ANAH

Anak nga lalaki ni Zibeon ug ang amahan sa asawa ni Esau nga si Oholibama. (Gen 36:​2, 14, 18, 20, 24, 25; 1Cr 1:​34, 40, 41) Sa Genesis 36:2 ang Hebreohanong teksto mabasa nga “si Oholibama nga anak nga babaye ni Anah nga anak nga babaye ni Zibeon.” Ang Syriac nga Peshitta, ang Samarianhong Pentateuch, ug ang Gregong Septuagint dinhi parehong mabasa nga “anak nga lalaki ni Zibeon,” uyon sa Genesis 36:​24, nga nagpakitang si Anah maoy anak nga lalaki ni Zibeon. Ang pipila ka modernong mga hubad misunod niini nga paghubad ug nag-ingong “anak nga lalaki ni Zibeon” sa bersikulo 2 ug sa bersikulo 14. (RS, AT, JB) Hinunoa, ang Hebreohanong pulong alang sa “anak nga babaye” dinhi motugot usab sa mas lapad nga kahulogan ingong apo ug busa mahimong magtumong kang Oholibama inay kang Anah. Busa ang Bag-ong Kalibotang Hubad sa Genesis 36:2 mabasa: “Si Oholibama nga anak nga babaye ni Anah, ang apo ni Zibeon nga Hivihanon.”

Ang pipila nagtuo nga ang ngalan nga Anah nagtumong sa duha ka tawo, sanglit si Anah giingong usa ka “Hivihanon” sa bersikulo 2 samtang ang Anah sa bersikulo 20 ug 29 gitawag nga usa ka “Horihanon.” Hinunoa, kon ang termino nga “Horihanon” nagkahulogan lamang nga “tigpuyo sa langob,” mahimong gamiton kini sa paghubit sa mga batasan sa mga Seiranhon sa pagpuyo sa langob inay nga gamiton sa pagtumong sa kagikan. Busa ang pulong nga “mga anak nga lalaki” sa bersikulo 20 mopatim-aw nga may mas lapad nga kahulogan ingong mga kaliwat. Maingon sa gipahayag sa Cyclopædia ni M’Clintock ug Strong (1882, Tomo I, p. 212): “Ang katuyoan sa talaan sa kagikan maoy dili aron ihatag lamang ang linya sa kagikan sa mga Seiranhon kondili aron itala kadtong mga kaliwat kinsa, ingong mga pangulo sa mga tribo, nalangkit sa mga Edomhanon. Busa mopatim-aw nga si Anah, nga gigikanan sa asawa ni Esau, mao ang pangulo sa usa ka tribo nga bulag sa tribo sa iyang amahan, ug susama ra niana nga tribo.”