KAW-IT, TAGA
Usa ka kurbado o bawog kaayo nga metal o ubang materyales, nga usahay sinimaan.
Ang bulawang mga kaw-it gigamit diha sa tabernakulo aron tapoton ang duha ka dagkong mga seksiyon sa binordahang tabon nga lino, ug ang tumbagang mga kaw-it alang sa duha ka seksiyon sa tabon nga gama sa balhibo sa kanding. (Ex 26:1, 5, 6, 7, 10, 11; 36:13, 18; 39:33) Ang kortina tali sa Balaan ug sa Labing Balaan gibitay pinaagig mga kaw-it, nga lagmit bulawan (Ex 26:31-33), sama usab sa tabil sa ganghaan sa tabernakulo.—Ex 26:36, 37.
Ang mga taga gigamit sa karaang mga mangingisda. (Hab 1:14, 15; Isa 19:1, 6-8; Mat 17:24-27) Ang mga kaw-it sa mangingihaw gihisgotan sa Bibliya. (Am 4:2) Ang mga kaw-it, nga lagmit mga tunok, gigamit usab sa pagdala sa mga hayop, ilabina sa mapintas nga mga mananap.—Eze 19:3, 4, 6, 9, ftn sa Rbi8.
Ang binihag nga mga tawo usahay guyoron pinaagig mga kaw-it diha sa mga ngabil, ilong, o dila. Ang usa ka Asiryanhong hulagway nagpakita sa hari nga nagkupot ug tulo ka binihag pinaagig pisi nga gihikot sa mga kaw-it diha sa ilang mga ngabil samtang iyang gibutaan ang usa kanila pinaagig bangkaw. Busa, nasabtan ni Haring Senakerib sa Asirya sa dihang si Jehova mahulagwayong misulti ngadto kaniya pinaagi sa manalagnang si Isaias: “Ibutang ko gayod ang akong kaw-it sa imong ilong ug ang akong busal taliwala sa imong mga ngabil, ug dad-on ko gayod ikaw pagbalik didto sa dalan nga imong giagian.”—2Ha 19:20, 21, 28; Isa 37:29.
Si Jehova mahulagwayong nagsulti kang Paraon sa Ehipto, kinsa binuang nga gisaligan sa Israel alang sa suporta batok sa Babilonya: “Kaw-itan ko ang imong apapangig . . . Ug haw-ason ko ikaw gikan sa taliwala sa imong kasapaan sa Nilo . . . Ug biyaan ko ikaw sa kamingawan . . . Ug ang tanang molupyo sa Ehipto makaila gayod nga ako mao si Jehova, tungod kay sila maoy usa ka tukod nga tangbo alang sa balay sa Israel.” (Eze 29:1-7) Kini nga mga pulong maoy haom; ang historyador nga si Herodotus (II, 70) nag-ingon nga ang mga Ehiptohanon migamit ug kaw-it sa pagdakop sa buaya ug naghaw-as niini gikan sa tubig. Si Jehova usab nagtagna nga iyang kaw-itan ang mga apapangig ni “Gog sa yuta sa Magog” ug dad-on kini ngadto sa pangataposang pag-atake batok sa katawhan sa Diyos ug ngadto sa iyang kaugalingong kalaglagan.—Eze 38:1-4; 39:1-4.