ELIASAP

[Ang Diyos Nagdugang (Nagpauswag)].

1. Anak nga lalaki ni Deuel (o Reuel) sa tribo ni Gad; usa sa 12 ka pangulo nga gipili ni Jehova sa pagtabang kang Moises ug Aaron sa pag-ihap sa mga lalaki nga mosulod sa pagkasundalo. (Num 1:1-4, 14; 2:14) Si Eliasap mao ang nangulo sa kasundalohan sa iyang tribo, nga maoy bahin sa tulo-ka-tribo nga dibisyon sa kampo ni Ruben. (Num 2:10-15; 10:18-20) Dugang pa sa pagpakig-ambit sa ginurupo nga paghalad nga gihimo sa mga pangulo human sa pagpatindog sa tabernakulo, si Eliasap naghalad usab sa iyang kaugalingong halad sa ikaunom nga adlaw alang sa inagurasyon sa halaran.​—Num 7:​1, 2, 10, 42-47.

2. Anak nga lalaki ni Lael ug pangulo sa balay sa amahan sa mga Gersonhon. Ubos sa pagtultol ni Eliasap, gidala sa mga Gersonhon ang mga tabon sa tolda ug ang tabil sa ganghaan sa tabernakulo, ang tabil sa ganghaan sa sawang ug ang mga kortina sa sawang maingon man ang mga pisi sa tolda.​—Num 3:21-26.