GALEED

[Tapok nga Saksi].

Ang dapit sa bukirong rehiyon sa Gilead sa S sa Jordan diin ang mga patriarka nga si Jacob ug Laban naghimog pakigsaad. (Gen 31:43-48) Ang ulahing ngalan niini nga rehiyon, ang “Gilead,” lagmit nga gikuha gikan sa “Galeed,” ang ngalan nga sa orihinal gingalan sa dapit nga gihimoan niini nga pakigsaad niadtong mga 1761 W.K.P.

Agig pagsunod sa pagtultol sa Diyos, ug wala magpahibalo, si Jacob mibiya sa Padan-aram ug sa pag-alagad kang Laban, kinsa iyang uyoan ug iyang ugangang lalaki. (Gen 28:2) Dala ang tanan niyang kabtangan, ug uban sa iyang mga asawa ug mga anak, si Jacob mitabok sa Suba sa Euprates ug mipaingon sa yuta sa Canaan. Human sa tulo ka adlaw, si Laban, nga inubanan sa iyang “mga igsoong lalaki,” migukod sa gilay-on nga pito ka adlaw nga panaw, ug sa kataposan nakaapas sa nagapanawng panon ni Jacob didto sa kabukiran sa Gilead sa A sa bul-oganang walog sa Jabok.​—Gen 31:17-25.

Malinawon nga naghusay sa mga butang nga ilang gilalisan, si Jacob ug Laban naghimog pakigsaad sa usag usa. Tungod niini, si Jacob nagpatindog ug usa ka haligi nga bato ug nagsugo sa iyang “mga igsoong lalaki” nga mohimog usa ka tapok sa mga bato, tingali giporma nga usa ka lamesa, diin didto gikaon ang pagkaon sa pakigsaad. Human niadto, gitawag ni Laban ang maong dapit pinasukad niini nga tapok sa mga bato, nga ginganlan kini sa Aramaiko (Siryanhon) nga ngalang “Jegar-sahaduta,” apan gitawag kini ni Jacob sa Hebreohanong katumbas nga “Galeed.” Si Laban miingon: “Kini nga tapok [Heb., gal] maoy usa ka saksi [Heb., ʽedh] tali kanako ug kanimo karong adlawa.” (Gen 31:44-48) Ang tapok sa mga bato (ug ang haligi nga bato) nagsilbing usa ka saksi alang sa tanang molabay didto. Kini sama sa giingon sa bersikulo 49, “Ang Bantayanang Torre [Heb., mits·pahʹ],” nga nagpamatuod nga si Jacob ug Laban nagkauyon nga ipreserbar ang kalinaw taliwala ug sulod sa ilang tagsatagsa ka banay. (Gen 31:50-53) Sa ulahing mga okasyon ang mga bato gigamit sa samang paagi ingong hilom nga mga saksi.​—Jos 4:​4-7; 24:25-27.