GEMARIAS

[Gihingpit (Gikompleto) ni Jehova].

1. “Anak nga lalaki ni Sapan nga magkokopya”; usa sa mga prinsipe panahon sa paghari ni Jehoiakim (628-618 W.K.P.). Si Gemarias dunay kaugalingong lawak-kan-anan sa ibabaw nga sawang sa templo, ug dinhi gibasa sa makusog ni Baruk ang mga pulong sa basahon nga gidiktar kaniya ni manalagnang Jeremias. Si Micaias nga anak nga lalaki ni Gemarias nakadungog sa unang pagbasa sa basahon ug dayon nagtaho sa pulong ni Jehova ngadto sa mga prinsipe kinsa, sa baylo, nagsugo kang Baruk nga basahon kanila ang maong basahon. Sa pagkadungog nila sa mga pulong sa basahon, ilang gitambagan si Baruk ug Jeremias nga motago. Sa ulahi, sa dihang gibasa ang linukot ngadto kang Haring Jehoiakim, si Gemarias maoy usa sa mga prinsipe nga nangamuyo sa hari nga dili sunogon ang linukot.​—Jer 36:10-25.

Dili pa dugay, nakaplagan sa Jerusalem ang usa ka inumol nga yutang-kulonon nga sa usa ka panahon gigamit aron ipapilit sa usa ka dokumento ug markahan kini pinaagi sa usa ka timbre. Ang inskripsiyon sa ibabaw niini mabasa: “Iya kang Gemarias [Heb., Gemar·yaʹhu], anak nga lalaki ni Sapan.” Kini nga timbre giingon nga gikan sa mga ikapitong siglo W.K.P., ug gituohan nga ang tag-iya niini mao si Gemarias nga gihisgotan sa Jeremias kapitulo 36.

2. “Anak nga lalaki ni Hilkias, nga gisugo ni Zedekias nga hari sa Juda ngadto sa Babilonya kang Nabucodonosor.” Niining tungora si Jeremias nagpadala ug usa ka sulat pinaagi sa kamot ni Gemarias ug ni Elasa ngadto sa nadestiyerong mga Hudiyo nga gidala sa Babilonya uban kang Jehoiakin (Jeconias) niadtong 617 W.K.P.​—Jer 29:1-3.