EHIPTO, BUL-OGANANG WALOG SA

Usa ka hataas nga lugot nga nagsilbing timaan sa gimbut-an sa Diyos nga utlanan sa HK sa Yutang Saad, nga mao, ang “yuta sa Canaan.” (Num 34:​2, 5; 1Ha 8:65; Isa 27:12) Bisan tuod kini nga bul-oganang walog wala mahimutang sa Ehipto, ang pagmando sa maong nasod lagmit nakaabot nianang dapita, tingali sulod sa pipila ka yugto, hangtod niadtong tungora. (2Ha 24:7) Ang gipamubong ekspresyon nga “bul-oganang walog,” gigamit sa paghubit sa mga utlanan sa yuta sa Israel diha sa panan-awon ni Ezequiel, lagmit nga nagtumong niining samang lugot.​—Eze 47:19; 48:28.

Ang bul-oganang walog sa Ehipto sagad gituohan nga mao ang Wadi el-ʽArish, nga nagsugod kapin sa 200 km (125 mi) pailaya sa Peninsula sa Sinai duol sa Jebel et-Tih. Mitadlas kini sa A hangtod nga nakaabot sa Dagat Mediteranyo sa lungsod sa el-ʽArish (Rhinocolura), mga 150 km (90 mi) sa S sa Port Said. Sa ting-init kini maoy usa lamang ka ugang yuta. Apan, sa panahon sa ting-ulan sa dihang agosan kini sa daghang sapa, ang Wadi el-ʽArish mahimong usa ka nagbul-og nga suba nga ang mga tampi niini lapawan sa tubig, lukahon gani ang mga kahoy ug banlason kini sa kusog nga bul-og niini. Lagmit mao kini ang hinungdan kon nganong gitawag kini nga “suba sa Ehipto” diha sa mga talaan sa utlanan sa Yutang Saad sa Genesis 15:18.​—Apan, tan-awa ang SIHOR.