga masabtan ang teksto ug kon sa unsang paagi kini mapadapat kanila. Busa kon regular tang magtuon sa Bibliya, mahimo tang mas maayong mga magtutudlo niini ngadto sa uban.—2 Tim. 3:16, 17. w20.09 28 ¶12

Makapadayon ta sa pag-una sa buluhatong pagsangyaw kon atong pamalandongon ang tanang gihimo ni Jehova sa pagtabang kanato. Pananglitan, nagtagana siya ug daghang inimprenta ug digital nga mga publikasyon, audio ug video nga mga rekording, ug mga Internet broadcast. Hunahunaa kini: Sa atong opisyal nga website, ang impormasyon mabatonan diha sa kapig 1,000 ka pinulongan! (Mat. 24:45-47) Ang laing paagi nga makapadayon ta sa pag-una sa pagsangyaw mao ang pagsundog kang Jesus. Wala niya tugoti ang bisan unsa nga makabalda niya sa pagsangyaw sa kamatuoran. (Juan 18:37) Wala siya matental dihang gitanyag ni Satanas kaniya “ang tanang gingharian sa kalibotan ug ang himaya niini” o dihang gusto sa mga tawo nga himoon siyang hari. (Mat. 4:8, 9; Juan 6:15) Wala siya maimpluwensiyahi sa tinguha nga madato, ug wala siya mahadlok sa grabeng paglutos. (Luc. 9:58; Juan 8:59) Dihang sulayan ang atong pagtuo, makapadayon ta sa pag-una sa pagsangyaw kon atong hinumdoman ang tambag ni apostol Pablo sa teksto karong adlawa. w20.09 10 ¶6-7

Mapasalamaton gyod ta kay daghan kaayog kugihan nga mga sister sa kongregasyon! Sila mokomento sa mga tigom ug makigbahin sa ministeryo. Ang pipila nagtabang sa pagmentinar sa Kingdom Hall ug nagpakitag personal nga interes sa mga igsoon. Siyempre, may mga problema sila. Ang pipila nag-atiman ug tigulang nga mga ginikanan. Ang uban gilutos sa ilang pamilya. Ug ang uban pa maoy nag-inusarang mga ginikanan kinsa naningkamot nga matagan-an ang ilang mga anak. Nganong angay natong tabangan ang mga sister? Tungod kay sagad ang kalibotan wala magpakita kanila sa pagtahod nga angay nilang madawat. Dugang pa, ang Bibliya nag-awhag kanato nga tabangan sila. Pananglitan, giingnan ni apostol Pablo ang kongregasyon sa Roma nga abiabihon si Febe ug “ihatag kaniya ang bisan unsa nga iyang gikinahanglan.” (Roma 16:1, 2) Si Pablo naggikan sa kultura nga nagpakamenos sa mga babaye. Pero ingong Kristohanon, iyang gisundog si Jesus pinaagi sa pagtahod sa mga babaye ug pagpakitag kaayo kanila. w20.09 20 ¶1-2

Aron matabangan ang atong mga Bible study sa pag-ugmad sa ilang tinguha sa pagsangyaw, puwede natong pangutan-on ang atong Bible study ug sama niini: “Sa unsang paagi nabag-o ang imong kinabuhi tungod sa pagpadapat sa gitudlo sa Bibliya? Sa imong hunahuna, kinahanglan ba sab ning mahibaloan sa uban? Unsay imong mahimo sa pagtabang kanila?” (Prov. 3:27; Mat. 9:37, 38) Hinumdomi nga si Jesus naghatag ug instruksiyon nga tudloan nato ang uban “sa pagtuman sa tanan” niyang gisugo. Siyempre apil niana ang duha ka kinalabwang sugo—ang paghigugma sa Diyos ug paghigugma sa isigkatawo—nga parehong konektado sa buluhatong pagsangyaw ug paghimog tinun-an. (Mat. 22:37-39) Gani, ang pangunang motibo nato sa pagsangyaw mao ang gugma. Tinuod, ang pipila ka Bible study mahadlok tingaling mosangyaw. Pero puwede nato silang pasaligan nga sa tabang ni Jehova, anam-anam nilang madaog ang ilang kahadlok sa tawo.—Sal. 18:1-3; Prov. 29:25. w20.11 3 ¶6-8

Dihang mangandam para sa pagtuon sa Bibliya, iampo kang Jehova ang imong Bible study ug ang iyang mga panginahanglan. Hangyoa si Jehova nga tabangan ka sa pagtudlo sa Bibliya sa paagi nga matandog ang iyang kasingkasing. Hinumdomi nga ang imong tumong mao ang pagtabang kaniya nga mouswag ug magpabawtismo. Kinahanglan sab makigkomunikar ang Bible study kang Jehova. Sa unsang paagi? Pinaagi sa pagpaminaw ug pagpakig-estorya kang Jehova. Makapaminaw siya sa Diyos pinaagi sa pagbasa sa Bibliya adlaw-adlaw. (Jos. 1:8; Sal. 1:1-3) Puwede siyang makig-estorya kang Jehova pinaagi sa pag-ampo kada adlaw. Busa pag-ampo nga kinasingkasing sa dili pa ug inigkahuman sa matag pagtuon, ug hisgoti ang imong Bible study sa imong mga pag-ampo. Samtang maminaw siya, makakat-on siya kon unsaon pag-ampo nga kinasingkasing ngadto kang Jehova nga Diyos sa ngalan ni Jesu-Kristo. (Mat. 6:9; Juan 15:16) Hunahunaa lang kon sa unsang paagi ang adlaw-adlaw nga pagbasa sa Bibliya (pagpaminaw kang Jehova) ug pag-ampo (pagpakig-estorya kang Jehova) makatabang sa imong Bible study nga mas masuod sa Diyos!—Sant. 4:8. w20.10 8 ¶8; 9 ¶10-11

Ang organisasyon ni Jehova karon naningkamot nga magpabiling organisado ug malinawon ang mga kongregasyon sama niadtong unang siglo. (Buh. 16:4, 5) Sa pag-ilustrar: Kon motambong kag Pagtuon sa Bantayanang Torre sa laing kongregasyon—bisan sa laing nasod—mahibalo ka kon unsaon kini pagdumala ug kon unsang artikuloha ang tun-an. Dili ka mabag-ohan! Kining talagsaong panaghiusa naposible lang tungod sa espiritu sa Diyos. (Sof. 3:9) Unsay imong mahimo? Pangutan-a ang imong kaugalingon: ‘Naningkamot ba ko nga mamentinar ang panaghiusa ug kalinaw diha sa kongregasyon? Masinundanon ba ko sa mga nagapanguna? Masaligan ba ko sa uban, ilabina kon duna koy mga responsibilidad sa kongregasyon? Ako ba kanunayng moabot sa hustong oras, matinabangon, ug malipayng moalagad?’ (Sant. 3:17) Dihang makita nimo nga duna kay angayng pauswagon, pangayog balaang espiritu. Kon tugotan nimo kini nga moimpluwensiya sa imong personalidad ug panggawi, mas higugmaon ug pabilhan ka sa mga igsoon tungod sa imong ginahimo diha sa kongregasyon. w20.10 23 ¶12-13

Ang Pulong sa Diyos samag salamin. (Sant. 1:23-25) Kadaghanan nato manamin kada buntag sa dili pa mobiya sa balay. Nianang paagiha, makita nato kon unsang mga kausaban ang kinahanglan natong himoon sa atong panagway sa dili pa ta makita sa uban. Sa susama, dihang basahon nato ang Bibliya kada adlaw, makita nato kon unsay kinahanglan natong usbon sa atong panghunahuna ug pagbati. Daghan ang nakabenepisyo sa pagbasa sa inadlaw nga teksto una sila mobiya sa balay. Gitugotan nila nga maimpluwensiyahan ang ilang hunahuna sa ilang nabasa. Dayon sa tibuok adlaw, mangita silag mga paagi nga mapadapat ang tambag sa Pulong sa Diyos. Kinahanglan pod natong tun-an ug pamalandongon ang Pulong sa Diyos kada adlaw. Morag simple ra ni, pero usa ni sa pinakaimportanteng butang nga atong mahimo aron magpabilin ta sa gamay nga dalan nga motultol sa kinabuhi. Ang Pulong sa Diyos samag X-ray machine, nga pinaagi niana makita nato kon unsay naa sa atong kasingkasing. Pero kinahanglang magmapainubsanon ta aron mapadapat nato ang tambag gikan sa Bibliya o sa mga igsoon nga gigamit sa Diyos. w20.11 18 ¶3; 20 ¶8

Bisag gilutos ang mga Kristohanon sa unang siglo, may mga panahon nga malinawon ang ilang kahimtang. Unsay ilang gibuhat nianang mga panahona? Ang maong matinumanong mga tinun-an nagsangyaw sa maayong balita nga walay hunong. Ang basahon sa Buhat nag-ingon nga sila “nagkinabuhi nga may kahadlok kang Jehova.” Nagkugi sila sa pagsangyaw sa maayong balita, ug tungod niana, sila “padayong midaghan.” Klaro nga gipanalanginan ni Jehova ang ilang madasigong pagsangyaw nianang panahon sa kalinaw. (Buh. 9:26-31) Gipahimuslan gyod sa mga tinun-an sa unang siglo ang tanang kahigayonan sa pagsangyaw sa maayong balita. Pananglitan, dihang nakita ni apostol Pablo nga daghan siyag masangyawan sa Efeso, nagpabilin siya nianang siyudara ug nagsangyaw didto. (1 Cor. 16:8, 9) Ang mga tinun-an naningkamot pag-ayo sa pagsangyaw sa “maayong balita sa pulong ni Jehova.” (Buh. 15:30-35) Unsay resulta? Makita kana sa atong teksto karong adlawa. w20.09 16 ¶6-8

Dihang nakasala si Adan, nagpahinabo siyag kamatayon sa iyang kaugalingon ug sa iyang mga kaliwat. Giantos gihapon nato ang makapaguol nga mga epekto sa iyang pagkamasinupakon. Pero kay gibanhaw sa Diyos ang iyang Anak, duna tay nindot nga kaugmaon! “Ang pagkabanhaw sa mga patay pinaagi usab sa usa ka tawo,” si Jesus. “Kay ingon nga diha kang Adan ang tanan nangamatay,” si apostol Pablo mipatin-aw, “sa ingon usab diha sa Kristo ang tanan pagabuhion.” (1 Cor. 15:22) Unsay gipasabot ni Pablo dihang siya miingon nga “diha kang Adan ang tanan nangamatay”? Diha sa hunahuna ni Pablo ang mga kaliwat ni Adan, kinsa nakapanunod ug sala ug pagkadili-hingpit gikan kang Adan ug busa mangamatay. (Roma 5:12) Si Adan dili apil niadtong “pagabuhion.” Dili makabenepisyo si Adan sa lukat sa Kristo, kay siya hingpit nga tawo kinsa tinuyong misupak sa Diyos. Ang nahitabo kang Adan parehas sa mahitabo niadtong hukman “sa Anak sa tawo” ingong “kanding,” nga mao, ‘kamatayon hangtod sa hangtod.’—Mat. 25:31-33, 46; Heb. 5:9. w20.12 5 ¶13-14

Kon wala ta hatagi sa usa ka partikular nga pribilehiyo, hunahunaa ang ehemplo sa matinumanong mga anghel. Panahon sa pagmando ni Haring Ahab, si Jehova nangayog sugyot sa mga anghel kon unsaon paghaylo ang daotang hari. Ang pipila ka anghel mihatag ug mga sugyot. Pero usa lang ka anghel ang gipili sa Diyos ug giingnan siya nga molampos ang iyang sugyot. (1 Hari 22:19-22) Naluya ba ang ubang matinumanong mga anghel, tingali naghunahuna, ‘Nganong nagkapoykapoy pa man kog sugyot?’ Siyempre wala nâ nila buhata. Ang mga anghel mapainubsanon kaayo ug gusto nilang ihatag kang Jehova ang tanang kadungganan. (Maghu. 13:16-18; Pin. 19:10) Hinumdomi nga ang atong kinadak-ang pribilehiyo mao ang pagdala sa ngalan sa Diyos ug ang pagsangyaw sa iyang Gingharian. Dili ang mga pribilehiyo ang makapahimo natong bililhon sa Diyos, kondili ang atong pagkamapainubsanon. Kon mapainubsanon ta, mahalon ta ni Jehova ug sa mga igsoon. Busa hangyoa si Jehova nga tabangan ka sa pagpabiling mapainubsanon. Hunahunaa ang daghang maayong ehemplo sa pagkamapainubsanon nga narekord diha sa iyang Pulong. Magmaandam sa pag-alagad sa mga igsoon sa bisan unsang paagi nga imong maarangan.—1 Ped. 5:5. w20.12 26 ¶16-17

Ang helmet sa kaluwasan mao ang paglaom nga gihatag ni Jehova kanato—ang paglaom nga luwason ta niya gikan sa kamatayon ug gantihan ang tanang nagbuhat sa iyang kabubut-on. (1 Tes. 5:8; 1 Tim. 4:10; Tito 1:1, 2) Ang paglaom sa kaluwasan manalipod sa atong katakos sa paghunahuna. Kini makatabang nato nga magpokus sa mga saad sa Diyos ug dili mabug-atan sa atong mga problema. Masul-ob nato ang maong helmet pinaagi sa pagpahiuyon sa atong panghunahuna sa hunahuna sa Diyos. Pananglitan, dili nato ibutang ang atong paglaom sa walay kasegurohang bahandi, kondili sa Diyos. (Sal. 26:2; 104:34; 1 Tim. 6:17) Ang espada sa espiritu mao ang Pulong sa Diyos, ang Bibliya. Ang maong espada dunay gahom sa pagyagyag sa bakak ug pagpahigawas sa mga tawo gikan sa pagkaulipon sa bakak nga mga pagtulon-an ug makadaot nga mga panggawi. (2 Cor. 10:4, 5; 2 Tim. 3:16, 17; Heb. 4:12) Makakat-on ta sa paggamit sa maong espada sa hustong paagi pinaagi sa personal nga pagtuon ug sa pagbansay nga atong madawat gikan sa organisasyon sa Diyos.—2 Tim. 2:15. w21.03 27 ¶4; 29 ¶10-11

Bisan dihang gipriso siya tungod sa pagsangyaw bahin kang Jesus, gipamatud-an ni apostol Juan nga gimahal niya ang uban. Pananglitan, iyang gisulat ang pinadayag nga iyang nadawat ug gipadala kini sa mga kongregasyon aron ilang mahibaloan kon unsay “kinahanglang mahitabo sa dili madugay.” (Pin. 1:1) Ug posible nga human siya buhii gikan sa Patmos, gisulat ni Juan ang iyang Ebanghelyo bahin sa kinabuhi ug ministeryo ni Jesus. Nagsulat sab siyag tulo ka sulat aron dasigon ug palig-onon ang iyang mga igsoon. Masundog nimo ang pag-una ni Juan sa kaayohan sa uban ug mapamatud-an nimo nga imong gimahal ang mga tawo sa paagi nga gigamit nimo ang imong kinabuhi. Gusto sa kalibotan ni Satanas nga gamiton nimo ang imong panahon ug kusog para sa imong kaugalingon, nga maningkamot nga mahimong dato o inila. Hinunoa, ang mga Kristohanon sa tibuok kalibotan nga nag-una sa kaayohan sa uban naggahin ug dakong panahon sa pagsangyaw sa maayong balita ug pagtabang sa mga tawo nga masuod kang Jehova. w21.01 10 ¶9-10

Puwede untang masina si Jonatan kang David. Ingong anak ni Haring Saul, puwede untang moinsistir si Jonatan nga siya ang may katungod nga mahimong manununod sa trono. (1 Sam. 20:31) Pero si Jonatan mapainubsanon, ug siya maunongon kang Jehova. Busa bug-os niyang gisuportahan ang pagpili ni Jehova kang David ingong sunod nga hari. Maunongon sab siya kang David, bisag nakapasuko ni pag-ayo kang Saul. (1 Sam. 20:32-34) Si Jonatan may mabinationg pagmahal kang David, busa wala niya kini isipa ingong karibal. Si Jonatan hanas nga magpapana ug isog nga manggugubat. Siya ug ang iyang amahan, si Saul, nailhan ingong “mas tulin kay sa mga agila” ug “mas kusgan kay sa mga leyon.” (2 Sam. 1:22, 23) Busa puwede untang manghambog si Jonatan bahin sa iyang mga kadaogan. Pero si Jonatan wala makigkompetensiya o masina kang David. Siya nakadayeg kang David tungod sa kaisog ug pagsalig niini kang Jehova. Gani, ayha pa siya nasuod kang David human mapatay niini si Goliat. w21.01 22 ¶6, 8-9

Ang tanang Kristohanon nailalom sa awtoridad ni Jesu-Kristo, kinsa hingpit nga ulo. Pero sa dihang ang usa ka Kristohanong babaye maminyo, mailalom siya sa awtoridad sa usa ka dili hingpit nga lalaki. Dili nâ pirmeng sayon. Busa, sa dihang maghunahunag posibleng minyoan, angay niyang pangutan-on ang kaugalingon: ‘Unsay nagpakita nga kini nga brader mahimong maayo nga ulo sa pamilya? Prayoridad ba niya ang espirituwal nga mga kalihokan? Kon dili, mahimo kaha siyang maayong ulo nga manguna nako sa espirituwal kon maminyo na mi?’ Siyempre, angay sab niyang pangutan-on ang kaugalingon: ‘Unsay akong mga hiyas nga makatabang sa pagpalampos sa kaminyoon? Ako ba mapailobon ug mahinatagon? Lig-on ba ang akong relasyon kang Jehova?’ (Eccl. 4:9, 12) Kon ang babaye mohimog maayong mga desisyon sa dili pa magminyo, makatabang ni niya nga molampos ug magmalipayon sa iyang kaminyoon. Minilyon sa mga sister ang nagpakitag maayong ehemplo sa pagpasakop sa ilang bana. Angay silang komendahan! w21.02 8 ¶1-2

Sa di pa dugayng katuigan, daghang magmamantala ang nagtuon ug laing pinulongan aron mapauswag ang ilang ministeryo ug moalagad sa kongregasyon nga lahig pinulongan ug mas dakog panginahanglan. Personal ni nga desisyon niini nga mga igsoon aron makaalagad sila kang Jehova nga mas bug-os pa. Bisag dangtan pag pipila ka tuig una sila mahimong larino sa bag-ong pinulongan, dako silag tabang sa kongregasyon. Ang ilang maayong mga hiyas ug eksperyensiya makapalig-on sa kongregasyon. Gipabilhan gyod nato kining mga igsoon nga andam motabang! Ang mga ansiyano dili angayng modesisyon nga dili nila irekomendar ang usa ka brader ingong ansiyano o ministeryal nga alagad tungod lang kay dili pa siya larino sa pinulongan sa kongregasyon. Susihon sa mga ansiyano kon nakab-ot ba sa brader ang giingon sa Bibliya nga kuwalipikasyon para sa mga ansiyano ug ministeryal nga alagad, dili kon unsa siya ka maayong mosulti sa pinulongan sa maong kongregasyon.—1 Tim. 3:1-10, 12, 13; Tito 1:5-9. w20.08 30 ¶15-16

Ang mga tawo maghunahuna tingali nga magmalipayon lang sila kon sila maayog panglawas, daghag kuwarta, ug may malipayong pamilya. Pero ang kalipay nga gihisgotan ni Santiago maoy bahin sa bunga sa espiritu sa Diyos ug wala magdepende sa kahimtang sa usa. (Gal. 5:22) Ang usa ka Kristohanon tinuod nga magmalipayon kon nahibalo siya nga siya nakapalipay kang Jehova ug nagsunod sa ehemplo ni Jesus. (Luc. 6:22, 23; Col. 1:10, 11) Samag kalayo nga magsiga sa sulod sa lampara, kini nga kalipay magdilaab diha sa kasingkasing sa usa ka Kristohanon. Dili ni moawop bisan dihang kita masakit o mahutdag kuwarta. Ug dili ni mapalong bisan pa sa pagbugalbugal o paglutos gikan sa mga membro sa pamilya o sa uban. Imbes mapalong, ang kalayo mas mosiga pa matag higayon nga sulayan kinig palong sa mga magsusupak. Ang mga pagsulay nga atong giatubang tungod sa atong pagtuo nagpamatuod nga kita tinuod nga mga tinun-an sa Kristo. (Mat. 10:22; 24:9; Juan 15:20) Kanay rason nga gisulat ni Santiago ang mga pulong sa teksto karong adlawa. w21.02 27 ¶6

Dihang makabasa kag mga teksto nga nagpakita kon unsa ka importante ang pagpabiling kalmado ug pagsalig kang Jehova, paningkamoti nga mamemorya kana. Mahimong makatabang nimo ang pagbasag kusog o pagsulat niana ug pagbalikbalik ug basa niana. Si Josue gisugo nga regular nga basahon sa hinay nga tingog ang basahon sa Balaod aron siya molihok nga maalamon. Ang iyang mabasa makatabang sab nga mawala ang kahadlok nga iya tingaling gibati diha sa iyang pagpanguna sa katawhan sa Diyos. (Jos. 1:8, 9) Daghang teksto sa Bibliya ang makahatag nimog kalinaw sa hunahuna ug kasingkasing dihang naa ka sa mga situwasyon nga sagad makapabalaka o makapahadlok nimo. (Sal. 27:1-3; Prov. 3:25, 26) Sa atong mga tigom, makabenepisyo ta sa mga pakigpulong, komento, ug makapadasig nga panag-estoryahay uban sa atong mga igsoon. (Heb. 10:24, 25) Madasig pod kaayo ta dihang atong isulti sa kasaligang mga higala diha sa kongregasyon ang atong mga kabalaka. w21.01 6 ¶15-16

Sa dihang nagpabawtismo mo, nagpakita mog dakong pagtuo ug pagsalig kang Jehova. Ug siya nalipay sa pagdawat ninyo ingong membro sa iyang pamilya. Ang kinahanglan ninyong buhaton karon mao ang padayong pagsalig kang Jehova. Tingali sayon rang mosalig kaniya dihang kinahanglan mong mohimog importante kaayong mga desisyon. Pero komosta sa ubang higayon? Importante gyod nga mosalig mo kang Jehova dihang mohimog mga desisyon, pananglitan sa pagpilig kalingawan, sekular nga trabaho, ug mga tumong sa kinabuhi. Ayawg salig sa inyong kaugalingong kaalam. Hinunoa, pangitag mga prinsipyo sa Bibliya nga haom sa inyong kahimtang ug ipadapat kana. (Prov. 3:5, 6) Kon inyo nang himoon, mapalipay ninyo si Jehova ug mabatonan ninyo ang pagtahod sa mga igsoon sa inyong kongregasyon. Siyempre, sama sa tanan, kamo dili hingpit, ug usahay masayop mo. Pero, dili ni angayng makapugong ninyo sa paghimo sa inyong maarangan diha sa pag-alagad kang Jehova. w21.03 6 ¶14-15

Gisupak ba ka sa imong pamilya tungod kay nag-alagad ka kang Jehova? O nagpuyo ba ka sa nasod diin ang buluhaton sa katawhan ni Jehova dunay restriksiyon o gidili pa gani? Kon mao, madasig tingali ka kon imong basahon ang 2 Timoteo 1:12-16 ug 4:6-11, 17-22. Gisulat kini ni apostol Pablo samtang gipriso siya. Sa dili pa nimo basahon ang maong mga teksto, isulti kang Jehova ang imong problema ug kon unsay imong gibati niana. Magmaespesipiko. Dayon pangayog tabang kang Jehova aron imong makita ang mga prinsipyo diha sa mga asoy bahin sa kalisdanan ni Pablo nga makagiya nimo kon unsaon pag-atubang ang imong problema. Gipasidan-an ni Jehova si Pablo nga makaatubang siyag paglutos tungod kay siya usa ka Kristohanon. (Buh. 21:11-13) Giunsa pagtabang ni Jehova si Pablo? Iyang gitubag ang mga pag-ampo ni Pablo ug gihatagan siyag kusog. (2 Tim. 4:17) Si Pablo gipasaligan nga madawat niya ang ganti nga iyang gipaningkamotang maangkon. Gipalihok sab ni Jehova ang maunongong mga higala ni Pablo sa paghatag niyag praktikal nga tabang. w21.03 18 ¶14-15, 19