BAAL-SALISA

[Tag-iya sa Salisa].

Usa ka dapit diin may usa ka tawo nga nagdalag 20 ka sebadang tinapay gikan sa unang mga bunga sa iyang ani ug bag-ong mga lugas nga ihatag ngadto sa manalagnang si Eliseo. (2Ha 4:42-44) Panahon kadto sa gutom, ug si Eliseo didto sa Gilgal. Ang diyutayng pagkaon napaigo alang sa usa ka gatos ka “anak nga lalaki sa mga manalagna” didto, ug may mga salin pa.​—2Ha 4:​38, 43; itandi ang Mat 14:20; Mar 8:8.

Ang Baal-salisa giisip nga duol sa Gilgal ug lagmit diha sa “yuta sa Salisa,” nga niana milatas si Saul sa dihang nangita sa mga asna sa iyang amahan. (1Sa 9:4) Gihisgotan ang Baal-salisa diha sa Babilonyanhong Talmud nga naghubit niini ingong usa ka dapit diin ang mga bunga sayo kaayong mangahinog. (Sanhedrin 12a) Ang gituohan nga dapit mao kanang sa Kafr Thulth sa tiilan sa kabungtoran sa Epraim, sanglit ang ngalang Thulth maoy tukmang katumbas sa Arabiko sa Hebreohanong pulong nga Salisa. Ang Kafr Thulth nahimutang nga mga 46 km (29 mi) sa AAK sa Jerusalem.