EUTIKO

[Bulahan; Malamposon].

Usa ka batan-ong lalaki sa Troas nga mao ang kataposang gitaho sa Kasulatan nga sa milagrosong paagi nabuhi pag-usab. Sa pagduaw ni Pablo sa Troas sa iyang ikatulong misyonaryong panaw, iyang gitaas ang iyang pakigpulong alang sa mga igsoon hangtod sa tungang-gabii. Kay gidaog sa kakapoy ug lagmit nga tungod sa kainit sa daghang lampara ug sa kahuot sa lawak sa itaas, si Eutiko nahikatulog pag-ayo ug nahulog gikan sa bentana sa ikatulong andana. Ang mananambal nga si Lucas, nga magsusulat sa Mga Buhat ug lagmit usa ka saksing-nakakita sa nahitabo, nagtaho nga si Eutiko dili lamang kay nawad-an sa panimuot apan “gialsa nga patay na.” Sa pagsunod sa pamaagi nga sama niadtong kang Eliseo sa pagbanhaw sa anak nga lalaki sa Sunaminhon, si Pablo miubo kang Eutiko ug migakos kaniya. Ang mga pulong ni Pablo, “Hunong na kamo sa pagkaguliyang, kay ang iyang kalag anaa kaniya,” nagpasabot nga napasig-uli ang kinabuhi ni Eutiko.​—Buh 20:7-12; tan-awa usab ang 2Ha 4:34.