EBER

[gikan sa lintunganayng pulong nga nagkahulogang “paglabay (pagtabok)”; o, “sa pikas nga dapit [nga mao, sa atbang nga dapit]”].

Gawas nga personal nga ngalan sa lima ka lainlaing mga tawo sa Bibliya, ang “Eber” gigamit usab sa Numeros 24:24 sa pagtumong sa Hebreohanong rasa o kaha sa usa ka rehiyon. Ang Gregong Septuagint, Syriac nga Peshitta, ug ang Latin nga Vulgate naghubad dinhi sa “Eber” ingong “ang mga Hebreohanon.” Apan, ang “Eber” dinhi hayan nagtumong sa yuta o sa katawhan sa ‘pikas bahin’ sa Euprates (gawas pa sa Asirya, nga gihisgotan sa samang bersikulo). Sa Hebreohanon ang ekspresyon alang sa “saylo sa Suba” (Heb., ʽeʹver han·na·harʹ) usahay gigamit sa pagtumong sa rehiyon sa K sa Euprates. (Neh 2:​7, 9; 3:7) Sa 1 Hari 4:24 ang samang Hebreohanong ekspresyon gihubad nga “niining dapita sa Suba” (NW) o “kasadpan sa Euprates.” (RS) Ang katumbas nga Aramaikong ekspresyon gigamit sa kinatibuk-an sa pagpaila sa rehiyon sa Sirya ug Palestina.​—Esd 4:​10, 11, 16, 17, 20; 5:​3, 6; 6:​6, 13.

1. Katigulangan ni Abraham; ang anak ni Sela ug ang amahan ni Peleg ug Joktan ug sa uban pang mga anak. Sa mga adlaw sa iyang anak nga si Peleg, kinsa namatay nga mas una pa kang Eber ug 191 ka tuig, “ang yuta nabahin.” Kini lagmit nagtumong sa paglahugay ni Jehova sa pinulongan niadtong nagtukod sa Babel ug sa torre niini ubos sa mando ni Nimrod.​—Gen 10:25; 11:14-19, 26.

Ang Genesis 10:21 naghisgot kang “Sem, ang katigulangan sa tanang anak ni Eber [“katigulangan sa tanang Hebreohanon,” AT, Mo], nga igsoon ni Japet nga kinamagulangan.” Dayag nga gitala dinhi si Eber nga suod kang Sem tungod sa dakong pagtagad nga gihatag sa Bibliya sa mga kaliwat ni Eber, ilabina sukad kang Abraham. Busa, gitumbok sa teksto nga ang mga kaliwat ni Sem dili lamang ang mga Hebreohanon, sumala sa gipatin-aw sa mosunod nga mga bersikulo. Ang mga kaliwat ni Eber pinaagi kang Joktan lagmit nanimuyo sa Arabia, samtang kadtong pinaagi kang Peleg nagpuyo sa Mesopotamia.

2. Usa ka Gadhanon nga nagpuyo sa Basan, usa ka kaliwat ni Abihail.​—1Cr 5:​11, 13, 14.

3. Usa ka Benjaminhon nga nailhan nga anak ni Elpaal.​—1Cr 8:12.

4. Usa ka Benjaminhon nga pangulo nga gitala apil sa mga anak nga lalaki ni Sasak.​—1Cr 8:22-25, 28.

5. Usa ka Levihanong saserdote; ang pangulo sa balay sa amahan ni Amok. Dayag nga si Eber maoy katalirongan sa Hataas nga Saserdoteng si Joiakim, ni Gobernador Nehemias, ug ni Esdras nga saserdote ug eskriba.​—Neh 12:​12, 20, 26.